Tuesday, December 30, 2008

Friday, December 26, 2008

امبااارح ...



امبارح سمعت صوت حد بحبه

امبارح جرينا تحت المطرة

امبارح سمعت كلمه قبل امتحانى خلت خدودى تحمر

امبارح كنت بردانه اوى

امبارح كانت ايده دافيه اوى

امبارح اكلنا سوا

امبارح شربنا شويبس كريم صودا برضوا سوا

امبارح غنيينا سوا

امبارح لعبنا كورة بكانز ..سوا

امبارح كملنا باقى تهييس اول امبارح... برضوا سوا ..

امبارح شفت نظرة بحبها

امبارح كان يوم عادى بس برضوا غيرعادى

امبارح يوم مش هيتنسى

امبارح يوم ساب علامه كبيرة فى قلبى ..

25-12-2008

ده كان امبارح ..

***

عارفه ان فى كلام اتكتب فوق هيتفهم بطريقه خاطئه ..

مش هوضح و هسيب كل حد يسرح بخياله شويه

بس امبارح كان يوم عادى اوى اوى اوى

بس "الاشخاص" اللى كانوا فيه خلوة يوم غير عادى

...:)

Tuesday, December 16, 2008

Monday, December 08, 2008

عيد تانى من غيره ...





اولا كده ...

كل سنةةةةةةةةةةةةة و انتوا طيبيييييييييييين

و ياااارب يكون عيد سعييييييييييييد عليكم كلكم يااارب ..

****
مش عارفه هو فى ايه .. بس مش نافع بجد

هو لازم كل عيد يبقى عامل كده ولا ايه ..

مش مقتنعه ان فى حاجه اسمها عيد من غيرة ..

"يا روز انا و الله هعوضك عنه ..هكون لك كل حاجه ....."

الكلام وجعنى اوى .. و اول مرة توجعنى بالشكل ده كلمتين زى دول ..

عارفه كان قصدك تريحنى شويه بس وجعتنى اوى ...

معلش .. انا عارفه انك مكنتش تقصد ..:)

واقفه الصبح فى البلكونه مستنيه اسمع صوت بابا ..

انا عارفه انه مش راجع .. بس بتعدى لحظات غصب عنى لحد دلوقتى بستناه فيها ..

اتاخرت على البيت .. مستنياه يكلمنى يقولى انتى فين ..

ولا يصحينى الجمعه الصبح عشان افطر معاه

عدى كتير ... و لسه بستنى ..

ساعات ببقى نفسى انسى ... و ساعات ببقى خايفه اوى انسى التفاصيل البسيطه دى ..


Monday, December 01, 2008

But I do love U ..






All our lives we search for someone to love

Tuesday, November 18, 2008

broken..







I wanna hold you high and steal your pain away

...:'(

Wednesday, November 12, 2008

La5btation..







مبقتش عارفه هو فى ايه ولا المفروض الواحد يعمل ايه

حاجات كتيرة اوى بقت داخله فى بعضها

حتى الاولويات اتغيرت بسبب اللى بيحصل

الاحلام اللى بنبقى راسمينها و نفسنا نحققها كمان اتغيرت

ساعات بتبقى احلام عبيطه و احلام تافهه ..بس ليها معنى كبير اوى للواحد من جوة

طيب و ليه مبقاش عندنا حاجه اسمها وسط

طبيعى اوى انك لو بتحب واحد و رحت قلتله انا هتجوزك وش كده

هيخاف و يتخض و يرتبك

ومش بعيد يجراله حاجه من الجمله اللى اتقالت

هى جمله .. بس نغمها على مسمعنا كبير اوى ..

هو ليه دايما متسرعين

طيب هو ينفع تقول الجمله دى لواحده ماشيه فى الشارع كده

البنت هتفتكرك بتعاكسها و مش بعيد تهزقك و تمشى

و يمكن انت بتكلمها بجد ..بس هتتفهم غلط بكل الطرق

كل حاجه لما ندخل ليها اسلوب

زى ما لكل انسان ليه عاداته و تقاليده

مينفعش انى اغيرها عشان حد ..حد لا يعنى لى شىء ..

فى حاجات فعلا مينفعش ييجى حد و يقولك غيرها

اصل انا تربيتى كده و اهلى علمونى كده من و انا صغير

زى ما تكون جاى تقولى غيرى اسمك مثلا

وهو انا هغير اسمى عشانك بتاع ايه

انت مين اساسا

فى نفس الوقت ممكن نغير حاجات جوانا عشان شخص بنحبه

و من غير ما حتى يطلب التغيير

لكن بحدود ..

لما اتنين يكونوا متجوزين مثلا ..

و هو يقول لمراته انا بحبك

و متردش عليه

تفتكروا هيقولها قوليلى انا كمان بحبك ..

حتى لو طلب منها تقولها ..هيبقى طعمها بارد اوى

بعيدا عن ان اصلا لما تقول لحد بحبك و يقولك و انا كمان بحسها بارده

متتردش عليها ب و انا كمان ..

لا لو بتحبه فعلا هتلاقى غصب عنك الكلمه اللى بتقولها ترد بيها عليه

اقوى شويه من كلمه"بحبك" مش كده ولا ايه

هو احنا قتلنا ليه الدفء اللى فى حياتنا

ليه الناس مبقتش تحب بعضها زى الاول

تتمنى الخير لبعضها

دا حتى الاخوات ..اللى من لحم و دم واحد

بنلاقيهم ساعات بيتمنوا حاجات سيئه لبعض

..اختى الكبيرة ..ساعات لما بقعد افكر انا بحبها قد ايه بلاقى عينى بتدمع

زى دلوقتى كده

مجرد ما بيخطر على بالى كميه الحب اللى جواى ليها و ابتدى احس بيه

عينى بتدمع غصب عنى

نوع من الحب فعلا الواحد مبيقدرش يحتفظ بيه جواة

بنتخانق و نزعل من بعض و تحصل مشاكل

بس مهما كان فعلا بحبها

مبعرفش اخليها تنام يوم زعلانه منى

و لما تبقى تعبانه و انا مش عارفه اعملها ايه بتمنى فعلا انى اكون انا اللى مريضه

مش هيا

يمكن بيبقى اهون على اكون انا اللى تعبانه بجد مش هى ..

تخيلوا انى بحس كده ناحيه اختى

والاقى بنت زميلتى تقولى انا بكرة اختى و بكرة بابا و بكرة ماما

فعلا مبقتش اعرف ارد عليها

انتى مش عارفه قيمه اللى معاكى

مش هتحسى بيه الا لما يضيع منك

مش هتحسى بقيمه اسرتك الا لما ينقص منها واحد

مش هتعرفى يعنى ايه ليا اخت كبيرة تخاف عليا

قاسيه ساعات ...بس يكفينى انها بتفهمنى من نظرة

اب... تترمى فى حضنه و تبكى

و كفايه لما تبقى ايده دافيه تمسح دمعه من على خدك

ام ...بتعمل المستحيل عشان ترضيكى

و كفايه اصلا دعواتها اللى من القلب ..

