Sunday, April 20, 2008

حاجه مالهاش لازمه من غيره ..


عمرى ما كنت ببقى مقتنعه ان الواحد ممكن يحس بكذا احساس فى نفس الوقت

خصوصا لو كانت احاسيس عكسيه

كرة .. حب ..خوف ..لا مبالاه ..اهتمام .. كسل ..نشاط

تبقى عايز تموت فى اقرب فرصه

و تفكر ان فى حاجات حلوة اوى موجوده عشان تعيش عشانها

ممكن تكون بتكرة حد و تقول انا اول ما اشوفه هقوله كده

و اشوفه و اقوله انا بحبك اوى على فكرة و اقول عكس ما كنت عاوزة اقول

و بعد ما يمشى اخبط راسى فى الحيطه عشان افوق و افهم هو ايه اللى حصل دلوقتى ده

برضوا مبفهمش هو ايه اللى حصل

انا بكرهك اوى .. فى نفس الوقت انا بحبك

ممكن انسان انت مش قادر تعيش معاه ..مش عاوزة موجود فى حياتك

بيه انت تعبان اوى ..فى وجوده انت حتى مش عارف تتنفس

وفى غيابه انت بتموت ..لانك برضوا مش قادر تعيش من غيرة

مش متخيل بكرة ده يعدى عليك و انت مش معاه

بس اهى الايام بتفضل ماشيه .. و بنرجع نقول الحياه مبتقفش عند حد

و الله ما بتقف عند حد ..ما هو الناس اللى بنحبهم بتروح

ايه اللى حصل يعنى

بننام و نصحى و ناكل و نشرب و نتنفس

يمكن التنفس بقى نفسه صعب

يمكن بكرة مبقاش وردى زى ما كان

بس الحياه موقفتش

الوانها اتغيرت ايوة ..بس احنا لسه عايشينها

النهارده السبت و بكرة الاحد و بعده الاتنين

مفيش يوم طار فى النص

ساعات بتبقى البديهيات حاجات صعبه اننا نفهمها

صعب نفهم ان 1 +1 =2

صعب نفهم ان الابيض لون و الاسود ده لون تانى خالص

لو حطيت رجلى فى البحر هتتبل من الميه

برضوا لو حطيت ايدى فى النار هتتحرق

و اى قرار بتاخده فى حياتك انت ده يبقى على مسئوليتك

حتى لو ضربوك على ايدك عشان تتخذ القرار ده .. بكرة لما يحصل حاجه

هتطله انت اللى غلطان..فى حق نفسك و فى حق غيرك

بس فى حق نفسك اكبر

دى حياتك انت مش حياه واحد ماشى فى الشارع

و الرجاله خلصوا من البلد

و الله الجمله دى بجد

كل كام ميت واحد هنلاقى فيهم راجل بجد .. ده لو لقينا اصلا

ده بقى البنى ادمين يثيروا اشمئزاز الواحد بطريقه عجيبه بجد

و احنا و بعد كل اللى حصلنا برضوا هبل زى ما احنا

الايام بتكرر نفسها و احنا سامحين لنفسنا نغلط زى الاول

بنفوق متاخر اوى .. و نرجع ندخل تانى فى غيبوبه

حياتنا اصلا بقت عامله زى ما تكون غيبوبه دخلنا فيها و مش قادرين نخرج منها

حاجات كتيرة اوى مكتفانا بدون سبب و مش قادرين نعمل حاجه بايدينا

ممكن تكون بتحب حد .. من كتر ما بتحبه و تخاف عليه و تقربه منك

تخليه يستنشق الزفير بتاعك

تبقى بتموته من خوفك عليه

تكون بتحب حد و نفسك تعيش معاه حياتك كلها بكل ايامها الجايه

بس انت بتحلم بس .. انا مش ليك ولا عمرك اصلا كنت لى

و حتى لو احنا لبعض .. كل شىء فى الحياه بيبعدنا عن بعض

كل شىء بمعنى الكلمه

الاهمال بقت عاده عندنا .. مبنعملش اللى ورانا الا لما يكون الوقت فات

طيب و انت كنت فين من بدرى .. انا كنت فى غيبوبه و فقت منها لحد ما اخلص اللى وراى

و هلحق اخد مكانى تانى فى الغيبوبه لحسن حد ياخده بدالى

تبقى مذاكر و طالع عينيك و جايب مقبول

مش بالذمه ده ظلم .. و واحد تانى فاشل ملهوش فى البتنجان

جايب تقديرات احسن منك

اول سنه ازعل ان حد قريب منى جايب تقدير اعلى منى

اصلى كنت بذاكرلوا

يعنى الواحد لو عاش لوحده و عايش لمصلحته بس .. الحياه عنده هتتحسن

