Tuesday, June 12, 2007

بقع من الدور السبعين

مش عارفه ده الوقت المناسب عشان اكتب ولا تؤ
بس اهو هكتب
حالتى دلوقتى اسوأ ما يكون
اخر مره كنت كده..لما واحد عزيز على اوى اتوفى
مش عارفه ايه بالظبط الى خلانى دلوقتى كده..بس هى حاجات كتيره
بس هفضفض هنا شويه مع نفسى يمكن اقدر افوق و اقوم اكمل مذاكره..:)
عندى شعور كده انى بقع من الدور السبعين بقالى سنه
و مفيش حاجه ..مفيش اى حاجه ممكن اتمسك بيها عشان انجد نفسى
دلوقتى اهو طايره فى الهوا..و فى اى لحظه هتصدم فى الارض و هموت
لا..دا انا كمان ممكن حتى لما اقع موصلش لللارض
ممكن اغرق..اغرق فى مكان مش عارفه ايه هو اصلا
و لما اوصل ...مش هبقى عارفه انا وصلت ازاى
نفسى ارجع لى من سنتين
ياااه..حاجات كتيره اوى كانت مختلفه
دلوقتى مش عارفه ايه اللى حصل..بس اكيد انا السبب الرئيسى يعنى فى اللى حصل ده
بقالى فتره كبيره اوى بحاول ارجع زى زمان..بس مش عارفه
بدور جواى على حاجه مش لاقياها..مش عارفه ممكن فى يوم الاقيها ولا تؤ
بس الحاجه دى جميله اوى..انا على يقين انى لو لقيتها هستريح كتير اوووى
عشان كده مش عايزه استسلم..:)
بس للاسف اليومين دول مستسلمه اوى للظروف اللى حوالى
مش عارفه ايه اللى حصل فعلا..انا عايزه اعرف
كل اللى عارفاه انى لسه بقع من الدور السبعين و مستنيه نهايه الللى هيحصل
at

16 comments:

  1. AnonymousJune 13, 2007 at 2:34 AM

    اوعي تستلمي

    لازم تبقي اقوي من كدة
    اللي انتي فيه دة مش غريب
    تقريبا كلنا مرينا باللي انتي بتمري بيه
    اقلها انا كنت زيك
    كنت بقع من الدور الالف بقالي 18 سنة

    مش سنة واحدة
    حاجات اتغيرت مش من سنتين لا
    دة من ايام ما كان عندي 6 سنين

    صدقيني اللي انتي فيه مش جديد

    هي حاله ومهما طالت السنين والايام هتعديها
    بس لازم تكوني مؤمنة بنفسك
    لازم تقولي انا موجودة
    حتي لو حسيتي انك مش ليكي وجود
    الكلام مع النفس بالنقيض بينفع اوي
    انك تحسي انك بتحققي ولو جزء من المية شئ
    ة اجاز ولازم تفتخري بيه
    اقل انجاز لازم تطيه في دماغك انك بتتنفسي
    ايوة
    انك بتتنفسي
    دة في حد ذاته انجاز كبير انك عايشة رغم الظروف اللي انتي بتمري بيها
    مش شرط تكون ظروف صعبه
    الظروف دي من جواكي انتي
    اتغلب علي خوفك
    اقعدي مع نفسك كدة في اودة واتكلمي معاها
    شوفي هي عايزة ايه امسكي في نقطه ضعفها وقوليلها انتي مش ممكن تغلبيني
    انتي استحالة هتنتصري عليا
    ربنا خالقني قوية
    ولازم اقف واثبت للناس دي انك اجمد بكتير

    بصي هستأذنك تخشي عندي
    وتقري موضوع ليا اسمه حياة ميتة او موت حياة المهم انها حياة

    وفي بوست تاني اسمه يلاحقنا الموت
    ودول لينكاتهم
    يمكن يساعدوكي في انك تعدي الي انتي فيه


    دة بتاع حياة ميتة

    http://anooojy.blogspot.com/2006/12/blog-post_22.html

    ودة بتاع يلاحقنا الموت

    http://anooojy.blogspot.com/2007/03/blog-post_30.html

    بس اوعي تعيطي
    ها
    وابقي قوليلي ايه النتيجة
    بس اوعي تدعي عليا

    ReplyDelete
  2. catrozJune 13, 2007 at 7:04 AM

    بصى دلوقتى انا بقرأ فى حياه ميته اهو و دموعى نازله..مش عارفه اقولك ايه..انا امبارح قررت قبل ما انام انى مش هعيط تانى..بس اهو بقى هعمل ايه..:)

    بكمل الباقى اهو م مش عايزه اعيط تانى..عينى يتوجعنى بجد..:)

    ...........
    بس هاهو وصلت للاخر

    انتى بجد قويه اوووى..:)