الناس فعلا بقت وحشه

مبقتش تعرف تقدر اللى فى ايديها

وناس نعاملها كويس نلاقى الرد على معاملتنا الكويسه دى بمعامله سيئه

ولما نعاملها اسوأ ما يمكن ..نلاقيهم بيعاملونا اسوأ ما يمكن

بس انا مبعرفش اعمل كده

ما هو انا يا هعاملك كويس يا هعاملك وحش

مش هينفع ابقى بتعامل وحش لانى عارفه ان المقابل كويس

و اخاف اعمل حاجه كويسه لترجع تانى تعاملنى بطريقه سيئه

غريبه بجد

و الاغرب .. ان فعلا فى ناس كتيرة كده

مبقتش عارفه دا مرض ...ولا فراغ عاطفى

بس اعتقد هو فراغ عاطفى

وييجى اتنين بيحبوا بعض

هى فاهماه و هو بيفهمها كويس

بتطمن فى وجوده و هو مبيشوفش غيرها مطمنه قلبه

هو مبسوط لانه لقى حب حقيقى و هى نفسها تكمل حياتها جوة قلبه

متشابهين فى حاجات كتيرة اوى

وبيحبوا بعض اوى

لا هو ينفع يكون غير ليها ولا هى ينفع تكون غير ليه

و دى وجهه نظرى عنهم ..ان لم تكن وجهه نظر كل الناس اللى يعرفوهم

تعرفوا ان ممكن ييجوا يقروا الكلام ده و يقولوا لا دى روز جايه توقع ما بينا ..

ولا روز بتقول علينا كلام وحش ..

مع العلم .. انى اول مرة اتكلم عليهم ..سواء مع حد او حتى مع نفسى ..

بس نقول ايه ..ربنا يهدينا جميعا ..

الناس بقت تتغير بسرعه اوى

تغير تعاملاتها بسرعه اوى

تزعل من حد و تتغير ناحيته

زمان كنت اعرف امسك اى حد زعلانه منه و اقوله انا زعلانه من كذا و كذا

و يفهمنى عمل كذا ليه و عمل كذا ليه

و يايطلع غلطان و يتاسف

يا طلعت انا اللى فهمته غلط و خلاص قلبى يصفى من ناحيته

بقالى فتره مبعرفش اعمل كده

ببقى متضايقه من حد و مبعرفش اتكلم

بلاقى تعاملى اتغير معاه و مببقاش عارفه ارجعه زى الاول

حتى مبقتش عارفه الوم حد عمل حاجه عاللى عمله ..

كتير اوى بلاقى نفسى "اكتفى بالصمت" و خلاص على كده

انا عارفه ان ده مش صح

بس حاسه انى مبقتش اعرف اكلم حد و اشرحله حاجه و افهمه زى الاول

ساعات الناس القريبه منى بتفهم انى زعلت ...

و مش عاوزة اتكلم و بييجوا يفهمونى ايه اللى حصل

طيبو لو شخض مش عارفنى كويس .. و فجاه قلبت عليه

هييجى يقول البنت دى غريبه

او بحالات

او اتجننت

ده لمجرد انى غيرت معاملتى و مش فهمته ايه السبب

و هو هيبقى شايف انى غيرتها بدون سبب

مش ذنبه حاجه

انا اللى المفروض ارجع زى الاول

بس مش عارفه ..

نشكى الزمان و العيب فينا ..

بقى دا اللى بيحصل .. مش كدا برضوا

بنت تروح تقول لشاب انها بتحبه

انا مش عارفه هى اصلا جابت الجراه منين انها تقول

ومش عارفه هى ازاى اصلا سمحت لنفسها

ولا ازاى الفكرة جات على بالها انها ممكن تعملها

مش عارفه اسميه دا هبل و لا عبط

ولا استهبال ..ولا غباء

بجد كان نفسى امسكها افعصها فى ايديا البنت دى

بس برضوا ."اكتفيت بالصمت" كالعاده

اصل هرد عليها اقولها ايه

انتى المفروض بنوته و البنت ليها حياء

ولا دى حته بتتدخل فى الكرامه بتاعه البنت ..

ولا ايه بالظبط

مكنتش عارفه ارد فعلا ..

ربنا يهديناااا جميعااا

حد ييجى ينصع و يساعد

يلاقى اللى بينصحه يقولك ملكش دعوة بيا

انا حر فاللى بعمله

و هما اصحاب

دا انت حتى لو مش متقبل كلام صاحبك اسمعه لحد الاخر

بس لاء .. احنا لازم نقلب على الوش التانى

و نطلع شرير جوانا عشان الناس تعرف اننا مفترسين

و يخافوا مننا

و يمكن نكون اصلا اضعف بنى ادمين فى الكون

طيب من جوة و غلبان اوى بس خايف دا يظهر

اصل الناس لو عرفوا انك مش شرير وطيب..هيفترسوك

و نرجع نخبى دمعنا تحت ضحكتنا ..

نضحك بصوت عالى عشان محدش يسمع المنا

بس بيبقى باين اوى اننا بنتالم

باين اوى بننا بنحاول نخبى جرح جوانا

فاكرينه مستخبى ..لكن واضح زى الشمس

بنخبيه عشان بنخاف نسمع من حد كلمه

"انت انسان كئيب"

فعلا مبحبش اسمعها من حد

مش بتقبلها بصورة جيده

انا كئيب ..!! لالا انت اكيد بتتكلم عن حد تانى ..

اصل انا مش كئيب

انا مبسوط اهو

و الضحكه على وشى اهى ..:)


Thursday, November 06, 2008

حلم زى الاولانى





شفت الفرحه فعينيا

لما ايده لمست ايديا

عيون تعشق من غير كسوف

و خدود احمرت من كتر الكسوف

و الدنيا قالتلى اديكى من تانى

ابتديتى حلم زى الاولانى

لا فرحه هتكمل

ولا حزن هيخلص

وابتديت ابعد عن حلم عشت سنين اتمناه

و اقول يا تكمل... يا تسيبنى من غير مهواه

الاقيه بيقرب بيرسملى بكرة وياه

و يقولى انا ليكى ..ولا بعدى دى تبقى حياه

واحلام ترفعنى لفوق

و هموم تشد لتحت

وقلبى يرجع يبكى من فرحه

لا هى هتكمل ولا انا سبتها تعيش


Monday, November 03, 2008

"Allah knows"




When you lose someone close to your heart

See your whole world fall apart

And you try to go on .. but it seems so hard

" Allah Knows"


Friday, October 31, 2008

ممنوع من ........السقوط





صاحى من النوم 6 الصبح مراتى بتسمع ميتال

و فى بطنها بيبى فى الشهر التامن

خرجت وتحت يافطه ممنوع الوقوف ركنت العربيه

و نزلت ب ايس كاب و شورت دخلت الشركه

من غير لا سلام ولا كلام دخلت على المدير

اخدت القهوة من على مكتبه و شربتها

ساعتين و نزلت ركبت عجله

ركب وراى 3 بنات

ركنتها و دخلت الكافى

طلبت واحد شاى و اتنين نسكافيه

خرجت من غير ما ادفع الحساب

ركبت العربيه .. و مشيت عكس الطريق

العربيات وقفت وعديت انا

و ادوهم مخالفات و انا اخدت تحيه

الساعه 12 بالليل لبست نضارة شمس ..لزوم الشمس طبعا

و لبست البدله عشان نازل البحر

قعدت مكان العريس و صاحبتى مكان العروسه

بس عجبتنى العروسه و اخدتها نتمشى على الشط...لحد الفجر ...

و رجعت البيت لقيت مراتى و ابنى عنده 30 سنه

ببص فى المرايه لقيت راجل عجوز

ضيع عمره فى الممنوع .. من السقوط طبعا

***

البوست دا بشير بيه الى شىء معين

اللى فهمه كويس .. اللى مفهموش يبقى كل سنه و هو طيب بقى :D

Tuesday, October 28, 2008

Tuesday, October 21, 2008

الف شارى ..





تفتح مزاد ع الحب تلقى الف شارى

Sunday, October 12, 2008

يارب ..





اللهم يا رب العالمين اغفر لأبى فى المهديين و اخلفة فى عقبة الغابرين

و اغفر لى و لة يا رب العالمين و افسح لة فى قبره و نور لة فية

اللهم ان ابى فى ذمتك و حبل جوارك

فقة فتنة القبر و عذاب النار و اغفر لى و لة و للمؤمنين

يوم يقوم الحساب

Wednesday, October 08, 2008

I Miss u ya Momo ..




