28 -2 -2008

مش عارفه بقى بس اهى مواقف و بتحصلى و انا راكبه مواصلات و خلاص
طبعا ساعتين كل يوم مواصلات بس ..طبيعى جدا هشوف حاجات غريبه
يمكن متكونش غريبه ولا حاجه .بس انا اللى شايفاها غريبه

النهارده ركبت ميكروباس ..اللى بيروحوا من السابع للعباسيه دول
العباسيه ..!! ايوة العباسيه اصل انا بعيد عنكوا جامعه عين شمس
صحيح بمناسبه كلمه "عين شمس" من كام يوم كده كان الجو شويه حر و شويه برد
كنت متضايقه من الجو الغريب ده .. يعنى اللى عايز يجيله برد يخرج فى الجو ده ..
و اهو جالى برد .. و زمان محمد فرحان فى ..
يوووة مش ده موضوعنا دلوقت..المهم..
لما كنت بقول لواحده صاحبتى الجو شويه حر و شويه برد .. هو ايه اللى احنا فيه ده
قامت ردت على و قالت لى" تصدقى ليهم حق يسموها عين شمس .."
مفهمتش هى قصدها ايه طبعا ..
مش عارفه ده غباء ولا لانها بتقول حاجه ملهاش علاقه بالموضوع اصلا ..

و نسيت اسالها تقصد ايه ..لو حد فهم يقولى

مش ده موضوعنا الاساسى على فكرة
المهم كان قاعد جنبى واحده حاجه كبيره كده و بتاكل لب ..
و انا بكرة ريحته بجد بجد بجد يعنى بطريقه بشعه..
خييير ..
و قاعد وراى واحد عمال يكلم السواق و صوته عااالى فى ودانى..
اهو الراجل ده عسكرى و بيفتخر بانه عسكرى ..
بيقول للراجل..

" دول بيعاملونا زى الزباط بالظبط و بيحترمونا و كل حاجه قشطه"

هو على فكرة اللى بيقول زباط مش انا .. .. بس قشطه دى من عندى ..
مفهمتش هو الراجل يقصد ايه يعنى بانهم بيعاملوهم زيهم
بس اول حاجه جات فى بالى ..طيب يا عم طالما بيعاملوك حلو كده
امال روكا كارة الجيش ليييه ..

هتقولوا مين روكا .. اهو كائن حى ياكل و يشرب .. و يارب ما يدخل و يشوف الكلام ده ..
اصله بقى مفترى اليومين دول..

بمناسبه كلمه دول .. دكتور احمد نافع تقريبا نص كلامه فى المحاضره فيه كلمه "دول"
الكلمه دى بيقولها فى اى جمله و فى اى ظرف و فى اى مكان و فى اى بتنجان
لدرجه انى لما بقيت اسمعها بقيت افتكرة ..
ربنا يحفظه .. من القلائل المحترمين فى الجامعه ..

فعلا كمان بمناسبه انى دخلت سبع مواضيع فى بعضها دلوقتى ..
من الواضح انى عايزة انام ..
مع انى نايمه امبارح من 2 بالليل لحد 9 الصبح
يعنى نوم كويس بالنسبه لكائن مجهول الهويه .. اللى هو انا يعنى

المهم الراجل العسكرى اللى مبسوط بنفسه
بيحكى للراجل اللى بيسوق بيقوله..

"الحياه ملل ملل ملل .. ملل ملل ملل ..
اكل و شرب و نوم و خلاص على كده
يوم الجومعه بقى اللى هو الاجازة .. بروح البيت بتفرج على التلفزيون
اهو حاجه ترفيهيه الواحد يعملها بدل الملل اللى الواحد فيه "

هو برضوا اللى بيقول الجومعه .. مع تعطيش الجيم فى كل الكلام و فتح تاء تلفزيون
ولكم ان تتخيلوا ..
مش عارفه بس حاسانى عماله بتريق على الراجل و هو معمليش حاجه ..
وربنا هيجيبلى حد تانى يتريق على ..

المهم شويه و الراجل سكت معرفش نام ولا ايه..
المهم خلصنا منه
ببص على طنط اللى كانت بتاكل لب و سودانى و فاتحاها بتاع لب و سودانى
هو اسمه ايه صحيح الراجل ده ..؟؟ اللى بيبيع لب و سودانى ..
المهم .. لقيتها نامت ..

