Wednesday, August 25, 2010

و ضحكت بصوت عالى !!

غريب اوى .. اللى نحبوا ميحبناش و اللى يحبنا منحبوش !!!

***

مش عارفه اشمعنى النهارده افتكرت الموقف ده
مش عارفه ليه حتى الموقف دا اللى افتكرتوا ما بين مواقف كتيره اوى حصلتلى معاه

من حوالى 10 سنين
عشر سنين بحالهم...!!!
ايوة انا دلوقتى بقيت فى رابعه جامعه و ساعتها كنت لسه مخلصه خامسه ابتدائى
قبل ما احسبهم و الاقيها عشر سنين انا كنت فاكراهم اقل من كده
كنت فاكراهم اقل بكتير من كده
يمكن انا فاكره الموقف دا كانوا كان امبارح
دنا حتى فاكره هو كان لابس ايه
قميص نص كم لبنى فاتح و بنطلون رمادى
و البنطلون اللى كنت انا لابساه ساعتها انا لسه متكعبله فيه النهارده
سبحان الله
غريبه ان شكلوا جديد لسه
دول عشر سنين بحالهم

بعد امتحانات المعادله اللى ضيعت فيها الصيف مذاكره
و كانت اول مرة اعرف مين العقاد
و اما كانت صفا بتذاكرلى و تقولى درس القراءه النهارده عن العقاد
اقولها طيب
تقولى مين العقاد
اقولها معرفش
تبصلى تانى و تقولى مين العقاد
استغرب من نبرتها و نظراتها و ارد تانى معرفش
دلوقتى لو انا مكانها و بسال البنت اللى فى خامسه ابتدائى مين العقاد و قالتلى معرفش
اول حاجه هتيجى فى بالى البنت دى عبيطه ولا ايه
بلاش تفاصيل طيب
يوم ما كنت رايحه معاه اجيب النتيجه
من كتر الخوف مقدرتش انزل و خليتوا هو ينزل يجبهالى لوحدوا
رجع و على وشوا الابتسامه اياها ... و قالى انا اسف منجحتيش !!!
طيب و لما انا منجحتش وشك ليه بيقول حاجه غير كلامك
و لقتنى فى العربيه بصوت و بعيط
عندى عشر سنين هعمل ايه مثلا يعنى
و هو انا بعد دا كلوا منحجش ازااااى !!!!!!!!!!!
فاكره ساعتها لما نزلنى من العربيه
و اخدنى لاخر الشارع و قالى هقولك بس هنعملهالهم مفاجاه متبوزيهاش بقى
يعنى انا نجحت ؟؟!!
ايوة نجحتى ...
بتتكلم بجد !!!!!!!!
ايوة و الله نجحتى
ضحكت ضحكه بصوت عالى لحد دلوقتى مش ممكن انساها
انا فاكره ان الناس كانت بتتفرج علينا فى الشارع
و طبعا رجعنا العربيه وشى مليان دموع بس مش عارفه امسك نفسى و مضحكش
و ساعتها مبقتش مفاجاه ولا حاجه.....

***

طب و العيال اللى كانوا معايا فى الفصل عملوا ايه؟؟؟؟؟

محدش نجح غيرك

العيال اللى كنت بسال عليهم دول كانوا اول تعامل ليه مع "عيال" مصريين فى سنى
انا فاكره فى احدى المواد ان فى ولد طلع كتاب كامل يغش منوا وسط اللجنه
و كان دى شىء طبيعى جدا و محدش علق
ما عدا انا و ولد تانى كان اسموا ابراهيم كان حالاتى بالزبط بيعمل معادله
فتحنا فى الدحك وسط اللجنه و مبقيناش عارفين الناس دى مجانين ولا احنا اللى مجانين
الولد دا نفسوا كان بييجى الامتحان بهدوم ملهاش علاقه ببعضها
كان فى بنتين توأم
كان فى بنت دايما بتبصلى من فوق لتحت وانا برد عليها بابتسامه افتكر كان فيها نوع من الازبهلال

كانت الفكره اللى عندى المصريين دول عيال هبل

ولما كبرت طبعا الفكره اتاكدت عندى و يمكن انا كمان بقيت هبله زيهم

***
مومو كانت بتقولى انا مش مرتبطه بالفانوس اوى علشان كنت فى قطر و هناك مفيش حوار الفوانيس دا

انتى عارفه يا منى.. ايوة بقول منى .. عارفه ان حوار الفوانيس دا شكلوا كده فى مصر بس مش فى اى مكان تانى

اصل انا كمان مش مرتبطه بالفوانيس...