I miss you like crazy

Even more than words can say

I miss you like crazy

Every minute of every day

I miss you like crazy ya Momo..

****

all my books 3aleeha this song

ganbha heart gwah ur name

i miss u "aweee"

miss all the things that we do

our talk .. or just smiling

i miss u but i dont know what to do

i just cant stand anymore
without u

("V")

Saturday, October 04, 2008

وبتاخدنا الايام ..






بقالى كتير مش عايزة اتكلم

مش عايزة اتكلم فى حاجات كتيرة اوى

بكتب كلام تانى مش عايزة اقوله

خايفه اتكلم عليه

خايفه افتكر قد ايه انا محتاجه وجوده

يرجع الالم يحتل قلبى تانى

ترجع عيونى تالمنى من كتر الدموع تانى

و برضوا خايفه انساه

انسى تفاصيل بسيطه عشتها وياه

انسى قلبه اللى كان حنين

ولا ازاى حضن ايده كان دافى

ولا نظرة عيونه اللى كانت تطمن

انسى ليالى سهرناها سوا

ولا حتى انسى كلمه سمعتها منه

خايفه يوم يحس بضعفى

يسمعنى بقوله اهوااك

و ارجع الوم قلبى

اللى حبه و داب فى هواه
..

Tuesday, September 30, 2008

عيد سعييييييييييييد ..

هكتفى بس انى اقولكوا عيد سعيييد
عشان لو اتكلمت هتقلب بنكد
كفايه بجد ان الواحد لا حاسس برمضان ولا بعيد ..
عموما يارب يكون عيد سعيد عليكم
و تشوفوا الناس اللى بتحبوهم كلهم
و لو مخاصمين حد صالحوة
و لو زعلانين من حد خلوا قلوبكوا بيضه بقى
الدنيا حلوة ..:)

Sunday, September 28, 2008

RamadaN KareeeeeM





ياااه .. فجاه كده بقى باقى على رمضان يومين و يخلص

الشهر اللى كلنا بنستناه من السنه للسنه

اول مرة استمتع بالطريقه دى فى صلاة او سجده

او حتى و انا بدعى ربى

و كل سنه بنقول كده .. و بتبقى السنه اللى بعديها احلى

وبعدين نرجع ندعى الرب

اللهم اذقنا حلاوة الايمان

يا الله

انك عفو تحب العفو فاعفو عنا

يا الله

ارحمنا و اغفر لنا ذنوينا

يا الله

استجب لدعائنا

يا الله

اجعل القران ربيع قلوبنا

يا الله

ثبتنا على دين الاسلام

يا الله

ارضى عنا و عن اهلنا

يا الله


انصر امه المسلمين

يا الله

تقبل منا صيامنا و قيامنا

يا الله

اعتق رقابنا من النار

اعتق رقابنا من الناار

اعتق رقابنا من الناار ..



Thursday, September 25, 2008

nothing to say ..







اصل مش هضحك على نفسى

انا زعلانه اوى بجد

زعلانه من جوه اوى

..:)

Monday, September 22, 2008






مش عارفه

عايزة اكتب بس الكلام مش طالع

عايزة اتكلم عن حاجه معينه

بس مش عارفه

مش عارفه اكتب عنها حاجه

مش عايزة اتعلق بيها اكتر من كده

مش عايزاها تحتل مكان اكبر من كده فى اوراقى

فجاه حسيت انى بقيت اخاف اكتب

اقول كلمه تزعل حد

كلمه حد يفهمها عليه

اتكلم بطريقه معينه فشخص لا اعرفه ولا يعرفنى ياخد عنى فكرة معينه


زمان كنت بكتب و مبيهمنيش

مكنتش بخاف اخبى مشاعرى

مشاعر ناحيه شخص ولا مشاعر لجو معين بحب اعيشه ولا اى حاجه
مش عارفه
مكنتش بخاف احكى عن شىء حصلى

نفسى اوى لو كانت شخصيتى مجهوله

و اكتب و محدش عارفنى

انا اصلا مش عارفه انا بقول الكلام ده ليه

ولا عارفه انا خايفه من ايه اصلا

كانى مثلا لو كتبت هييجى حد و يعضنى

يلا

قريبا كده هفوق و اجى اخبط فى الناس زى الاول

محدش ليه عندى حاجه ..

و هرجع تانى زى الصورة اللى من فوق دى

هرجع لنفسى من سنتين يعنى

هبقى افهمكوا بعدين ايه موضوع سنتين دول ..:)



-----------------

فى اتفجارات حصلت فى فندق فى باكستان النهارده ..


و فى حد اعرفه كان هناك .. و بنحاول نوصله مش عارفين


ادعوا ميكونش جراله حاجه

..:(




Wednesday, September 17, 2008

I can't stop lovin' you





The first time our eyes met it's the same feelin' I get

Only feels much stronger and I wanna love ya longer

You still turn the fire on

So If you're feelin' lonely.. don't

You're the only one I'd ever want

I only wanna make it good

So if I love ya a little more than I should

Please forgive me I know not what I do

Please forgive me I can't stop lovin' you

Don't deny me



Sunday, September 14, 2008

Sunday, September 07, 2008

Another Day ......


اولا البوست دا طويل و ممل و مالهوش علاقه بأى حاجه ..

عادى شويه فضفضه مع نفسى ..

مش لازم حد يقرأه يعنى ..مش مهم ...



------------------------


مومو .. يارب تكونى وصلتى بالسلامه ..


هفتقدك اوى الايام الجايه دى .. بس ان شاء الله الايام هتعدى بسرعه ..

اول مرة احس اوى ان النت دا اختراع عبقرى

يعنى تخيلى حياتى انا و انتى من غيرة .. كانت هتبقى رخمه اوى :D

الحمدلله ..الحمدلله على كل شىء ..

و فعلا حد بيقرب و حد بيبعد ..

بس اللى بيبعد ..مهما كان بعيد

مكانه فى قلبى محفوظ زى ما هو ..:)

***

لا طعم ولا لون


اهى ايام تانيه من الايام اللى مالهاش لا طعم ولا لون

ولا عارفه امبارح كان ايه ولا بكرة هيكون ايه

ولا حتى عايزة اعرف

اهى ايام بتعدى و خلاص شبه بعضها

و افضل استنى ييجى يوم يكون ليه لون او طعم

او حتى شىء تافه يكون علامه مميزة فى يومى

***



مش عارفه بجد ..

يعنى مش عارفه اشمعنى هو

و مش عارفه السؤال دا يبقى اعتراض على قدر ولا لاء

مقصدش يبقى اعتراض على قدر

هو الحمدلله على كل شىء

بس برضوا السؤال دا مش عاوز يروح من بالى بقالوا سنه ونص

اشمعنى ده

ما فى ناس كتيرة

ليه دا اللى مات

و ليه ساعتها

ليه دلوقتى

ليه فى اكتر وقت كنت محتاجاه فيه

عارفه انه مش من حقى اقول ليه

بس انا مش عارفه

مش متقبله الفكرة

عارفه ان دى حاجه مش بايدى

بس عايزة اسباب

حاجه تخلينى مقتنعه انه فعلا مات

مش نص الايام بتعدى و انا مستنياه يرجع

اصل هو مات ليه

لحد دلوقتى معنديش سبب مقنع

مجرد شىء عقلى يفهمه

عايزة بس سبب يخلينى اقتنع انوا راح و مش هيرجع تانى

حاجه تخلينى مستناش اكتر من كدا

مستناش الباب يخبط و افتح و يكون هو

مبقتش عارفه التفكير دا ضعف ايمان ولا ايه

انا بس محتاجه شىء عقلى يقدر يستوعبه

عارفه انى مبقتش عيله عشان اسال الاسئله دى

بس انا بجد مبقتش فاهمه

***



تفاصيل ..