و فجاه صحيت على صوت واحد بيزعق و بيتكلم فى الفون ..
"كده يا عصام .. بقى هو يعنى كده يا عصام .. "

بصراحه من صوته و نرفزته كنت هموت و اعرف عصام عمل ايه ..

"بقى احنا متقفين على كده يا عصام .. مش عارف اقولك ايه يعنى يا عصام .. "

باين عصام ده كان عامل مصيبه ..
و انا لسه هموت و اعرف هو اللى اسمه عصام ده عمل ايه..

" مش انا قلت لك يا عصام هرن عليك.. و انت ترجع ترن على يا عصام "

تصدقوا طلع بيهزقه عشان فتح عليه ..

بعديها كنا على كوبرى و شفت فلفله ..
"لى فيه شويه زكريات حلوة المطعم ده "..
و نزلنى اخر الكوبرى عشان انزل امشى من العباسيه لحد الجامعه ..
و اروح اسلم على صوحابى فى تل ابيب ..
و اطلع المحاضره اللى مدتها 3 ساعات بالطول و العرض ..
بخرج منها بحس انى كنت محبوسه فى سجن فدرالى ..
و الدكتور بيدى statistics و انا مبحبش الماده ده اللى كلها بنقعد ننقل فى ارقام كبيرة
ونضرب و نجمع و نرسم حاجات غريبه ..
ماده ممله اخر حاجه .. >_>
واهو بقالى اسبوعين مبحضرهاش ..
و شكلى فى الاخر هخلى محمد يشرحهالى و ادخل امتحن و انجح ان شاء الله

صاحيه من 9 الصبح .. و الساعه بقت واحده و نص
و المفروض اصحى 7 ونص الصبح
المفروض انام بس مش جايلى نوم ..
قاعده من الساعه 9 على المكتب و خلصت حاجات كتيرة كانت عايزة تخلص
و مرهقه اخر حاجه ..بس مش جايلى نوم ..

هقوم اعمل اى حاجه و احاول انام ..بدل ما اروح بكرة تعبانه و هى مش ناقصه تعب اصلا
ده غير البرد اللى مش راضى يروح من عندى ده ..

صحيح دلوقتى

يعنى الكلام ده كلوا حصل يوم 27 سنه 2008
2008
2008
2008
ايه ده هو احنا بقينا خلاص 2008
يعنى ايه
2008
سنه 2000 كانت قريبه اوى
و 2005 كمان كانت قريبه
عمرى ما فكرت ان ممكن 2008 تعدى على من غير بابا
هو نفسه مكانش يعرف انه مش هيشوف 2008
ولا هيشوف 2009
ولا هيشوف 2010
ولا حتى 2011
ولا هيشوفنى لما انجح السنادى باذن الله
ولا هيشوفنى يوم ما اتخرج
ولا لما اخد الماستر
ولا حتى و انا لابسه الفستان الابيض
ولا اى حاجه خلاص بقى ..
يلا اهو جالى سبب انى انام .. مبعرفش اعيط الا على المخده ..اللى زهقت منى..
و كل ما اروح البيت التانى بنسى اجيب المخده اللى بحبها
بكرة المخده اللى هنا .
بس بحب بابا ..

الحمدلله ..الحمدلله

تصبحى على خير يا روز ..
وانتى من اهله يا روز ..

نفسى الساعه 9 و نص متعديش على بكرة ..
و نفسى اسمع دلوقتى صوت حد بحبه .......................


28 -2 -2008

الكائنات الفضائيه على فكرة زوق

فعلا ابتديت احس ان الكائنات الفضائيه دى زوق اوى
بجد زوق زوق يعنى ..مش عاملين زى البنى ادمين كمان

يعنى على الاقل مش هتبقى بتذاكر فى مرة و ييجى كائن فضائى يسيب كل الشقه وييجى
يشغل اى حاجه بصوت عالى جنبك و متعرفش تركز بسببه

مش هييجى برضوا كائن فضائى يشيل الغطى من عليك فى عز البرد بحجه ان الدنيا حر
متستغربوش ..احمد ابن عمى اللى عنده 4 سنين عملها