لو خفنا على غيرنا و اهتمينا بيهم .. يبقى بنضيع وقتنا و جهدنا عالفاضى

و الله زمايلنا بتوع مصلحتهم بس هما اللى جايبين تقديرات

بس انا مش كده .. و عمرى ما كنت كده .. و عمرى اصلا ما هعرف ابقى كده

محدش ربانى انى ابقى كده .. متعلمتش ابقى لمصلحتى و بس

هنتعلم امتى بقى منبقاش هبل فى التعامل مع الكائنات اللى بنتعامل معاها دى

بجد الناس مبقوش ناس .. و الله دول بقوا وحوش اصلا

وانا مش فاهمه ايه ذنبها البنت تتحط فى الظروف دى

باباها و مامتها كل واحد عايش حياته مع نفسه و هى اتفعصت فى النص

و الله ما بقيت اسمع صوت ضحكتها

و حتى لو سمعتها بتبقى مخبيه دموع .. ولا بتضحك بسخريه على حالها

ولا ضحكه بتقولى فوقى يا روز .. يعنى بعد كل اللى حصل ده و فاكرة الدنيا لسه وردى

زمان كنت بعرف اقنعها ان لسه فى حاجات حلوة تعيش عشانها

دلوقتى بسكت .. مبلاقيش كلام يتقال

هقولها ايه يعنى .. هتعبها اكتر مما هى تعبانه اصلا

و الله مكانت احلامها وهميه ولا مستحيله ولا حاجه

بسيطه اووووى .. بس بقت شبه مستحيله

تحب واحد و تكون مخلص ليه بكل الطرق... يجى يبيعك بارخص تمن

حاجه تكون فى ايدك و ملكك .. متحسش بقيمتها الا لما تروح منك بلا رجعه

تاخد قرار مصيرى فى حياتك .. و بدون حتى انك تفكر ايه نتايج القرار ده

و بعديها بسنه تكتشف انه قرار تافه غلط ..بس غير حياتك لطريق تانى خااالص

بنرجع تانى لنفس نقطه

بعشقك و مقدرش اعيش من غيرك ... بس بوجودك انا بموت

رحمتك بينا يا رب .. مش عايزين ننجرح تانى من اقرب الناس لينا

مش عايزين نفوق متاخر من الغيبوبه

عايزين بس حياه بسيطه .. ندخل بيها الجنه

حياه نكون راضيين بيها

مش عايزين تعبنا يروح تانى على الفاضى

لسه فى حاجات كتيرة اوى جواى .. بس مبقاش فى كلام يوصف اللى جواى ايه

Monday, April 07, 2008

ونجحنا ..

سفاح كرمووز نجح اخيرااااااا

مش عارفه دى بقى معجزة حصلت ولا ايه ..:P


بس بجد انبسطت اخر حاجه لما عرفت الخبر

واول ما عرفت ادخل على النت اهو قلت لازم اعمله بوست و اقوله

مبروووووووووووووووووووووك

مبرووك يا مشمش بجد و عقبال الترم التانى

و السنه الجايه كمان ان شاء الله تعدى على خييير

و مع انك فى اخر الامتحانات كنت تعبان

بس اهى جات سليمه و الحمدلله

....................

انا كمان نجحت على فكرة

و صاحبتى كوكى كمان نجحت

باركولنا بقى ..

و ادعوا لمحمد اسامه كمان

عشان نتيجته لسه هتظهر اخر السنه ..



Tuesday, April 01, 2008

سهل عليك تكدب

هو بقى سهل ان الواحد يكدب للدرجادى

يكون الموقف حصل قدامى

و ييجى يحكيه تانى و انا موجوده و باختلافات جوهريه

يعنى ممكن يكون عبيط مثلا و بينسى

ولا خياله واسع و بيخليه يشوف حاجات تانيه

ولا عشان عاوز يصور شىء معين للشخص اللى قدامه

بس دا يتسمى كدب .. مش حاجه تانيه يعنى

بس معتقدش يكون عبيط .. ده واحد عاقل عنده 30 سنه

برضوا خياله مش واسع .. لو خياله واسع يبقى فى كل حاجه

زهقت منك على فكرة و مش شخصيتك بكل ما فيها من سيئات و حسنات

عمرك ما تتصور انا قد ايه بتمنى انك تخرج من حياتى

ماضيك بحاضرك ... و عمرى ما هندم فى يوم لو امنيتى اتحققت


عارفه انك مش هتقرا البوست دا

بس اهو كلام قلتهولك قبل كدا و بعيدوا تانى مش اكتر