فجأه عرفت ان التفاصيل البسيطه دى بقت تفرق معاى يوم

اتفه التفاصيل

حاجات مالهاش لازمه فى الوجود ..بس بتدى للحياه معنى

لما بتختفى ..بتروح معاها حاجات حلوة كتيرة اوى

ساعات بقيت اتجاهلها لانى اصبحت متعلقه بيها زياده عن اللزوم

كانت مع تفاهتها ..بتمثل شىء كبير اوى بالنسبالى


***



انا مهتمتش..


غريب اوى لما تكون محتاج حد جنبك

ومتلاقيش اقرب الناس ليك

و تلاقى اللى معاك .. هو الانسان اللى انت عمرك ما اهتميت بيه

و كتير كان بيبقى محتاجلك

وانت عمرك ما تكون موجود

بس فى المرة اللى احتاجت فيها حد

كان هو اول واحد واقف جنبك

غريب اوى بجد ان اخر حد ممكن يخطر على بالك ...

يكون هو اول واحد يهتم و يحس بيك

***

ما خلاص...


و عايزنا نرجع زى زمان ..قول للزمان ارجع يا زمان

و هات لى قلب لا داب ولا حب ولا انجرح ولا شاف حرمان

و تفيد باييييييييه يا ندم .. و تعمل ايه يا عتاب

طالت ..لياااالى ..الألم

و اتفرقوا الاحباب

و كفايه بقى تعذيب و شقى

و دموع فى فراق و دموع قى لؤى

تعتب على ليييه ..انا بايدى ايييه

***

حاجه نسبيه ..

ساعات بتبقى عاوز حاجه اوى

و من كتر ما انت عاوز الشىء دا بيتحقق

فى اصعب الظروف

مجرد ان جواك يقين ان الحاجه دى هتتحقق بتخلى الشىء دا يتحقق

حصلت كتير اوى

و ساعات بتبقى عاوز شىء معين اوى برضوا

بس انت خايف انوا يضيع منك

مجرد وجود الشك جواك بيخليه يضيع

ممكن من كتر خوفك على حد معين

بتقربه منك لدرجه انك بيتنفس هواك

من كتر خوفك عليه

بتموته ببطء


***


مقلتش حاجه ..


بنفضل ساكتين بس عشان الكلام ميتفهمش غلط

هنشيل جوانا عشان عارفين ان اللى هيتوجه له الكلام هيفهمك بأسوا الطرق دايما

حتى لو الكلام مش ليه .. هيفهمه بسوء نيه



***

برضوا تفاصيل عبيطه ..


عادى يعنى بندخل بلوجز كتيرة

ساعان نلاقى نفسنا جوة و ساعات لاء

مبتفرقش كتير

بنشوف صور و كل واحد كاتب حالته

وبيسمهنا ثونج بتعبر عن حالته

بتبقى حاجه لذيذه لما تلاقى اسمك فى شريط كدا على اليمين

مع بلوجز تانيه

لو ملقتش اسمك مبتزعلش

بس لما فى مرة تلاقى اسمك اتشال

بتزعل على فكرة

خصوصا لو فى بينك و بين الشخص دا علاقه شخصيه

مش عالم النت و بس ..:)

***

"When You're Gone"

I always needed time on my own

I never thought I'd need you there when I cry

And the days feel like years when I'm alone

And the bed where you lie is made up on your side

When you walk away I count the steps that you take

Do you see how much I need you right now

When you're gone

The pieces of my heart are missing you

When you're gone

The face I came to know is missing too

When you're gone

The words I need to hear to always get me through the day and make it ok

I miss you

I've never felt this way before

Everything that I do reminds me of you

And the clothes you left, they lie on the floor

And they smell just like you, I love the things that you do

When you walk away I count the steps that you take

Do you see how much I need you right now


We were made for each other

Out here forever

I know we were, yeah

All I ever wanted was for you to know

Everything I'd do, I'd give my heart and soul

I can hardly breathe I need to feel you here with me, yeah




***

كلام لناس ...




Nagah..



عمرك ما هتقدرى تعوضى حاجات كتيرة اوى كسرتيها بايدك

عمرى ما هعرف اتكلم معاكى

بتحاولى تعوضى شىء معين بطريقه غلط

زمان لما كنت بحتاج اترمى فى حضنك و اتكلم معاكى

عمرى ما كنت بلاقيكى موجوده

و حتى لو موجوده

عمرك ما كنتى هنا عشانى

اخر مرة حاولتى

صدقت ان فى حاجه هتتغير

بعديها بساعتين بس .. عرفت انى عبيطه

لان كل شىء ممكن يتغير الا انتى .. عمرك ما هتتغير


للأسف


------

Mrwan ...


يمكن تكون أسوا انسان قابلته فى حياتى

بس مش عارفه لحد دلوقتى انت ازاى قدرت تستنزف اخر قطرة حب ولا حتى شفقه فى قلبى ليك

مش عارفه انت كده ليه

انا لو اذيتك مش هزعل

بس انت بتحاول تكسر لمجرد انك تكسر

انت فعلا مش انسان



------


Gadeer ...


مش هكدب و اقول انى مزعلتش لما عرفت اللى حصل

لا زعلت .. بس بعدين عرفت ان مش من حقى اتكلم ..


------

Marwa ...

هو احنا من امتى بقينا اصحاب

ولا هو ازاى بقيتى من اقرب الاشخاص منى

من امتى بقى وجودك شىء اساسى

مش عارفه احنا فعلا ازاى بقينا اصحاب

مع ان حاجات كتيرة اوىىى كانت تمنع

بس هو تقريبا حبه الجنون و عدم اللامبالاه اللى عندى بقايا منهم خلونا نتفق

بس وعد منى...مهما كان..انتى عارفه بقى ..


------


Safa ...


هو مين سمحلك اصلا

ولا عشان انا كنت على طول بسكت ..فبقى مسموح بالنسبالك

برضوا مش عارفه لسه

او مش فاهمه

و يلا .. هى جات على دى .. مش عايزة افهم ..


عموما يعنى انا فهمت انتى عملتى ايه ..

:D


------

Hend ...


هو انتى ليه مبيهمكيش الا نفسك ؟؟


------

BABA ...


يمكن مجاتليش فرصه انى اقولك الكلام دا قبل كدا

خصوصا ان اخر سنتين فى علاقتنا ببعض كانت غريبه الملامح

مكنتش ببقى عارفه دا قرب ولا بعد ولاايه بالظبط

عادى يعنى كنا نتخانق و بعديها بساعتين بتيجى تصالحنى

او بعديها بيومين بتأسف انا

بس فعلا اخر مرة انت اللى جيت و بستنى على خدى

عشان عرفت انى مكنتش عملت اللى انت افتكرتنى عملتوا

موضوع طويل طويل بلاش نفتكرة

اهى كلها بقت دلوقتى تفاصيل عبيطه مالهاش لازمه

طيب عارف بقى انى بحبك اوى

كان نفسى بجد اعمل حاجات اكتر تفرحك بى

و متبقاش الفتره اللى انت شايفنى فيها فتره مراهقه و بس

كنت تشوفنى وانا كبيرة كده و تكون موجود فى حفله التخرج

بس يلا مش مشكله ان شاء الله عمو هيبقى موجود

ماما .. لا مفتكرش هقولها تيجى

ما انت عارف علاقتنا من زمان عامله ازاى

من يومين انا كنت عندك

بس كان فى جسد بس من غير روح

انا لحد دلوقتى مش عارفه رحت المقابر ازاى

مكنتش خايفه يعنى زى لما كنت بعدى من جنبها زمان

كنت لوحدى كمان

محدش فى البيت عرف لسه

مش عارفه هيبقى رد فعلهم شكلوا ازاى لو عرفوا

بس عادى يعنى مش هاممنى

اتكلمت معاك كتير اوى

بس مش عارفه انت كنت سامعنى ولا لاء

و برضوا مش عارفه انت هتقرا الكلام دا ولا لاء

بس لو قريته عرفنى

حتى لو معرفتش ..هفضل اكتب برضوا ..