مش هييجى كائن فضائى عشان ينام تقعد تطبطب عليه و تغنيلوا
لا و يختار كمان بتغنيلوا ايه
و تبقى ليلتك سوده لو مش حافظ الاغنيه اللى هو عاوزها
اوسى بنت عمى . طلباتها عشان تنام غريبه

برضوا مش هييجى كائن فضائى يخلص لك رصيدك من الفون الساعه 2 بالليل
يعنى استحاله تنزل تشحن ابدا فى الوقت دا

برضوا مش هتبقى فى مرة مستنى فون مهم من حد
و ييجى الكائن الفضائى ده يتصل بحد من اصحابه ويشغل الفون لمده 6 ساعات

مش هييجى كائن فضائى و يقولك كلمه تجرحك
بدون مناسبه و بدون سبب ..

مش هييجى كائن فضائى تقوله ابيض ولا اسود
gray يقولك لا

مش هتقوله صحينى بعد ساعتين ضرورى عشان وراى حاجات اخلصها
يسيبك نايم لحد تانى يوم
تقوله ليه سبتنى .. يرد عليك..معلش اصلك كان شكلك تعبان و صعبت على :S

برضوا مش هييجى كائن فضائى على سبيل الهزار و انت لابس و خارج يرش عليك ميه
تقوله ايه اللى عملته ده
يقولك ..بهرج معاك...بتقلبها جد ليه .. و يعمل فيها زعلان:D

research كمان مش هييجى كائن فضائى تعمله
و يكون طالع عينك فيه
و يرد عليك يقولك ..لا اعمله تانى .. اصل انت جايب 8 مراجع بس و احنا عايزين 10

مش هيحصل فى يوم انت تكون عامل حاجه عشان كائن فضائى
و تعبان فيها و مضيع وقتك عشانه
و ييجى يقولك .. يووووة .. عاملها لونها اخضر ليه دنا كنت عاوزة فحلقى ..:S

مش هييجى كائن فضائى و انت فى احلى نومه و بتحلم حلم جميل
يصحيك من النوم
قوم اكوى لى الهدوم اصلى متاخر على الشغل:D

عمر ما كائن فضائى هيبقى عايش حياته عشان ينقضك فى كل حاجه بتعملها
و ييجى بنى ادم تانى يعمل نفس الشىء و يبقى حبيبه اخر حاجه ..:)

مش هتبقى مستنى فون من كائن فضائى و ميتصلش بيك ولا يعبرك

برضوا معتقدش ان فى كائنات فضائيه بتتصل فى اوقات غريبه

معتقدش فى كائنات فضائيه برضوا بتطبخ حلو زى ماما:D

برضوا عمرنا ما هنلاقى كائن فضائى بيحب يقلب فى دولاب هدومك من غير سبب:D

ولا هتلاقى كائن فضائى مواعيده بطاطس زيي كده

ولا كائن فضائى هيجيلك قبل الامتحان بساعتين
يقولك اشرحلى المنهج من اوله لاخرة تانى

ولا هتلاقوا كائن فضائى عصبى من غير سبب..

بقول ايه ..انا جبت اخرى.. اما اروح اعيش مع شويه كائنات فضائيه احسن..:)