    بجد الحمدلله انى بتنفس.الحمدلله:)

    هحاول افكر بالطريقه اللى انتى بتفكرى بيها..هبص لقدام شويه و هحاول اغير ستقبلى..:)

    هحاول ابقى مؤمنه بحاجات معينه كده اكتر...يمكن تساعدنى و اقدر افق و اقوم تانى ...و اشوف ايه اللى حصل و اصلحه..
    بس المشكله عندى شعور بالظلم اوى..حاجه حصلت و مليش دخل فيها و بترجع تتكرر تانى كل فتره..و الواحد اصلا مش ناقص انه يمر اباللى مر بيه مره تانيه...و هو عارف انه مظلوم و عارف ان مفيش حد هيسمعه زى المره الاولى..بس كده

    هقرا تانى واحده "يلاحقنا الموت" و هاجى اقولك الاخبار ايه

    ................

    بصى التانيه انا مش عيطت و قلت لا دى هتبقى زى الاولى فيها حاجه جميله فى الاخر..و فعلا اهو فى حاجه جميله ظهرت

    الحمدلله بجد..القصه جميله اوى و احلى ما فيها انها حقيقيه..انتى بجد جواكى كويس اوى..و ربنا بيحبك فعلا..ربنا يكرمك يارب يا سمراء..:)

    ReplyDelete
  3. §a§aJune 13, 2007 at 3:05 PM

    اوبس ما هذا الذى اقرأة

    اتقعين من الدور السبعين ولسه مش وصلتى

    هههه

    امزح

    لا بجد فيه ايه لا حاولى مش تستسلمى كدا لاى مشكله تواجهك وان شاء الله هتبقى احسن

    ReplyDelete
  4. catrozJune 13, 2007 at 3:42 PM

    أتمزح ايها المؤرخ العظيم ساسا..طب حاسب لتقع معاى...:D

    اهو و الله بحاول افوق تانى و ارجع اقف على رجلى تانى..اعتقد الموضوع هياخد شويه و قت..بس اهو اعتقد انا اقوى من كده بدليل انى ما زلت"اتنفس"يعنى مش عايزه اكتر من كده..:)..منور البلوج بيك..:)

    ReplyDelete
  5. §a§aJune 14, 2007 at 2:42 PM

    البلوج منور بأصحابه

    لا بجد من غير مزاح

    هههه

    ان شاء الله خيرا وحاولى تتغلبى على كل شىء بالعزيمه وان شاء الله هترجعى احسن من الاول ان كان هناك صبرا وعزيمه

    ReplyDelete
  6. catrozJune 14, 2007 at 9:33 PM

    و الله بحاول اهو يا مصطفى و بحاول ابقى اقوى من الظروف..يلا ربنا يسهل..متنسوناش من دعواتكوا بقى..:)

    ReplyDelete
  7. وشوشنيJune 15, 2007 at 11:05 AM

    بصي تقريبا انا دلوقتي شعوري زي شعورك بس دي مرحله او فترة لازم بنمر فيها انا مريت بيها وانت وكلنا حاولي تقاومي واذا ماكنش في حاجه تمسكي فيها اكيد في حد هينقذك من اللي قلبهم عليكي عشان ماتغرقيش كمان والصدمه هتقومك اقوى بكتييييير من زمان

    ReplyDelete
  8. catrozJune 15, 2007 at 11:19 AM

    ادينى مازلت بحاول..و محدش هيقدر ينقذنى الا نفسى..المفروض ارجع لوحدى اقف على رجلى تانى من اول و جديد..مش هستنى مساعده من حد...تؤ لازم افوق نفسى و اخليها تساعدنى....منورانى يا وشوشنى

    ReplyDelete
  9. Abd El Rahman MagdyJune 15, 2007 at 3:53 PM

    جوة كل انسان في مارد وشخص ضعيف جبان
    كلنا بنتمنى ان المارد ده يفضل دايما على الوش
    نواجه بيه كل مشاكلنا في الحياة
    لكن في بعض الأحيان الضعيف بيخرج وبيخلينا ما نقدرش نواجه أي حاجة
    لكن ده في حد ذاته يخلينا نقوم ونقاوم
    عارفة ليه؟
    لأن زي ما الضعيف قاوم المارد وغلبه وخرج للنور
    احنا كمان ممكن نقاوم الضعيف ونساعد المارد إنه يخرج
    أهم حاجة ما نستسلمش وصدقيني احسبيها هتلاقي إن الخروج من حالتك دي أسهل بكتير من الدخول فيها
    لكن اهم حاجة تكوني عايزة تخرجي منها
    سلااااااااااااااااااام

