Sunday, April 20, 2008

حاجه مالهاش لازمه من غيره ..


عمرى ما كنت ببقى مقتنعه ان الواحد ممكن يحس بكذا احساس فى نفس الوقت

خصوصا لو كانت احاسيس عكسيه

كرة .. حب ..خوف ..لا مبالاه ..اهتمام .. كسل ..نشاط

تبقى عايز تموت فى اقرب فرصه

و تفكر ان فى حاجات حلوة اوى موجوده عشان تعيش عشانها

ممكن تكون بتكرة حد و تقول انا اول ما اشوفه هقوله كده

و اشوفه و اقوله انا بحبك اوى على فكرة و اقول عكس ما كنت عاوزة اقول

و بعد ما يمشى اخبط راسى فى الحيطه عشان افوق و افهم هو ايه اللى حصل دلوقتى ده

برضوا مبفهمش هو ايه اللى حصل

انا بكرهك اوى .. فى نفس الوقت انا بحبك

ممكن انسان انت مش قادر تعيش معاه ..مش عاوزة موجود فى حياتك

بيه انت تعبان اوى ..فى وجوده انت حتى مش عارف تتنفس

وفى غيابه انت بتموت ..لانك برضوا مش قادر تعيش من غيرة

مش متخيل بكرة ده يعدى عليك و انت مش معاه

بس اهى الايام بتفضل ماشيه .. و بنرجع نقول الحياه مبتقفش عند حد

و الله ما بتقف عند حد ..ما هو الناس اللى بنحبهم بتروح

ايه اللى حصل يعنى

بننام و نصحى و ناكل و نشرب و نتنفس

يمكن التنفس بقى نفسه صعب

يمكن بكرة مبقاش وردى زى ما كان

بس الحياه موقفتش

الوانها اتغيرت ايوة ..بس احنا لسه عايشينها

النهارده السبت و بكرة الاحد و بعده الاتنين

مفيش يوم طار فى النص

ساعات بتبقى البديهيات حاجات صعبه اننا نفهمها

صعب نفهم ان 1 +1 =2

صعب نفهم ان الابيض لون و الاسود ده لون تانى خالص

لو حطيت رجلى فى البحر هتتبل من الميه

برضوا لو حطيت ايدى فى النار هتتحرق

و اى قرار بتاخده فى حياتك انت ده يبقى على مسئوليتك

حتى لو ضربوك على ايدك عشان تتخذ القرار ده .. بكرة لما يحصل حاجه

هتطله انت اللى غلطان..فى حق نفسك و فى حق غيرك

بس فى حق نفسك اكبر

دى حياتك انت مش حياه واحد ماشى فى الشارع

و الرجاله خلصوا من البلد

و الله الجمله دى بجد

كل كام ميت واحد هنلاقى فيهم راجل بجد .. ده لو لقينا اصلا

ده بقى البنى ادمين يثيروا اشمئزاز الواحد بطريقه عجيبه بجد

و احنا و بعد كل اللى حصلنا برضوا هبل زى ما احنا

الايام بتكرر نفسها و احنا سامحين لنفسنا نغلط زى الاول

بنفوق متاخر اوى .. و نرجع ندخل تانى فى غيبوبه

حياتنا اصلا بقت عامله زى ما تكون غيبوبه دخلنا فيها و مش قادرين نخرج منها

حاجات كتيرة اوى مكتفانا بدون سبب و مش قادرين نعمل حاجه بايدينا

ممكن تكون بتحب حد .. من كتر ما بتحبه و تخاف عليه و تقربه منك

تخليه يستنشق الزفير بتاعك

تبقى بتموته من خوفك عليه

تكون بتحب حد و نفسك تعيش معاه حياتك كلها بكل ايامها الجايه

بس انت بتحلم بس .. انا مش ليك ولا عمرك اصلا كنت لى

و حتى لو احنا لبعض .. كل شىء فى الحياه بيبعدنا عن بعض

كل شىء بمعنى الكلمه

الاهمال بقت عاده عندنا .. مبنعملش اللى ورانا الا لما يكون الوقت فات

طيب و انت كنت فين من بدرى .. انا كنت فى غيبوبه و فقت منها لحد ما اخلص اللى وراى

و هلحق اخد مكانى تانى فى الغيبوبه لحسن حد ياخده بدالى

تبقى مذاكر و طالع عينيك و جايب مقبول

مش بالذمه ده ظلم .. و واحد تانى فاشل ملهوش فى البتنجان

جايب تقديرات احسن منك

اول سنه ازعل ان حد قريب منى جايب تقدير اعلى منى

اصلى كنت بذاكرلوا

يعنى الواحد لو عاش لوحده و عايش لمصلحته بس .. الحياه عنده هتتحسن