بقيت اخاف انسى التفاصيل دى


سالتك سؤال زمان ..و قلت لى ان محدش يعرف

بس انا عرفت اجابته

انت مقلتش و انا مسالتش حد تانى

بس انا عرفت اجابه

حتى لو كانت خاطئه ..فعلى الاقل لقيت اجابه لسؤال كان محير بالنسبالى

السؤال دا سالته وانا عندى 10 سنين

سنه 2000 يعنى

وكان على طول فى بالى

ايوة كنت عيله و مفعوصه و بهتم بحاجات غريبه

بس مش عارفه ليه الحاجه دى بالذات كنت عايزة اعرفها

و كذا مرة كنت بقول لنفسى هساله دلوقتى

و بعدين ارجع اقول لاء بعدين ..

كنت عارفه انى مش هتقبل رفضك للاجابه على السؤال

بس الظاهر انى فضلت اقول بعدين كتير اوى

لدرجه انى حتى ملحقتش اسالك

ولا هى الايام اللى كانت بتجرى بسرعه

ولا هى فعلا على رايك عدم احساس بالوقت

كنت بزعل زمان لما تقولى

" يا (نونو) عندك عدم احساس بالوقت"

بس مش عارفه كنت بزعل ليه

اصل انا فعلا عندى عدم احساس بالوقت

نونو ... وحشتنى الكلمه دى منك اوى

مبقاش حد يقولهالى هنا زى زمان

بس لسه عمو بيقولها

عشان عارف انى بحبها

وصفا بتقولى اسماء غريبه كتيرة كدا

اخرها اوزى

و هند لسه على فيرس

و ماما لحد دلوقتى على طول تقولى فيروووز و .......

انت عارف الباقى بقى

و منى كذالك

و متسالش على احمد .. عشان مش بنكلم بعض

كان عندك حق فى كلامك زمان و الله

بس فى حاجات كتيرة اوى اتغيرت

مش عارفه ارجعها زى الاول

و حاجات كتيرة لسه بحاول اعوض عنها باشياء اخرى


على الاقل مبسهرش كتير يعنى

او معظم الايام بنام بالليل و بصحى بالنهار

معظمها مش كلها ..ساعات لسه بنسهر

و برضوا بنروح لحد دلوقتى سينما من 1 ل 3


انا فاكرة اول مرة عملناها و مكناش انا و صفا عارفين هيكون رد فعلك ايه

اول مرة بس .. بعد كدا بقى دا الطبيعى

اصل دا كان بيبقى فعلا الوقت الوحيد اللى بنعرف نتجمع فيه و نخرج يعنى

فى كلام لسه كتير

هتلاقيه فى الكشكول الروز

اللى انت جبتهولى

لو قريته برضوا عرفنى

لو مقريتهوش هفضل اكتب

عشان منساش التفاصيل ..:)



------

X ...

"""

so wut wil u gonna do now ...??!! says:

ان شاء الله نفضل اصحاب طول العمر

و مافيش حاجة هتقدر هتوقف صداقتنا ان شاء الله
و اكيد لو احتجتى حاجة انا هفضل اقرب واحد منك صح ؟


LosT in The MiddlE OF NowherE aGaiN... says:

اكييد

so wut wil u gonna do now ...??!! says:

يعنى بقيت من ضمن اصحابك يبقى اكيد انا اقرب واحد منهم ليكى ولا ----- ولا غيره ؟


"""


اول مرة اسمع الكلام دا منك مكنتش عارفه هيبقى بجد ولا لاء

بس بعدين عرفت انوا ...............

فعلا ..ما انت فضلت اقرب واحد
:s


و اصبحت احدى انواع الهم اللى بيضحك ..:)

برضوا مش عارفه ..

هى دى كانت غيرة فى وقت من الاوقات ان شخص غيرك بيمتلك شىء انت عايزة

مش معنى انى كنت مفتقده شىء معين يبقى مفتقداك انت

يمكن مفتقده ايام معينه

حالات معينه كنت ببقى فيها و كانت بتبقى بوجودك

مش بالضرورة يكون انت

مش غلطتى انك فهمت كلامى غلط

مش غلطتى انى قابلتك بالرفض

بس انت متقبلتش الرفض ..

لو الحاجه دى مش ملكى .. فمش هتبقى ملك حد تانى

دا اللى كنت عاوزة

صح

اهو دا اللى حصل ..:)


***

و الختام ...

كلام لحد عارف غلاوته عندى قد ايه

او مش عارف ..يمكن مع الايام يعرف

كان نفسى اعمل شىء فى حياتك جميل اوى

كان نفسى اغير شىء فيك

كان نفسى اخلى الحياه عندك وردى شويه بدل ما كنت بحسها ابيض و اسود

بس من الواضح لانها كانت عندى اصلا اسود فمعرفتش اعمل حاجه تساعدك

بالعكس كنت بضرك ..

اهى باقى سنه و تتخرج و تبقى ........قد الدنيا

مش عارفه هتبقى ايه بالظبط

لانى حاسه انك هتشتغل فى عمل خاص

عموما ربنا يكرمك

و تكمل حياتك بلا خسائر اخرى

ولا ناس تندم بعدين انك عرفتهم

و تعرف قيمه نفسك

فيك حاجات حلوة كتيرة اوى انت مش شايفها

بس لو تبطل شويه الشر اللى فيك و الرخامه

الدنيا هتتظبط صدقنى..

Sunday, August 10, 2008

عيونه ..




عيون عسلى و شعر اسود

ضحكه صوتها يحيى قلوب

و همسه .. تتمنى تسمعها كل يوم

هو




Sunday, July 20, 2008

يعنى خلاص مشيت ..





خلاص بلم هدومى و همشى

كنت بشوف بس اللى راح

حيطان ياما نمت فى حضنها

و هوا بارد جاى م الشباك .. طول عمرة كان بيدفي

شباك ياما استنيت المحك من وراه ..و الشمس منه تدخل تصحينا بنورها

صوت ايدك بتخبط على باب .. اتفتح كل مرة بلهفه

سرير و مخده شافوا دموع ياما

قميص ازرق كويته ..وبنطلون ومعاه شراب

فستان و روج و كحل

و بوسه على خدى

و مرايه شافت عيونى ياما .. بتقول بغير عليه

و قلم احمر و ورقتين عليهم اسمك .. و مرسوم قلب بيقول بحبك

ورقه فاضيه عليها دمعه

وصوت حليم بيقول اهواك ..و ام كلثوم ترد ب فات المعاد

حمول كتيرة اوى فى القلب

الف حكايه و روايه

زكريات و ورق و حب ولا يتحكى .. و الم ودموع ولا تتوصف

صوت ياما طمن قلبى .. و ايد بتسمح دمعه .. وحضن ياما دفى

لسه سرحانه و ايدى على خدى

شايفانى لاول مرة بشوف عيونك

ولاول مرة اهمس بحبك

ولاول مرة المس ايديك

و اعرف انك مش بنات افكارى

ولاول مرة يألمنى جرحك

ولاول مرة اصرخ باسمك

ولاول مرة بتغيب عنى

و اعرف ان الحلم مكملش

Thursday, July 17, 2008

تيرارارااا...


