....احساسى معاك

احساسى معاك كان غير

محستهوش مع حد تانى

امان..حنيه..

حاجات كتيره حسيتها معاك

محستهاش مع حد غيرك

طيب و هو انت فين دلوقتى

مش عارفه

مش موجود

حتى لو عايش الانسان اللى كنت بحبه جواك ماات

انت قتلته بايدك

مش انا اللى قتلتك

و متلومنيش

قلت لك من الاول

بس مسمعتنيش

ضيعت احلى ما فيك بايديك

فين الملاك اللى عرفته

فين الانسان اللى حبيته

دا وحشنى اوى

زمان لما كنت ببص فى عيونك بيملانى احساس جميل

دلوقتى بحس بخوف

خوف منك..من عيونك

مش عارفه

كل اللى اعرفه انك قتلت نفسك بنفسك

احلى ما فيك ضاع من بين ايديك

و هقول ايه

يارب تعود

مهما حاولت

البراءه اللى فى عينيك مش هتعود

دفء ايديك..ضحكتك

مفيش حاجه هتعود

و هقول

اهو حب و راااح

.....

....ااااااه يا بلد

مش هطول فى الكلام
هحكى موقف بس حصل لى الاسبوع اللى فات ده
كنت بلعب انا و بنت عندها 5 سنين تحت الشاليه
و ببص لقيت عربيه واقفه و قدامها 3 شباب
شكلهم حراميه يعنى اصلا

و اللى فى النص واقف بيبدل المفاتيح مع اللى جنبه و بيحاولوا يفتحوا العربيه
المهم يعنى الاعمى يعرف ان هما بيسرقوا
طيب انا بنت
هعمل ايه يعنى
لقيت راجل من بتوع الامن اللى لابسين ابيض دول
واحد واقف كده رحت قلت له
الراجل قالى طيب ربنا يكرمك عشان قلتى لنا و هبعت حد دلوقتى حالا و مش عارف ايه
قلت له طيب
طلعت الشاليه و وقفت من الفرندا
شايفه الراجل بتاع الامن ولا اتحرك اساسا
و التلاته سرقوا العربيه
واحد ركب و الاتنين التانييين ركبوا على موتسيكل و حصلوا
ده كله و بتاع الامن اللى قالى حاضر هنحل المشكله و هنبعت حد دلوقتى واقف مكانه ثااابت
ده ايه ده
ايه اللى بقى يحصل فى مصر ده
الراجل ده خلاص ضميره ميت للدرجه دى انه حتى ميحاولش يحل المشكله ولا حاجه
ده من ايه ده
مش عارفه اقول ايه
هما كلمتين و بس
اااااه يا بلد
و
حسبى الله و نعم الوكيل
...

..ضفدعه بتستعبط...و فاكره نفسها فاااار

مش فاهمه ايه المصيف ده

بس بجد كان راااااااااائع

و فى نفس الوقت علمنى ان مفيش مكان احلى من البيت

بجد و الله

انا رجعت اصلا ببوس الحيطان فى البيت

فى حاجه غريبه كده حصلت

كان فى ضفدعه

من الضفادع اللى موجوده يعنى

انا اللى اعرفه انها بتنط

مش كده برضه

لا دى بقى كانت بتمشى

او بتجرى

المهم مكانتش بتنط

فضلت ماشيه وراها كتير اوى و هى تنط شويه و تمشى شويه

ما علينا

ضفدعه بتستهبل و فاكره نفسها فار

المهم

الغريب ان كل بتوع الامن هناك

ناس روشين كده

اللى لابسين ازرق بيسمعوا تامرر الجديد

و اللى لابسين ابيض بيسمعوا عمر الجديد

بجد و الله

مشفتش حد لابس ابيض و بيسمع تامر

و العكس صحيح

:D

لا و نضارات الشمس حاجه رهيبه يعنى

ما علينا برضه

يمكن مرض اصابهم ولا حاجه

ايه تانى

كل سنه انا بغرق عادى يعنى

اغرق و ييجى المنقذ الوسيم و ينقذنى

مش بغرق فى البحر اساسا

انا بخاف انزل البحر

. خوافه هتقولوا ايه يعنى

اخاف من البتوع اللى بيعضوا دول

مع انى مشفتهمش قبل كده

بس انا اعرف ان فى حاجات بتعض الواحد فى البحر يعنى...

المهم يعنى و المفيد

كل سنه بجد لما بغرق بييجى المنقذ الوسيم و ينقذنى

المره ده لما غرقت...احم...جدو هو اللى انقذنى

جدو جدو يعنى

راجل عنده بتاع 70 سنه

شخصيه سكرررر اووووى..اصلا

كان شكلى وحش اوى و كده

بس ولا بيهمنى...

بعديها بنص ساعه نزلت الميه تانى..

.تانى يوم

نزلت انا و واحده صابحتى...

ايه بقى...انا كنت فاكره البنت بتعرف تعوم

و حاجات كده

اتقفنا هتعمل سباق

قشطه كده..ايوه قشطه...