لو خفنا على غيرنا و اهتمينا بيهم .. يبقى بنضيع وقتنا و جهدنا عالفاضى

و الله زمايلنا بتوع مصلحتهم بس هما اللى جايبين تقديرات

بس انا مش كده .. و عمرى ما كنت كده .. و عمرى اصلا ما هعرف ابقى كده

محدش ربانى انى ابقى كده .. متعلمتش ابقى لمصلحتى و بس

هنتعلم امتى بقى منبقاش هبل فى التعامل مع الكائنات اللى بنتعامل معاها دى

بجد الناس مبقوش ناس .. و الله دول بقوا وحوش اصلا

وانا مش فاهمه ايه ذنبها البنت تتحط فى الظروف دى

باباها و مامتها كل واحد عايش حياته مع نفسه و هى اتفعصت فى النص

و الله ما بقيت اسمع صوت ضحكتها

و حتى لو سمعتها بتبقى مخبيه دموع .. ولا بتضحك بسخريه على حالها

ولا ضحكه بتقولى فوقى يا روز .. يعنى بعد كل اللى حصل ده و فاكرة الدنيا لسه وردى

زمان كنت بعرف اقنعها ان لسه فى حاجات حلوة تعيش عشانها

دلوقتى بسكت .. مبلاقيش كلام يتقال

هقولها ايه يعنى .. هتعبها اكتر مما هى تعبانه اصلا

و الله مكانت احلامها وهميه ولا مستحيله ولا حاجه

بسيطه اووووى .. بس بقت شبه مستحيله

تحب واحد و تكون مخلص ليه بكل الطرق... يجى يبيعك بارخص تمن

حاجه تكون فى ايدك و ملكك .. متحسش بقيمتها الا لما تروح منك بلا رجعه

تاخد قرار مصيرى فى حياتك .. و بدون حتى انك تفكر ايه نتايج القرار ده

و بعديها بسنه تكتشف انه قرار تافه غلط ..بس غير حياتك لطريق تانى خااالص

بنرجع تانى لنفس نقطه

بعشقك و مقدرش اعيش من غيرك ... بس بوجودك انا بموت

رحمتك بينا يا رب .. مش عايزين ننجرح تانى من اقرب الناس لينا

مش عايزين نفوق متاخر من الغيبوبه

عايزين بس حياه بسيطه .. ندخل بيها الجنه

حياه نكون راضيين بيها

مش عايزين تعبنا يروح تانى على الفاضى

لسه فى حاجات كتيرة اوى جواى .. بس مبقاش فى كلام يوصف اللى جواى ايه

13 comments:

Dr Gad said...

كويس اني اول تعليق

تقريبا انا عارف انتي بتتكلمي عن مين

بس بجد يا روز ياااااااااااااه علي البوست ده جميل بجد

وهقولك علي حاجة ..انتي صح ..ادي ومتستنيش تاخدي ومتستنيش جزاء

انتي كده وتربيتك كده مش بتعملي عشان حاجة يبقي ميهمكيش

وهقولك زي تامر عاشور م بيقول

هتعدي

وان طااااااال الحزن عليا هضغط علي جرحي واعدي
انا شايف اه بعنيا كل الاحزان هتعدي

:)

لسه بعقلى said...

هى دى الدنيا
حاجة ملخبطة وينعيشها والسلام

بس خلينا نحط هدف لينا نقدر نعيش علشان نحققه
اى هدف ...بس هدف ممكن يتحقق علشان ما يجلناش احباط


اتمنى تزورى مدونتى ....محتاجة رايك

Rushdy Kamel said...

بصي يا كاتروز
مهما رحنا واكتسبنا خبرات مستحيل هانفهم ايه اللي بيدور في دماغ الناس ودماغنا
فعلا المخ ده حاجة معقدة بشكل مرعب
انا شخصيا نفسي ابطل تفكير
وارجع بسيط زي زمان
واقتنع ان الابيض ابيض والاسود اسود
انا نفسي ادي مخي اجازة
بجد

ولسة جوانا كلام كتير
كتيييييييييييير
متستنيش انه يطلع كله
او تعبري عنه ببساطة

بس البوست ده محاولة جميلة للتعبير

تحياتي

Lobna Ahmed Nour said...

حاجات كتير اتكلمتي عنها في البوست ده

منها حاجات ناس كتير بتحسها ومنها حاجات

اكيد ليها معنى خاص عندك

لكن في الاول والاخر احاسيسنا وافكارنا

ليها لازمة سواء بوجود بعض الناس او من غيرهم

بالعكس القرب والبعد بيضوفوا بعد

تاني وتالت للاحاسيس والمشاعر

عايزة اقولك

you have a beautiful mind

Ana keda said...