فجاه طلع فى دماغى اغير اللوك بتاع البلوج

تقريبا تاثيرات النتيجه اللى لسه مظهرتش :D

اعتقد هتبقى محتاجه شويه تظبيطات لسه

بس هى كده احلى ولا أعقل و ارجعها روز تانى :S

***

الكومينتس اللى مش برد عليها ...

معلش حبه كده الظروف النفسيه و الجسديه تتصلح و هبقى ارد عليكوا ..:)

و النت كمان يعقل بقى و يرجع حلو زى الاول كدا :D



Wednesday, July 09, 2008

the more i bleed ..



the more i bleed , the more u extinguish your thirst ..




Sunday, July 06, 2008

HaPpy BiRtHdAy For My MiNd..

من شهر و يوم كان عيد ميلاد البلوجايه النونو دى

مكنتش ناويه اعملها عيد ميلاد عشان كان طالع فى بالى اقفلها

بس ما علينا مادام لسه مفتوحه اهى .. نعملها عيد ميلاد ..

.........


مش عارفه ابتتدى منين ولا منين ..

مممم ... اقولها كل سنه و انتى طيبه و مبسوطه معاى

ولا كل سنه و انا واجعه قلبك انتى كمان

دى البلوجايه مش حد تانى :D

كل سنه و انا عماله بفضفض فيكى و بشتكيلك

ولا بحكيلك حاجات بسطتنى

فاكرة اول ما عملت البلوجه كانت حالتى النفسيه كويسه على غير العاده

ايام زمان يعنى

بعد ما عملتها بالظبط ب 15 يوم تقريبا

حصلت حاجه فى حياتى غيرت فى كتيير اوى

بدل ما كنت بكتب كل بوست و التانى و لايق على اللون الروز

بقى كل بوست ييجى كئييب اكتر م اللى قبليه

لحد ما فى الاخر عملت بلوجايه على جنب لنفسى تانيه و سميتها

" i miss ur blue eyes.. "

كنت مخبياها و مازلت و هتفضل كده بعيده عن كل شىء ..

و بعديها بفتره كده بقيت انا و محمد اسامه مع بعض فى البلوج

اهو كان اى تغيير يمكن يعنى كانت البلوجايه ترجع زى الاول

و مكتبش غير بوست واحد كئيب برضوا

و طبعا سمعنا تعليقات بالهبل انا وهو ..

و ناس بتدخل تقولنا ربنا يوفقكوا مع بعض و بتاع

و اصلا كنا كاتبين بخط احمر كبير اننا اخواااات

كنا بصراحه بندخل نقرا الكومينتس و نقعد نضحك عليها و منعرفش نرد

وبعدييييييين

safa7 karmOoOoOoOoZ

عمل بلوجايه نونو كده رقيقه اوى اسمها

Words...just words

و كنت معاه فيها ..

حاولنا نطلع شويه حاجات و نرجع نكتب تانى زى الاول

بس اهو .. هنعمل ايه

قولوا بقى لزمان يرجع تانى

تقريبا هيكمل فيها لوحده بعد كده ..:)

***

عموما يعنى مش قضيتنا مين راح فين ومين جه منين

هى كانت سنه غريبه اخرى من حياتى

اتعلمت و غلطت و فرحت و انبسطت و اتجرحت و اتالمت

يمكن النسب مش متقاربه

بس هو الواحد خلاص بقى عارف انوا لما يفرح ميفرحش اوى

عشان لما ييجى يوم و نحزن منحرنش اوى برضوا

عرفت ناس كتيرة اوى .. قطعت علاقتى بناس كتيرة اوى

بسبب و من غير سبب

و محدش يسالنى ليه ..لانى انا نفسى مش عارفه

بس مكنتش عاوزة اكمل حياتى و انا حاسه انى اعرف نص الشعب المصرى

ناس كتيرة اوى اتعملهم بلوك و ديليت من حياتى اصلا

وفعلا بدون اى سبب

و ناس عرفت قيمتها اكتر و قربوا منى اكتر

و ناس عرفت انهم اصحابى بجد

مهما بيحصل و بنبعد و بتفرق بيننا بلاد ولا مسافات

لما بحتاجهم بلاقيهم جنبى

بلاقى معاهم احساس جميل اوى

حبيت .. بكل ما فى الكلمه من معنى

بس الحمدلله

يمكن بقيت عارفه اكتر انا عاوزة ايه

"يمكن" مش اكيد يعنى :D

اتغيرت حاجات كتيييييرة اوى فيا

نفسى ترجع زى الاول

و حاجات كتيرة اوى فيا مبسوطه انها اتغيرت ..

عرفت شخصيات كتيرة اوى على حقيقتها

ناس بتتمنالك كل شىء سىء

مش لانى عملت فيهم حاجه وحشه ولا بتاع

لا لمجرد الاذيه

يلا ..ربنا يسامحهم ..:)

اهو محدش بيتعلم ببلاش

فى النهايه

كل سنه و انتى طيبه

كل سنه و انتى بتسمعينى

كل سنه و انتى بتشوفى انجازاتى فى الحياه

و كل سنه و انتى بتشوفينى بتجنن اكتر و اكتر

و مش هقولكوا كل سنه و انتوا طيبين بقى

كل يوم و انتوا طيبين و مبسوطين و بتكتبوا اكتر و اكتر

***

السؤال بقى اللى كل الناس كاتباه


تفتكروا بعد 5 سنين هتلاقونى لسه هنا عماله بكتب

ولا هبقى اعتزلت الكتابه و غرفت فى الحياه اللى برا..

Monday, June 23, 2008

Everything Missing Something..




