شفت الفرحه فعينيا
لما ايده لمست ايديا
عيون تعشق من غير كسوف
و خدود احمرت من كتر الكسوف
و الدنيا قالتلى اديكى من تانى
ابتديتى حلم زى الاولانى
لا فرحه هتكمل
ولا حزن هيخلص
وابتديت ابعد عن حلم عشت سنين اتمناه
و اقول يا تكمل... يا تسيبنى من غير مهواه
الاقيه بيقرب بيرسملى بكرة وياه
و يقولى انا ليكى ..ولا بعدى دى تبقى حياه
واحلام ترفعنى لفوق
و هموم تشد لتحت
وقلبى يرجع يبكى من فرحه
لا هى هتكمل ولا انا سبتها تعيش
22 comments:
ايه الفن ده
هو انتم بتعرفوا تكتبوا الكلام ده ازاى !!!
اولا : الطريقه منمقه اوى ماشاء الله عليكى
ثانيا:مافيش حاجه تستاهل والله يا بنتى :S
الله الله
دا انا بقالى منافسين وجامدين كمان اهو
بجد ما شاء الله
انا شايف تغير كبير قوى فى الكتابه هو اظاهر كده انتى عايشه حاله نفسك تكتبى عنها وفعلا طلع كلام جميل وبسيط
كلامك جميل جدا ويا رب تكون حاله بس ليه مش تكمل لو فى امل امسكى فيه وكملى وربنا معاكى
مين عارف
مش يمكن تكمل المره دي؟
بسيط وجميل
تحياتي
والله جميلة
بس ان شاء الله ميكونش زى الاولانى ويكون احسن
وان شاء الله الفرحة تكمل
عايزه اسألك سؤال ومكسوفه اوى
catroz
معناها ايه؟
معلش بقى
جميله ومعناها رائع
فكره جديده بطريقة جديده
تحياتي
:huh:
riri ..
و الله ده من بعض ما عندكم يا ريرى ..:D
mona@asr elgnoon...
مبسوطه بجد انها عجبتك ..
بس تعرفى
الغريب ان طلع فى فعلا حاجات تستاهل
فى حاجات فعلا تستاهل فى الدنيا دى
للأسف ..
...:)
blue wave ..
منافسين ايه بس يا فندم ..
احنا منجيش حاجه جنب حضرتك ..
منورنى يارب دايما ..
romansy ..
الاسلوب اتغير ازاى ..!!
هو انا عموما مش بكتب حاجه الا لما اكون حاساها ..
مش لازم اكون انا جوة التجربه دى
بس حاجه احس انها بتمس حاجه جوايا
و دى فعلا بتمس حاجه جوايا اوى ..
مشمشه ..
فى امل دايما ..
ربنا يسهلها بقى ..:)
esraa ..
فعلا
و ليه متكملش المرادى ..
!!
حاول تفتكرنى..
اسمك بيشدنى دايما اوى
منورنى ..:)
Sometimes ..
يارب :D..
بصى يا بنتى ..
roz ..دى اخر 3 حروف فى اسمى ..
او اسم الدلع
اما cat ..فدى جايه من قطه
كات يعنى ..اصلى بحبهم ..
كمان لقب عيلتنا " القط" فهتلاقيها جايه فى كل حته :D
و بعدين يا بنتى مش تتكسفى
اسالى اى حاجه انتى عاوزاها ..
white heart ..
مبسوطه انك حبيتيها ..
تحياتى لكى ايضا ..:)
dead man ..
منور يا ديد ..:D
واحلام ترفعنى لفوق
و هموم تشد لتحت
وقلبى يرجع يبكى من فرحه
لا هى هتكمل ولا انا سبتها تعيش
--------------------------------
عجبني الكلام دا اوي
بس ليه كدا؟؟؟
ليه بتحكمي ع الحلم دا انه زي الاولاني؟؟
ليه مفترضه سوء النيه؟؟
عاندي.. اضحكي للدنيا.. بصي علي نص الكوبايه المليان
وربنا معاكي
دمتي مبدعه
تحياتي
hager za3bal ...
مكنتش شايفه غير النص الفاضى
بحاول اهو اشوف النص المليان ..
Post a Comment