حمام السباحه كان فى النص اللى جوه فااااضى

و المنقذ كالعاده بيتكلم فى الموبيل و مش فاضى

و 1...2....3...و ابتديت انا و هى السباق

وصلت للنص و ببص عليها سبقتنى ولا وراى

لقيت البنت بتغرق..

. اعمل ايه اعمل ايه

البنت بتغرق و مفيش حد شايفنا اصلا

و انا مبعرفش اصوت فى الحاجات دى

افتكرت نفسى سوووبر ماااااااان

نيهاا هاااااا

و مسكت ايديها و هكمل بيها لحد ما نوصل لاى حاجه نمسك فيها..

البنت اصلا كانت بتلفظ انفاسها الاخيره

ايعنى مفيش مشكله لو شديتها و هى كده...

متفهموش ايه اللى حصل..الهانم مسكتنى و غرقتنى معاها...

المهم انقذنا شاب وسيم كده

:D

و بعدين عمو اللى كان بيتكلم فى الموبيل

جاى يقولى

مادمتى مبتعرفيش تعومى متنزليش الميه..

كنت.......بس..

و قلت له لا ابقى خد بالك انت و تعالى انقذنا

المهم افتكرونى فى الاخر انا اللى بطاطا و مبعرفش ااعوم..

حاجه تانيه حصلت

و محروق دمى بسببها بغباااء بقى... مخدتش القاميرا معاى

نفضت و قلت هنقضيها صور من الموبيلات

قشطه كده

اليوم الخامس...مسكت الموبيل و بشوف الصور اللى صورتها

كانوا 133و اصلا كلهم احلى من بعض

متفهموش ايه اللى حصل

و اختى قلبت فى الموبيل شويه

بكمل باقى الصورمفيش ولا صوره

...فوفا..انتى عملتى ايه فى الموبيل...!!

لا ابدا ده كان مفيش مكان فمسحت الصور عشان نصور بقى شويه صور لينا...

. الهانم فاكره ان الصور دى هى القديمه و لسه محدش مسحها...

لو كانت كلفت نفسها و اتفرجت على اتنين بس منهم كانت عرفت انى لسه مصوراهم

يعنى بجد لن اسامحها على هذا الموقف....

كنت مصوره شويه حاجات جامده بغباااء

و صورت سامو زين كمان...

بس كله راااح بقى...

:(........

ايه تانى

كنت كل يوم لما اكل اى حاجه بطنى توجعنى

ما عدا ههوووز

انا كنت نزلت 14 كيلو

رجعت زدت تانى 5 فى 7 ايام

يا فرحتى بنفسى...

و ايييييييه بقى

الناموس هنااااك عسول اوووووووى

فى كميه ناموس بغباااااء...

قرف يقرفهم كلهم فى يوم واحد..

مع انى منزلتش الميه كتير اصلا

ولا بتمشى فى الشمس كتير

اصلى كائن ليلى...

بس اثودديت

اصل حضرتى بقرف من ريحه كريم الشمس...

و الغير طبيعى بقى

كنت بتكلم انا و هند كل يوم بتاع ساعه و شويه على الموبيلات

مش مصدقه ازاى كنا نقعد نتكلم ساعه مع بعض من غير من نحس بالوقت

ده فراغ عاطفى مش اكتر

دا انا اكتر فتره بكلم هند فيها برع ساعه..

لا و كل المكالمه..وحشتينى...نفسى اشوفك اووووووى...

اصل دى اول مره نبعد عن بعض الفتره دى كلها...

. بحبها اوووووى بجد...

حاسه انى عايزه اتكلم معاها كتير اوووى....

و ماما اصلا مصدقتش انى حضنتها و قعدت ابوس فيها كتير...

هو البعد بيعمل كده يا ناااااااااس....

و كل شويه هى تيجى تقعد جنبى و تبوسنى على خدى.....

دلوقتى بس ممكن اقول ان مفيش حاجه مستحيله...