ابتسامه خفيفه و بشرة بيضا و خدود حمرا من الشمس

لون شفايف وردى .. و عيون بتقول كلام لا يتوصف ولا يتحكى

ايد دافيه تمسع دمعه من على خدى

حضن يحتوينى ... و ابقى عارفه ان هو دا الامان

لهفه لقائى بيك بعد سفر دام يومين بس

مفتقده وجودك ..كلامك .. روحك نفسها فى البيت

مفتقده كلامنا زى الاول

نتخانق و ترجع تصالحنى

تستنانى برا الجامعه عشان توصلنى البيت و اتاخر عليك و تزعل

تبقى لسه راجع من برا تعبان و تعرف انى رايحه اى مكان تيجى توصلنى

اتمشى معاك فى الشارع و ايدى فى ايدك

مجرد رجوع الاحساس بدفا ايدك تانى

لما كنت ابوسك على خدك و شعر دقنك يضايقنى

فى فرح .. تكون لابس بدله و انا البس فستان

و نرقص مع بعض و نضحك بصوت عالى

ننزل نشترى خيار و طماطم مع بعض عشان ماما تعمل السلطه

مارينا .. و ننزل البحر مع بعض زى الاول

مسافرين بالليل و كلهم يناموا و نفضل نسمع انا و انت ام كلثوم و نغنى معاها

تكتب خاطرة وتوريهالى .. و اوريك بكتب ايه و تعدل فيه

ارجع من برا و اقول "السلام عليكم" و تعرف انى عامله مصيبه

ولاا بعد يوم طويييل .. ادخل البيت واترمى فى حضنك

ولا الصبح الساعه 9 و نص اصحيك عشان تنزل الشغل

اعملك كبايه الشاى .. و انسى و احط سكر و اشربها انا

ولا تنزل من غير ما تقولى صباح الخير وتتصل تقولى صباح الخير

لما كنا نتفرج على فيلم مرعب فى عز البرد و ابقى قاعده و ماسكه ايديك

صوت جرز الباب ويمر ببالى ان انت اللى جيت

موبيلى يرن و ابقى عارفه ان انت اللى بتتصل

ولا مسج رقيقه منك

كلمه "حبيبى" تطلع منك بعفويه و يكون ليها احساس ميتوصفش

تصورنى صورة على سهوة و اشوفها على موبيلك بالصدفه

ببقى عايزة اشاركك لحظات فى الحياه

لحظات حلوة .. نفسى اشوف بسمه على وجهك و تكون فخور بى

اخاف اتعلق بشخص اخر بنفس درجه تعلقى بيك

لانى عارفه لو حصل و غاب عنى تانى ... هموت

طاال الغياب اوى ..بسال هتيجى امتى

مجرد فكرة انك ذهبت بلا عودة .. عقلى لحد دلوقتى مش متقبلها

ادور فى تفاصيل اليوم على حاجه ترجعنى ليك بس ميبقاش ليها نفس الطعم

مكان اتمشيت فيه معاك ولا كلمه كنت بتقولهالى دايما

ولا حتى قميص لونه بنى اقربه من وجهى و استنشق

مفتقده حاجه كانت جواى موجوده دايما يوجودك

يمكن بطلت بكاء كل يوم

بس لسه لحد دلوقتى بصحى من النوم الساعه 3 بالليل و افضل مستنياك

افضل اقنع نفسى ان الايام يتنسى الواحد

بس معاك انت بالذات لا ..بتيجى الايام و تخلى الواحد يفكر فيك اكتر و اكتر

ابقى عارفه ان فى حاجه اتكسرت جواى بسببك

بس بتيجى ايام بحس انها بتتكسرمن اول و جديد تانى

و نفس الالم .. و مقدرش حتى اتفس

و عينى يبقى لونها احمر من كتر الدموع

و كل شىء بيتكرر تانى حتى ابسط التفاصيل

ببقى نفسى انساك اوى .. انسى شكلك .. طريقه مشيتك

صوت ضحكتك اللى فى ودانى

مش عارفه انسى .. نفسى فى يوم احس انك ذكرى

هقدر اتخلص ولو من جزء صغير من الالم اللى بحسه لما بفتكرك

بس انت مبتتنسيش

امسك ورقه و قلم تانى و اكتب ... و ميبقاش نص تفكيرى فيك

من سنه لحد دلوقتى ببقى عايزة اكتب حاجه بس الاقى الكلام يبقى ليك او عليك

مش عارفه يعنى ايه هيعدى سنه تانيه من غيرك

و مش من غيرك بس .. من حاجات تانيه كتير

السنه مبقتش تبتدى من شهر واحد

بقت عندى من 22-6

الحاجه الوحيده اللى حسيت بيها ان فى سنه عدت

كنا بنضحك و بنزعل و نتالم بس كنت بتبقى هنا تشاركنا دا كلوا

لما كنت بتقول الحياه قصيرة متخليهاش تضيع منك

ولا تضيعى شبابك و سامحه لحزن ما يستولى عليكى

كنت بتقولى الكلام دا ...فى اوقات معينه

وبتعيده و تزيده

لما كنت بتقولى الايام دى يا روز هتبقى ذكرى و تقعدى تفتكريها و تحزنى عليها

مكنتش ببقى فاهمه يعنى ايه

او مش عاوزة اتصور الوضع هيبقى ايه

دلوقتى فاهماها اوى

لما كنت بتحكيلى عن باباك و تقولى قد ايه انت مفتقده

مكنتش ببقى عارفه الاحساس دا عامل ازاى

ولا هيبقى طعمه و لونه ايه

مكنتش عارفه انه بيموت الواحد بالطريقه دى

ولا بيغير الواحد بالطريقه دى

مش مصدقه ان دى انا بعد سنه واحده بس فى بعدك

امال لما يبقوا 20 سنه .. هبقى عامله ازاى

لو كنت عارفه .. كانت ايامى بيك هيكون لها معنى تانى

كنت هملى بيك ايامى بجد

كان هيبقى للثوانى طعم و شكل تانى


everything missing something

Saturday, June 21, 2008

Wednesday, June 18, 2008

:'(

You didn't have to hurt me


you didn't have to break my heart in a thousand pieces





Sunday, June 15, 2008

تلاته مرة واحده :D



كان فى بوست عاملاة مخصوص لحد كده
فى البلوجايه الصغنطوته التانيه
هملى بيك ايامى

ابقوا شوفوة


كان فى كام تاج مخلل عندى من كام حد كده
قلت اخلص منهم واعملهم

الاول كان من مندهش

اذكر 10 اشياء عن نفسك ..

هقول حاجات عن نفسى مش عارفه هتبقى 10 ولا اقل ولا اكتر

هنقول مثلا بتمنى بجد بجد بجد

ابنى يكون اسمه يوسف

متخيله ضحكته و و خدوده الحمرا

و اسمه يوسف

ياااااه

وياريت يبقى كلبوظ كدا

و ياخد شعر باباه وقلبه

هيبقى اصلا حاجه محصلتش يعنى



مدمنه على الكتابه

بكتب فى اى زمان و اى مكان تقريبا


مجنون حبتين تلاته ..وليس مجنونه:D


على قد ما بحب السفر بكرهه

لان اى مكان بروحه و بتعلق بيه

وانا ماشيه منه بحس ان فى جزء منى سايباه فيه


اعشق الحياه و بحب اوى اقف تحت المطر

مجرد احساس البرد بيدينى شعور بانى لسه عايشه ..:)



بحب اوى اسمع حليم خصوصا الليالى و كاظم و طبعاا لؤى و انا كده

و مؤخرا منير لما النسيم ..مش عارفه ليه بقى يفكرنى بايام زمان

و كمان عايده الايوبى و ساعات حسام حبيب و احمدو حاتم فهمى

بسمع حاجات كتيرة اوى من الاخر :D



متعلقه بالماشى زياده عن اللزوم


بغلط كتير

و بكرة اوى انى اتاسف


على قد ما بحب الوحده على قد ما بكرهها


دايما الناس بياخدوا عنى انطباع اول بانى هاديه

مش عارفه ليه


بثق فى الناس بسرعه للأسف


بكرة اوى الغربه



اكتر مكان بحب اروحه

كورنيش النيل

استحااله ازهق منه


عمرى ما مسكت ورقه و قلم و كتبت شىء مكنتش حاساه

بس طول عمرى لما بكتب شىء و حد يسالنى ايه ده

بقوله مجرد خواطر ولا شعر ولا كلام فارغ



باخد قرارات كتيرة اوى و برجع فيها



بحب اقف فى الاماكن المرتفعه جدااااااااااااااا



the grudge لحد دلوقتى عاملى ازمه رعبيه :D




مقتنعه جدا ان الحب دا بهدله درجه اولى



مش عارفه ..بس حاسه انى رغيت كتير اوى
كفايه عليكوا كده ..:)


*********************

كان فى تاج عند سفاح كرمووز قلت اخده اعملوا يعنى

لوأعطيتك ثلاث وردات .. من هم الثلاث الأشخاص اللى هتهديهم الورد اللى معاك ؟؟

الوردة الاولى لماما طبعا .. بتتعب معاى اوى و بتستحملنى كتييير اوى ..و اصلا ورده واحده قليله عليها اوى ..:)

الوردة التانية لصديق وصديقه فى نفس الوقت..وقفوا جنبى فى مواقف كتيرة اوى وقدروا يغيروا فى حاجات كتيرة اوى
ربنا يحفظهم ..

الوردة التالته هديها لشخص .. فرق معاى كتير اوى فى حياتى
اعتقد لو كان لسه موجود كان كل شىء هيبقى احسن من كده


لو أعطيتك ورقة بيها 3 سطور فقط و قلت لك أكتب فيهم اللى أنت عيزه هتكتب إيه ؟؟

هكتب 3 كلمات بس

عااادى .. بحبك .. كفايه

ما هو هدفك فى الحياة ؟؟

نفسى اوى ارجع حاجات زمان كانت موجوده
سواء فى او فى الناس اللى حوالى
نفسى ارجع تانى لما بضحك يقدر اضحك من قلبى بجد
بكل بساطه
نفسى ابقى انا زمان ..