انا جييييييييييييت

اخيراا و بعد محاولات عديده فاشله النت رجع
رجع فى البيت بس الكمبيوتر بتاعى مفيهوش نت لسه
:D
وصلت نت هنا بطريقه غريبه كده
و سوون ان شاء الله هنشوف حل للمشكله دى
مع ان ده مش هيبقى فى صالحى عشان وراى بلاااوى لازم تخلص اصلا فى الكليه
و الدكاترة بيطلبوا حاجات غريبه مننا
اول مرة احس ان دكاتره عبرى ارحم حبتين تلاته اربعه
يعنى بجد مش فاهمه ايه علاقه حفله منير بالدراسه الميدانيه
احنا بندرس معالم سياحيه ولا حفلات فاضيه الكليه بتعملها
لا و منعرفش اننا لمفروض نقدم تقارير عنها الا بعديها باسبوعين
و الله بحسهم ناس مجنونه اللى بيدرسونا دول
خلصت بتاع مصطفى قمر و لسه بتاع اللى اسمه منير ده
بقول معملهوش و اذاكر حاجه تنفعنى احسن
فى واحد تانى مدينا مقالات كتيرة المفروض نترجمها مع نفسنا
نصها بيتكلم عن التلوث و النص التانى حوادث فى البحر
طيب و انا مالى و مال الكلام ده
و كتاب تالت بفتحه اول امبارح لقيت المقدمه فيه حاجه و خمسين صفحه
:huh:
قريتها كلها .. مفهمتش حاجه .. و نمت يوميها الساعه 2 بالليل
و مقدرتش اصحى تانى يوم الصبح عشان احضر محاضره الساعه 8
statistics السنه اللى فاتت اختى هند كانت بتاخد ماده اسمها
كنت بفضل اتريق على اسمها كتتتتتتير اوى
مع ان الماده رخمه و كانت هند بتبقى عايزة تموتنى .. خصوصا ليله الامتحان
السنادى مكتوب على اخدها انا كمان
كل سنه كانوا بيدرسوها احصاء بالعربى
statistics دلوقتى بقت
و اروح اسال هند على اى حاجه مش فاهماها
تقعد تدينى محاضره فى الادب و الاخلاق و ان ربنا بيردهالى السنادى :D
الظاهر كده بقيت منحوسه زى صاحبتى
كوكى لو عرفت هتفرح فى اوى
عشان كده مش هقولها :D

ايييييييييييييه
بجد الشهر ده غريييب و ممل و بشع لاكبر درجه
و المواصلات لوحدى بقت كتيرة اوى
دا غير المشاكل اللى مالهاش لازمه فى البيت كل يوم :S
ادينا اهو يوم 17
عايزه الشهر يخلص باى طريقه
حاساه لو خلص ممكن يحصل تغيير
معرفش تغيير فى ايه بالظبط
بس اهو اى تغيير احسن من اللى احنا فيه ده

و كوكى بقى ترجع بيتها و يبقى عندها نت
عشان كده كتير بجد بجد يعنى
و مبتنزلش الكليه الا كل فين و فين
و لما بتنزل و تقعد ببقى انا اجازة
او بيبقى عندى محاضرات
او لازم يحصل اى حاجه يعنى و منقعدش مع بعض
و الله طووول عمرنا منحوسيييين انا و هى
بس هى اكتر حبتين :p
يارب ما تيجى تشوف الكلام ده
بس هى واحشانى و خلاص
و ناس كتيره و الله وحشونى
و من كتر ما وحشونى زهقت اصلا

يلا اهو النت رجع
و مديه لنفسى اجازة اكتئاب فى البيت بكرة و بعدوا (b
statistics بس هنزل بقى الاربع عشان عندى
دا لو كان لى عمر يعنى

ايه الرغى دا كلوا
كفايه كده
تصبحوا غير خير

معنى اخر للكره

مش عارفه بس انا متعودتش انى اكره حد

او حتى انى اشيل جواى من ناحيه حد

خصوصا لما يكون قريب منى

او يكون قريب منى بحكم الظروف على الاقل

بس ساعات ممكن يكون مجرد وجود الشخص ده فى حياتك مضر ليك

ممكن يكون مضر بطريقه لا تحتمل اصلا

ممكن تحاول تصلحه او تخليه يغير من نفسه

لكن هو زى ما هو ولا عايز يتغير ولا اى بتنجان

عايش لنفسه بس

مش بيهمه اى شخص غيرة

المهم هو يكون مبسوط و يتحرق كل الناس اللى حواليه

بس برضوا ساسعاااات كتير بنبقى عندنا كميه كبيره من الغباء

ونفضل متعلقين بأمل بانه ممكن فى يوم من الايام يتغير

او على الاقل .. ميبقاش انسان مؤذى

بس برضوا فى ناس كبتتغيرش و بتفضل زى ما هى

اهو انا دلوقتى جبت اخرى معاه

مش دلوقتى بس .. دا انا جبت اخرى معاه من زمان

بس مش عارفه ليه كنت بحاول اصلح العلاقه بينى و بينه

عشان خاطر ماما بس كانت بتزعل ..:(

بس فعلا لحد كده و كفايه اوى

كفايه اوى اوى اوى

.........................

محمد اسامه يا جماعه باباه تعبان حبتين

ادعوله ربنا يشفيه بقى ..

وادعوا النت يرجع بقى