...بحبك يا مومو

ياا ددعااااان

ياا بشرررررررر

يا هووووووووووووووووو

:D

اولا كده ياااارب تكونوا كلكوا بخييييير

عايزه اقولكوا انى هسااافر و هتستريحوا منى و من كأبتى اسبووووووووووع بحاله

و هروح حته زى اللى فى الصوره دى كده

هسافر الاحد الفجر ان شاء الله

...........:s

انتوا عارفين لو منى و الله هفضل قاعده على قلبيكوا كده...اصلى بحبيكوا اووووى

:D

بس غصب عنى و الله

انا مش عايزه اسافر اصلا

ام هند..بتسلم عليكوا على فكره

:D

المهم بجد

هتوحشونى بغباااااء يعنى

اصحابى و اخواتى المدونين

ناس كتيره هتوحشنى بجد

لما مكنتش بتكلم معاهم يوم واحد كنت بتضايق بجد

هتوحشونى اوووووووووى

هفتقدكوا فعلا...متتصوروش قد ايه

مومو...على فكره انا بفكر فيكى دلوقتى

بجد مش هزار يعنى

و انتى عارفه السبب اللى كان مخلينى مش عايزه اسافر

كوكى ...انتى واحشانى موووووووووت

و نفسى اكون معاكى و بتكلم اكيد دلوقتى

او بنهيس التهييس الليلى

مشمش او سفااااح كرمووز....واحشانى طرطشتك بغباااء

مش عارفه ازاى هفضل 7 ايام من غير ما ادخل البلوجايه بتاعتك

ازاى يعنى بجد

:D

ده الكلام اللى هقوله اكيد و انا هناك

و انا قاعده على البحر و رجلى فى الميه

:P

بس اهى فرصه ااغير جو

و افضى دماغى من كراكيب كتيره جوه كده

و ارجع فايقه ان شاء الله و بموووود احسن

و ابطل بقى كابه...لحسن كده هظلم البلوج اوى معاى

و الاهم ابعد عن النت شويه

و افووووووووووووووووووووق لحياتى ذات نفسها

عشان فى كام حاجه كده ان شاء الله هيحصلوا

و حاجات ابتديت فيها و عايزه اقدر اكملها للأخر

و ابقى قد المسؤوليه بقى

:D

هغيب 7 ايام

خدوا بالكوا من البلوجايه بتاعتى

لحسن بتخاف تبقى لوحدها بالليل

looooooooool

و موضوع العنوان اللى ملهوش دعوه بالموضوع ده

هقولكم ايه حكايته

اصلا مكنتش عارفه اعمل عنوان ايه

و ماسكه مومو و عماله بسالها اعمل ايه

و البنت عماله بتهزر معاى و مش راضيه تقولى عنوان

قالت لى فى الاول اعملها

"..."

و بعدين

"هريحكوا منى كام يوم كده"

دى كانت اقتراحات بجد

الصراحه مش عجبونى

:D

بعدين قالت لى بهزار اعمليه

"بحبك يا مومو"

بصراحه ده اكتر واحد عجبنى

هى لو شافته مش هتصدق اصلا انا عارفه

دلوقتى

لو اى حد عايز اى حاجه من الساحل الشمالى

قولووووووا و متتكسفوووش بجد

شويه ميه ..حبه رمل...شوويه صور...

اى حاجه بجد يعنى

قولوا بس

:D

ايووووووووووووووووووووووووووووووووووووووووووووووووووووووووووووووووووووه

جاااااااااااااااى

....اشتقت لروحك

فى المقهى

اجلس انا واختى

نتبادل اطراف الحديث

نتذكر الماضى

بكل ما فيه من فرحه

بكل ما فيه من بهجه

بكل ما فيه من حزن

بكل ما فيه من الم

نعم

انا اعلم ما الذى تخافى ان تذكريه

نعم نجلس سويه نتكلم

و نخاف ان نفكر فيه

نبكى بداخلنا

لكن على وجوهنا ابتسامه

ابتسامه مليئه بالالم

نفكر فيه طوال الوقت

ونخاف ان نتكلم

نخاف ان نتذكره

لكننا دوما نتذكره

انه ما زال معنا

نعلم انه هنا .. لكن اين

نعتقد انه سيعود يوما

لكنه لا يعود

نعم .. لن يعود

اين .. و متى ذهب

كيف

انها مشيئه الرحمن

نعم .. مشيئه الرحمن

و لم تبقى لنا ذكرى منه

سوى تلك الصور

سوى هذه الدموع

سوى هذا الالم

الذى يكاد يحتل ارواحنا

انا و انت نبتسم

و نعلم ان بداخلنا يبكى

بيكى على هذا الطفل

هذا الطفل الذى ذهب

نتمنى ان يعود

نتمنى ان نلمسه

نتمنى ان نحتضنه

نتمنى و لو نشعر بدفئه

نعم .. نتمنى

و لكن كيف

فقد مات

مات ضحيه رجل مستهتر

نعم مات

هل يمكن ان يعود

هل يمكن..

لا .. لا يمكن

لن يعود .. فقد ذهب

غادرنا بلا عوده

انظر الى عينيك

اعلم انك تبكين بداخلك

اعلم انك تشعرى انه هن

ما زلت اسمع صوت ضحكاته

نعم .. انى اشعر به

نعم

انه دافىء

انه ملىء بالام

لملىء بالحياه

لقد كان يجلس هنا

كان يجلس و يداعبنى

نعم

كقط صغير

لكن لم يتبق منه شىء

سوى هذه الصور

و هذه التفاصيل الصغيره

نعم

اعلم انك تريدينه مثلى

تقولين احبك يا اخى

و اموت كل يوم من فراقك

و لكن

يا اختى .. ابتسمى

فاخانا الملىء بالحياه

عند ربى

نعم انه عند ربى

فابتسمى ولا تحزنى

ابتسمى ولا تتالمى

احبك يا اخى

بل و اعشقك

انا كتبتها من فتره كده

و دلوقتى و انا بكتبها تانى عارفه ان فى حاجات و كلمات عايزه تتظبط

بس حبيت اسيبها زى ما هى لسبب خاص كده

...:)

و معلش بقى بقالى فتره عماله اجيب لكوا حاجات كئيبه

استحملووونى اصلى باجى اطلع هنا بقى

"وش مكسوووف"