28 -2 -2008

مش عارفه بقى بس اهى مواقف و بتحصلى و انا راكبه مواصلات و خلاص
طبعا ساعتين كل يوم مواصلات بس ..طبيعى جدا هشوف حاجات غريبه
يمكن متكونش غريبه ولا حاجه .بس انا اللى شايفاها غريبه

النهارده ركبت ميكروباس ..اللى بيروحوا من السابع للعباسيه دول
العباسيه ..!! ايوة العباسيه اصل انا بعيد عنكوا جامعه عين شمس
صحيح بمناسبه كلمه "عين شمس" من كام يوم كده كان الجو شويه حر و شويه برد
كنت متضايقه من الجو الغريب ده .. يعنى اللى عايز يجيله برد يخرج فى الجو ده ..
و اهو جالى برد .. و زمان محمد فرحان فى ..
يوووة مش ده موضوعنا دلوقت..المهم..
لما كنت بقول لواحده صاحبتى الجو شويه حر و شويه برد .. هو ايه اللى احنا فيه ده
قامت ردت على و قالت لى" تصدقى ليهم حق يسموها عين شمس .."
مفهمتش هى قصدها ايه طبعا ..
مش عارفه ده غباء ولا لانها بتقول حاجه ملهاش علاقه بالموضوع اصلا ..

و نسيت اسالها تقصد ايه ..لو حد فهم يقولى

مش ده موضوعنا الاساسى على فكرة
المهم كان قاعد جنبى واحده حاجه كبيره كده و بتاكل لب ..
و انا بكرة ريحته بجد بجد بجد يعنى بطريقه بشعه..
خييير ..
و قاعد وراى واحد عمال يكلم السواق و صوته عااالى فى ودانى..
اهو الراجل ده عسكرى و بيفتخر بانه عسكرى ..
بيقول للراجل..

" دول بيعاملونا زى الزباط بالظبط و بيحترمونا و كل حاجه قشطه"

هو على فكرة اللى بيقول زباط مش انا .. .. بس قشطه دى من عندى ..
مفهمتش هو الراجل يقصد ايه يعنى بانهم بيعاملوهم زيهم
بس اول حاجه جات فى بالى ..طيب يا عم طالما بيعاملوك حلو كده
امال روكا كارة الجيش ليييه ..

هتقولوا مين روكا .. اهو كائن حى ياكل و يشرب .. و يارب ما يدخل و يشوف الكلام ده ..
اصله بقى مفترى اليومين دول..

بمناسبه كلمه دول .. دكتور احمد نافع تقريبا نص كلامه فى المحاضره فيه كلمه "دول"
الكلمه دى بيقولها فى اى جمله و فى اى ظرف و فى اى مكان و فى اى بتنجان
لدرجه انى لما بقيت اسمعها بقيت افتكرة ..
ربنا يحفظه .. من القلائل المحترمين فى الجامعه ..

فعلا كمان بمناسبه انى دخلت سبع مواضيع فى بعضها دلوقتى ..
من الواضح انى عايزة انام ..
مع انى نايمه امبارح من 2 بالليل لحد 9 الصبح
يعنى نوم كويس بالنسبه لكائن مجهول الهويه .. اللى هو انا يعنى

المهم الراجل العسكرى اللى مبسوط بنفسه
بيحكى للراجل اللى بيسوق بيقوله..

"الحياه ملل ملل ملل .. ملل ملل ملل ..
اكل و شرب و نوم و خلاص على كده
يوم الجومعه بقى اللى هو الاجازة .. بروح البيت بتفرج على التلفزيون
اهو حاجه ترفيهيه الواحد يعملها بدل الملل اللى الواحد فيه "

هو برضوا اللى بيقول الجومعه .. مع تعطيش الجيم فى كل الكلام و فتح تاء تلفزيون
ولكم ان تتخيلوا ..
مش عارفه بس حاسانى عماله بتريق على الراجل و هو معمليش حاجه ..
وربنا هيجيبلى حد تانى يتريق على ..

