حضن دافى ...

كانت راسى جنب راسه و كنت بكلمه
اتنفس كويس..كده صح..ايوه خليك فايق
انت سامعنى صح..اه عارفه انك سامعنى ...كان مغمض عينيه
بس كنت حاسه بجسمه دافى و ايديه دافيه على الاقل
بدا يستشهد
و انا معاه
هو بيستشهد ليه
برددها معاه
كتييييير
شويه شويه...نفسه بقى اصعب
و رجعت تانى اكلمه
انت سامعنى صح
ايوه سامعنى
شويه شويه بيبقى بطىء
فى واحد تانى من حوالى سنه و شهرين من قبل وفاه بابا
مات فى بين ايدى بنفس الطريقه دى تقريبا
مش عارفه....بس فى نظره شفتها فى عينيه
شفتها المره اللى فاتت
لما التانى مات
هى نفسها بالظبط
هى لحظه طلوع الروح
هى دى النهايه ولا ايه
اللحظه دى فاكراها اووووووووى بكل تفاصيلها
عرفت ساعتها انه مات
مبحبش افتكر اللحظه دى خالص
..:(
بس كنت بكدب نفسى
لا ..متفكريش بالطريقه دى
اهو صاحى اهو و كويس
شويه و الدكتور هييجى و يطمنك عليه
جه الدكتور و خلانى ااقوم
بس فضلت جنب بابا برضه
كنت ماسكه ايديه
لسه كانت دافيه و لسه حاسه انه بيتنفس
مش عارفه بقى حاسه كده لانى عايزه كده ولا حاسه كده لان هو كان فعلا كده
جنبى الدكتور بكلمه
ايه
هو كويس
طيب رد على
فى ايه
و الدكتور مبيردش
قالى
متنفيش جنبى زى الاطفال
لا انا طفله بقى و هفضل ااسال لحد ما افهم فى ايه
ورجعت تانى اسال نفس الاساله دى
دكتور..هو بابا كويس صح
طيب هنعمل ايه دلوقتى
اتصرف
انت مش بترد على ليه
و اخواتى واقفين
و احمد كان جنبى بالظبط عايزنى برضه ااسكت
و كنت بسال تانى و تالت و هو مش بيرد على
فى مرايه كانت جنبى
عينى جات عليها
شفتنى فيها انا و بابا
لون بابا زيي
طيب الحمدلله
لسه عايش
امال انا مش حاسه بيه بيتنفس ليه
حد يفهمنى بقى يا جماعه
الراجل الدكتور بدا يلم حاجته تانى
انت بتعمل ايه
طيب فهمنى هو فى ايه
حسيت انى جوه فيلم عربى
لما الراجل بيموت الدكتور بيلم حاجته و بيقولهم البقاء لله
بس دا متكلمش
دا نده اخوى و طلعوا وقفوا بره باب الشقه
ساعتها كانت ااول مره اسيب بابا
رحت معاهم و بسالهم هو فى ايه
الدكتور مشى
و احمد بدا يعيط
اول مره اشوف دموع فى عيون احمد
احمد هو قالك ايه
طيب ازاى يعنى هو بيهرج الراجل ده ولا ايه
احمد خدنى فى حضنه و عايز يتكلم و مش عارف
و بيعيط
اول مره اشوف اخوى بيعيط
سبتهم و جريت تانى على بابا
مسكت ايديه
كانت بارده
لالا اهى مش بارده اكيد
و ابتديت تقريبا اكلم نفسى
ازاى ايديك بارده
انا بيتهىء لى صح
طيب رد على و قولى ان ايدى بتهيس
و انت دافى و انا اللى حاساها بارده
اصل دى ايدك بس انت جسمك اهو دافى و كويس
فضلت اكلمه تانى
قوم بقى يا بابا
قوم يلا عشان عندى مذاكره
انت عارف انا كده كده مش هذاكر يعنى بس معلش قوم يلا
طيب قوم انت عندك شغل كتير لازم يخلص
قوم طيب عمو جاى كمان شويه هيتخض لو شافك بالمنظر ده
قوى بقااا
طيب هو انت مش بتتنفس ليه
بص ايدك اهى بارده قوم و هعملك حاجه دافيه تشربها
ده كله و احمد بيقومنى بس مش عارف
و اخواتى كمان
و ماما واقفه مش فاهمه حاجه فى حاجه
و انا لسه بكلمه
و هو مش بيرد على ولا حاجه
حطيت راسى على كتفه و غمضت عينى
و ماسكه ايده
و لسه بكلمه
..:)
بصيت فى الساعه لقيتها
تقريبا واحده و نص
الكلام ده كله حصل من الساعه 9 تقريبا لحد واحده و نص بالليل
حسيت انهم نص ساعه بس اللى عدوا
و لما شالوه و حطوه على السرير
انا كنت جنبهم
بيغطوه
و بيغطوا وشه
بقولهم ليه
سيبوا وشه هو مكانش بيغطى وشه و هو نايم
و برضه محدش بيرد على
ساعتها بس فهمت
انه مات

خايفه اتعلق بيك ...

خايفه اتعلق بييك

و اصحى و انام على حلم بيك

و اشوف احلامى فى عينيك

و اعيش و انا بين ايديك

و فى يوم الاقيك

بتبيع زى اللى قبليك

و تموت قلبى معاك

قلبى اللى هواك

قلبى اللى عاش ليك

و ساعتها لازم انساك

بس قلبى مش هينساك

انسى ازاى انى حبيتك

انسى ازاى عمرى معاك

انسى ازاى عينيك

انساااك ..!

و ابقى قتلت قلبى اللى هواك

قلبى اللى عاش بهواك

خواطر شــــــــاب محتـــار

في يوم ولا في الأحلام ... قولت اسافر واشد الرحال ... علي بلاد فيها كل ما هو أغرب من الخيال ...دهب و ياقوت ومرجان ... زي ما بيقولو في المسلسلات والأفلام

لكن ارجع واقول احنا لا في مسلسلات ولا افلام ... دي بلاد ماشية زي ما الكتاب قال تقدم ورقي وتكنولوجيا كمـان

طب قولي يا سيدي ليه مش بنحط ده في الحسبان .... علشان نبقي احنا كمـان من بلاد الأحلام

لكن ازاي واحنا عندنا الشباب عيان ..... ومفيش في دماغه غير البتنجان

خروج ولعب وأغاني كمان.... بوظت عقول ألاف كمان

ونرجع ونقول شبابنا اللي عيان .... طب ما تبصو علي إعلامنا الكحيان

ويا سلام علي حكومتنا كمـان.... وياسلام علي اللي في بالي كمـان

مرتاح ورايق ولا في دماغه اي كلام ..... طب انا اعمل ايه وسط ده كله دانا غلبان ..

ياتري اسافر بلاد الأحلام .... ولا افضل هنا عايش في الحرمان

ناس تقول هنا احسن من هناك .... وناس تقولي هو حد لاقي يروح هناك

قولي اعمل ايه افضل هنا ولا اروح هنـاااااااااك .. !!!!!!!!!!!!!!!!!!