إن شاء الله بكرة هيكون أحسن من النهارده" ِهل تصدق هذه المقولة ؟؟ و لماذا ؟؟

ايوة بنصدقها
مع ان مش دايما بكرة احسن
بس كفايه اننا عايشين يعنى و بنتنفس

أجمل مقولة سمعتها فى حياتك ؟؟

مش مقوله ... هى ايه قرانيه

"انما اشكو بثى وحزنى الى الله"


من المغنى اللى بتحبه أوى و إيه أحلى أغنية ليه بتحبها ؟؟

بحب كتير اوى ..بس اللى فى بالى دلوقتى

عمرو دياب ..قدام عيونك


لو تزوجت و أنجبت بنتين و ولدين أى الأسماء تختار لهم ؟؟

اكيييد ان شاء الله الولد هيبقى يوسف

الاسم دا داخل دماغى مووت اصلا

لو بنت هخلى جوزى هو اللى يختار بقى

بس يكون اسم يعجبنى يعنى


لو أتعرض عليك رشوة كبيرة و انت فى زنقة ماليه هتعمل إيه ؟؟

هقبلها و اروح اشترى بيها سندوتشات حلاوة بالقشطه:D


قول 3 صفات ب 3 كلمات بس توصف بيهم شخصيتك (يعني كريم طيب خدوم كده )؟؟

مجنون ..متسرع .. مبسوط

اول مرتب ليك وكان كبير قوي يكفي تجيب اغلى هدايا هاتجيب لكل فرد في عيلتك ايه؟؟

مشتغلتش قبل كدا :D


برضه بكلمة واحدة ايه اهم صفة عايزها في شريك حياتك؟؟

غير الحب ..يكون متفاهم


طب دلوقتى حالا ايه المكان اللى نفسك تكون فيه؟؟

نفسى اتمشى على كورنيش النيل طبعاا


تمرر التاج لمين؟

اللى ليه نفس ياخده ياخده

********************

كان فى تاج تالت مخلل عند ديد مان

ما رأيك فى الجملة التى تقول ...العزوبية تاج على رؤوس العزاب لا يراه الا المتزوجين؟

لما اتجوز هبقى ارد على السؤال ده :D

ما هى العوائق من وجهة نظرك التى تحول بين الشباب والزواج هذه الايام ؟؟؟

دا كفايه بس ان الواحد عشان يجيب شقه ليه محتاج نص مليون
شاب مين لسه بيبتدى حياته هيقدر يجيب شقه لنفسه
و الله حاجه تحرق الدم :S
و الاهالى كمان ساعات بيطلبوا حاجات وهميه
مبيفكتروش اللى كانوا بيعملوة زمان هما
بيبتدوا باى حاجه بسيطه و يبنوا كل حاجه مع بعض ..:)


من وجهة نظرك هل النكد موجود فى العزوبيه ام فى الزواج ؟ ولماذا ؟

النكد موجود فى البونى ادم ذات نفسه
عشان كده عمرى ما هفكر احب واحد نكدى


ما الحل من وجهة نظرك لمشكلة (( العزوبية )) فى مصر ؟؟

تعملولهم سندوتشات قشطه بالحلاوة

من وجهة نظرك ....هل للعزوبية مميزات وعيوب ؟

طول عمرى اعرف اه ان اى بتنجان ليه عيوب و مميزات
مش العزوبيه بس يعنى


ما هو رأيك فى انشاء مدونة (( رابطة )) للعزاب من المدونين ؟؟؟

طيب و لو اتجوزوا نعملهم يعنى رابطه للمتزوجين من المدونين

أخيرا ....لمن تمرر هذا التاج ...على الأقل خمسة ؟؟؟

اى حد نفسوا ياكل سندوتشات قشطه بالحلاوة ياخد التاج
:D


يارب بقى تكون ردودى عجبتكم

Tuesday, June 10, 2008

حبه طرطشه ..

القلب عمرةما بيفكر
المخ بس هو اللى بيفكر
القلب عشان يوصل الدم لجسمنا كله و بس
العقل..هو اللى بيفكر ..بيحس ..بيحب ..بينجرح وبيتالم
مش القلب ..

*****************************
لو كنا عارفين ان النهارده مش هيتكرر ... كنا هنستغل كل لحظه بطريقه مختلفه

*****************************
كان مجرد جثه هامده ..
دا الانسان بعد ما مات
مجرد جثه هامده لا غير

*******************************

الحب و الموت مرتبطن ببعضهم بطريقه غريبه اوى
*******************************

مبقتش احب كلمه و انتى كمان
كنت على طول بقولها "بحبك" و اسمعها وانتى كمان
امبارح قلتها بحبك" والرد كان"بعشقك" لحد دلوقتى سامعه الكلمه جواى
الحب دا شىء غريب اوى
بهدله و قرف و غيرة و حاجات كتيرة مالهاش لازمه
بس برضوا مجرد فكرة انك تعيش حياتك من غيرالشخص دا شبه مستحيله
مجرد انك تقدر ترسم حياتك بكرة و الشخص دا كان شىء اساسى منها
فتى الاحلام اللى كان بييجى على حصان ابيض
هو يمكن مجاش على حصان ابيض
بس احلى مما رسمت فى خيالى
هنعمل ايه .. الحب ..:)

************************************


الابطال دول حاجه غريبه اوى
او انا بس اللى بحس انهم حاجه غريبه يعنى
الرجل الاخضر و سبايدر مان
لبسهم غريب اوى
من ناحيه معينه شكله مضحك
خصوصا سوبر مان
مش منظر دا اصلا
بقيت احس انهم كلهم شبه الراجل بتاع ميلودى تتحدى الملل
:S

********************************

مفيش حد ملاك .. و عمرك ما هتلاقى حد ملاك
كل انسان ومليان عيوب
بتطمن لما الاقيى عيوبه ظاهرة قدامى
مبقتش استريح فى التعامل مع الناس الخاليه من العيوب
بعرف ان فى شىء خطير مستخبى تحت قناع البراءه ده ..:)

***********************************

الحب اللى بيذل الواحد .. و بيدوس على كرامته
سيبنا منه
خلينا مع اللى نحبهم و يحبونا و يحافظوا علينا
حتى الحب بين الاصدقاء و الاخوات واحد و واحده
بلاش الحب اللى بيذل

************************************

عشان عاوز توصلى فكرة معينه
و منتظر رد فعل معينه
طلعت شكلك .............قدامى
بجد خسرت كتير اوى ..مقابل لا شىء ..:)

*************************************

اصاله بتقول : وفاات الوقت ..وجيت دلوقت .. و انا مضطرة ااقولك لاء..لاء..لاء..

**************************************

مش مشكلتى بقى لما متصدقيش
سالتينى مرتين و كانت نفس الاجابه
معتقدش ليكى الحق فى انك تدخلى فى خصوصيات اكتر من كده
لو عاوزة احكيلك هحكيلك .لو عاوزاكى تعرفى هتكونى اول واحده تعرف
بس دا شىء انا فضلت احتفظ بيه لنفسى
متحاوليش تعرفى ..عشان فعلا مش هتكلم ..

***************************************

حاسه انى مستنيه بقالى سنييين و سنييين عشان اشوفها
مستنيه اليوم دا فتره كتيرة اوى من عمرى
بحلم بس بحضنها بقالى شهوور
مش مصدقه انى خلاص هقدر اشوفها و اخدها جوة حضنى
مش مصدقه فعلا ..:)

***************************************

و تفيييد باييييه يا ندم .. اااه يا ندم ..ااه يا ندم ..