المهم شويه و الراجل سكت معرفش نام ولا ايه..
المهم خلصنا منه
ببص على طنط اللى كانت بتاكل لب و سودانى و فاتحاها بتاع لب و سودانى
هو اسمه ايه صحيح الراجل ده ..؟؟ اللى بيبيع لب و سودانى ..
المهم .. لقيتها نامت ..

و فجاه صحيت على صوت واحد بيزعق و بيتكلم فى الفون ..
"كده يا عصام .. بقى هو يعنى كده يا عصام .. "

بصراحه من صوته و نرفزته كنت هموت و اعرف عصام عمل ايه ..

"بقى احنا متقفين على كده يا عصام .. مش عارف اقولك ايه يعنى يا عصام .. "

باين عصام ده كان عامل مصيبه ..
و انا لسه هموت و اعرف هو اللى اسمه عصام ده عمل ايه..

" مش انا قلت لك يا عصام هرن عليك.. و انت ترجع ترن على يا عصام "

تصدقوا طلع بيهزقه عشان فتح عليه ..

بعديها كنا على كوبرى و شفت فلفله ..
"لى فيه شويه زكريات حلوة المطعم ده "..
و نزلنى اخر الكوبرى عشان انزل امشى من العباسيه لحد الجامعه ..
و اروح اسلم على صوحابى فى تل ابيب ..
و اطلع المحاضره اللى مدتها 3 ساعات بالطول و العرض ..
بخرج منها بحس انى كنت محبوسه فى سجن فدرالى ..
و الدكتور بيدى statistics و انا مبحبش الماده ده اللى كلها بنقعد ننقل فى ارقام كبيرة
ونضرب و نجمع و نرسم حاجات غريبه ..
ماده ممله اخر حاجه .. >_>
واهو بقالى اسبوعين مبحضرهاش ..
و شكلى فى الاخر هخلى محمد يشرحهالى و ادخل امتحن و انجح ان شاء الله

صاحيه من 9 الصبح .. و الساعه بقت واحده و نص
و المفروض اصحى 7 ونص الصبح
المفروض انام بس مش جايلى نوم ..
قاعده من الساعه 9 على المكتب و خلصت حاجات كتيرة كانت عايزة تخلص
و مرهقه اخر حاجه ..بس مش جايلى نوم ..

هقوم اعمل اى حاجه و احاول انام ..بدل ما اروح بكرة تعبانه و هى مش ناقصه تعب اصلا
ده غير البرد اللى مش راضى يروح من عندى ده ..

صحيح دلوقتى

يعنى الكلام ده كلوا حصل يوم 27 سنه 2008
2008
2008
2008
ايه ده هو احنا بقينا خلاص 2008
يعنى ايه
2008
سنه 2000 كانت قريبه اوى
و 2005 كمان كانت قريبه
عمرى ما فكرت ان ممكن 2008 تعدى على من غير بابا
هو نفسه مكانش يعرف انه مش هيشوف 2008
ولا هيشوف 2009
ولا هيشوف 2010
ولا حتى 2011
ولا هيشوفنى لما انجح السنادى باذن الله
ولا هيشوفنى يوم ما اتخرج
ولا لما اخد الماستر
ولا حتى و انا لابسه الفستان الابيض
ولا اى حاجه خلاص بقى ..
يلا اهو جالى سبب انى انام .. مبعرفش اعيط الا على المخده ..اللى زهقت منى..
و كل ما اروح البيت التانى بنسى اجيب المخده اللى بحبها
بكرة المخده اللى هنا .
بس بحب بابا ..

الحمدلله ..الحمدلله

تصبحى على خير يا روز ..
وانتى من اهله يا روز ..

نفسى الساعه 9 و نص متعديش على بكرة ..
و نفسى اسمع دلوقتى صوت حد بحبه .......................


28 -2 -2008