    ReplyDelete
  10. المجاهدةJune 15, 2007 at 4:07 PM

    مدونة من غير ما تقوللينا
    :(:(

    عرفتها بالصدفة البحتة والله
    :d



    و يوم ما ادخل الاقيكي بتقعي:(

    طيب ايه انتي لسه كده ولا بقيتي احسن؟؟؟

    ReplyDelete
  11. catrozJune 15, 2007 at 7:25 PM

    عبووووووووووود....فعلا كل انسان جواه نص ضعيف و نص قوى
    بس ساعات النص القوى ده بيبقى ضعيف هو كمان ..:(...هو ده الانسان ..استحاله يبقى قوى طول الوقت...بس اهو ادينى بحاول ارجع تانى و افوق من اللى وصلت له..:)و اخلى الشخص القوى يرجع تانى و الضعيف يمشى..:) ... بس معتقدش ان الخروج من الحاله دى اسهل من الدخول فيها...انا دخلت فى الحاله دى فى غمضه عين..:)....و ميرسى على كلامك..هحاول اعمل اللى بتقول عليه فعلا..:)..ربنا يسهل

    ReplyDelete
  12. catrozJune 15, 2007 at 7:29 PM

    المجاهده...بجد انتى نورتينا هنا اووووووووووى ..و انا مبسوطه انك جيتى هنا.بس انا مكنتش مخبيه المدونه ولا حاجه..تؤ..كنت هقولكواا اكيييد ..بس هى اصلها كانت لسه فى مرحله الانشااء و فجاه طلعت ظهرت :D...

    و ادينى اهو بحاول اقوم اقف تانى..

    ReplyDelete
  13. §a§aJune 16, 2007 at 2:26 PM

    ربنا يوفقق ان شاء الله

    هى فترة وهتعدى بتمر على كل انسان دايما

    ReplyDelete
  14. catrozJune 16, 2007 at 6:40 PM

    يااارب تخلص بقى..بحاول اطلع من المود ده و مش عارفه بقى

    :(

    ReplyDelete
  15. AMRO .O. ABDELHALIMJune 18, 2007 at 3:11 PM

    هااااى كاتروز
    فعلا فى تشابه فى الاحلام لكن فى واحدمن المفسرين الجامدين جداقالى ان الحلم بالسقوط من الاعلى يدل على ان صاحبه مشرك بالله ،،يعنى كفرنى كدا على طول الحمار دا وكمان استدل باية (ومن يشرك بالله فكانما خر من السماء فتخطفه (الطير اوتهوى به الريح فى مكان سحيق
    عاوز اوكد لك ان كل يوم جديد فى حياتنا هو افضل بالنسبالنا طبعا مفهوم الافضل دا مفهوم نسبى لكن ممكن نتفق ان اليوم الجديد بنتعلم فيه جديد ، بنصاحب ناس ومع مرور الوقت بنزادنضج ، وبنشوف اشياء اجمل، وبنحب ناس احلى
    عجبنى جدا انك مش عايزة تستسلمى، وانك مستمرة فى البحث عن اللى بتدورى عليه
    وذى مقلتلك على البلوج بتاعى الانسان ممكن يتعايش مع اى حاجة
    متشكر اوى لانك سالتى عنى،،،ومستنى زيارتك

    ReplyDelete
  16. catrozJune 18, 2007 at 4:26 PM

    المتوحد...انا سعيده جدا ان حضرتك منورنى فى البلوج بتاعى بعد غيبه طويله
    ..:)
    نرجع لموضوعنا..:D
    هو دا مش حلم على فكره..دى زى ما تقول شويه فضفضه..شعورى بالمعنى الاصح..انى بقع و مش عارفه هوصل لفين ....و فعلا كل يوم اجمل من اللى قبليه بكل الطرق..كل يوم بنتعلم حاجات جديده..بنقابل ناس جديده..كل يوم فعلا افضل من اللى قبليه.. و دى وجهه نظر المتفائل اللى بنحاول دايما نخليها وجهه نظرنا احنا كمان للامور..
    اما موضوع التفسير..الشخص ده مينفعش يقول اصلا لك انت مشرك بالله ولا تؤ..ازاى يعنى يقول حاجه زى كده..انت حتى مينفعش يقولك هتروح الجنه ولا النار...يعنى هو شايف نفسه ربنا عشان يقول حاجه زى كده..!!! كل كلمه هو قالها هيتحاسب عليها..و ميصحش انه يقول كده و كلمه مشرك يعنى انت بتعبد ربنا مع اله تانى..و هو يعنى من حلم هيعرف..انا مش بعترف او مش بحب تفسير الاحلام الا بس مجرد متعه مش اكتر..لكن انى اهتم بيها اوى او كده ..لا ..لانى بعتقد انها حاجه نفسيه

    و فى الاخر زى ما حضرتك على طوول بتقول الانساان ممكن يتعايش مع كل حاجه و ده اللى احنا عايزينه
    ..:)

    ReplyDelete

Commentoo ..:D