بصى هقولك على حاجة بجد جدا

هتتعبى بين الناس الى انتى فيهم دى حاجة فادامك حل من اتنين يا تبقى زيهم وتتعاملى وده لا يمكن اقبلهولك اصلا

والحاجة التانية انك يا ستى تتحملى ده شوةي اعتبريهها ضريبة انك انسانة مختلفة اعتبريها ضريبة انك حد مش موجود

بس الفكرة اختارى والنبى اختــــــــــارى صح بلاش تدى عمال على بطال بصى وادى المشكلة مش فى الى احنا بنديه المشكلة فى مين

سهل اوى اكتر حد اديتيه هو اول واحد يبيعك

فكرى فيكى الاول مش انانية بس محدش هيتعب غيرك فبلاش تتعبيها

كفايانا تعب بجد

أنا حر said...

انت متلغبطة لأن هي فعلا الدنيا بتلغبطنا
اصعب حاجة في الدنيا اننا نفهم الدنيا دي عايزة مننا ايه لازم نتلغبط بس حلها الوحيد انك تحسي بنفسك علشان تقدري تعيشي
تحياتي

Raghda Rashad رغده رشاد said...

روز...مش هتصدقى...بس انا الى حد ما متابعة المدونة من حوالة سنة و كانت اول واحدة اقراها و فورا عملت مدونتى...و انتى اتكملتى عن حاجة وقت ما قريت كانت لسه حصلالك و كان اثرها كبير ف حياتك و لحد دلوقتى...الحاجة دى مكنتش حصلتلى بس دلوقتى حصلت...فكرة ان حد غالى عليكى ازوى و هوا حياتك يرحل و يسيب الارض للناس اللى فيها و يروح...انا حاسة الوجع فى كلامك...و حسيت باللى بتقوليه دلوقتى لما بلاقى ان معنى حياتى و اللى كان بيكملها راح...بس صدقينى الناس مش وحشة اوى كدا...بدليل انك موجودة...انا لسه كاتبة حاجة نفسى تقريها و عارفه انك هتحسى بيها اوى ده مش دعاية و ةالله بش انا ارتبطت بيكى من غير ما اعرفك او تعرفينى...و فرصة سعيدة

oRiGiNaL HeArT said...

مش عارفة اقولك ايه
بس انتى تقريبااتلكمتى عنى
حاجات كتير من اللى قولتيها انا نفسى اقولها بس مش عارفة اطلعها من جويا
روز بجد البوست دة اثر فيا اوى
..بالنسبة اننا بندى ومش بنلاقى رد من اللى قدامنا دة لازم نكون عاملينه لله علشان ناخد الثواب من ربنا لازم بجد نكون ماكدين نيتنا فى الاول قبل اى حاجة نعملها ..اننا بنعمل كدة علشان ربنا مش علشان الناس!!
ولازم نفضل كدة
i love reading your posts Rose:D

catroz said...

dead man...

هو فعلا فى كلام فى البوست هنا عنها

حلوة اوى هتعدى دى يا ديد

بسيارب بس تعدى بقى

وبكرة يبقى احسن

عشان بجد تعبنا ...:(

.............

لسه بعقلى ..

هى حاجه اه متلغبطه ...بس مش بنيشها و السلام
حتى لما بنحط اهداف ساعات بنشوف ابسطها مستحيل انه يتحقق
..:)

catroz said...

big code...

مفيش حاجه اسمها ان بونى ادم يبطل يفكر
مهما كان مخنا دا شغال و بيفكر فى ابسط التفاصيل و بيتعبنا

نفسى انا كمان ادى مخى اجازة

:D

............
unique..

انا فعلا مش عارفه ارد على كلامك

بس بتمنى انك نتورينا على طول ..:)

catroz said...

ana keda..

اهون علىبطل الطرق انى اعتبرهاضريبه

بس موضوع انى اختار ده لحد دلوقتى صعب حبتين
المشكله بنشوف الناس كلها زى بعضها
و هما مش زى بعض

دلوقتى بقى اقرب الناس لينا يبيعونا .:)

............

انا حر ...

مش عاوزة افهم الدنيا عاوزة مننا ايه
عاوزة اخلص منها و خلاص
:D

catroz said...

رغده مشاد...

شفت البوست عندك و وجعلى قلبى بجد
بتتكلمىعلى تفاصيل زمان كنا فاكرينها حاجه مش مهمه
لمابتختفى من حياتنا غصب عننا بنموت و احنا بنتنفس

ربنايرحمهم..:)
............

unalacrima triste...

لسه هندى و مش هنلاقى
يمكن فى يوم من الايام نقابل حد من الناس الكويسه دى
يوم نلاقى حد على الاقل يفهمنا كويس

كان ياما كان فاضيه ليه

مستنياكى تجيبى لنا حاجه حلوة كد

take my soul said...

حلو قوى يا روز