افتكر جبتوا مرة واحده او مرتين فى حياتى عشان صادفت اننا كنا فى مصر فى رمضان

حتى الفانوس دا لما ست الهانم اوسى جات للدونيا .. ادتهولها

عشان مره فى رمضان لفوا لف على فانوس عدل ملاقوش ..

فكان دا من نصيبها

هى زى بنتى برضوا مش خساره فيها


***

عارفين يا ولاد انجى على ؟؟

المذيعه؟؟
ايوة ايوه اللى بتلبس مش لابس دى

ايوة هى..
عارفين بقى خالو سعيد؟؟

الطيار ؟؟

ايوة هو ده..

مالوا بقى

انجى تبقى بنتوا

انجى على بنت خالو سعيد ؟؟ الراجل الامور ده ؟؟

ايوة ايوة هى بنتوا

طب انتى تعرفى انهم وقفوها عشان بتلبس مش لابس!!!

***
هو ينفع اتنين كانوا بيحبوا بعض .. يرجعوا صحاب تانى؟؟؟

عارفين ان دايما اللى بيقول ااه ممكن نرجع اصحاب تانى ...هو دا اللى مبيحبش التانى

***

الشخص اللى يبان انك قريب منوا ... انت فى الاصل بعيد عنوا
و العكس
تعرف انى مخدتش بالى من ده الا لما بقينا بعاد عن بعض

خدت بالى كمان انك ساعات كتير بتتكلم مبيكنش قصدك تتطمن
لاء
دا مجرد فضول عندك عاوز تعرف حاجه معينه
و متجيش تسال الكلام دا عليا ولا مش عليا عشان انت اكيد عارف انى هقولك ملكش دعوه بزوق

***
بمناسبه الزوق
هو ازاى تدى حد استماره سته لحد بزوق

انا عن نفسى .. بقطع بدون اى مبررات
او بمشى بمبدا
"بتبعدينى عن حياتك بالمللللللللللللللللل"

***

هو غلط انى مبحبش حد يقرب من حاجاتى ؟؟

Saturday, August 07, 2010

Tuesday, July 27, 2010

وبس...






نفسى انام مصحاش ...!


Saturday, July 17, 2010

3-2010


لتانى مرة بقولها ...


خمس شهور و مش عارفه اخد موقف .... استاهل اللى يجرالى

Tuesday, June 22, 2010

Sunday, April 25, 2010

احن اكتر ..










و اقول انسااك .. احن اكتر

Sunday, April 04, 2010

شم النسيم..

الدنيا ريشه ف هوا... تيرارارارااا...طيرا بغير جناحااات .. تيرارارارااا .. و احنا النهارده سوااااااااا .. و بس خلاص

ريدبل .. بيعطييييييييك جوااااااانييييح

الجو تلج تلج تلج
رجلى برا البطانيه عشان احس باخر نفحات الشتاء
الجو برد برد برد
راسى مستخبيه و فاتحه حته صغيره فى البطانيه عشان اتنفس هوا بارد
لما بيكون الجسم دافى و الواحد يتنفس هوا بارد .. الواحد بيحس انوا عايش
زى بالزبط لما تقف تحت المطره و يبقى جسمك بردان و سامع صوت قطرات المطر حواليك
على راسك .. على كتفك .. على الارض .. حد بيجرى فى الميه جنبك
مكتف ايدك و حاضن نفسك عشان تتدفى
بردان .. و مستمتع باحساس انك بنى ادم

***

بطوط و الابجورات .
بطوت كان شغال فى مصنع للابجورات .. و طول ما بيعدوا من اودامو بيقعد يعد فيهم
بعد ما الشغل بيخلص ..برضوا بيبقى شايف الابجورات ماشيه قداموا
يعينى لحد ما بقى يتخيل ان البشر ابجورات
دخل ف روتين الابجورات
حياتوا بقت كلها عباره عن شويه ابجورات
كلها حاجه واحده مبتتغيرش
كل يوم ابجورات
هو انا هبقى زيه كده لما اتخرج ؟؟
كل يوم ابجورات ؟؟


***

ميكى جيب تؤسس شباب مصر

***

محمود ممكن يطلع متجوز .. و يكون عندوا عيال كمان على فكرة

" محمود طلع متجوز ..بس لسه معندوش عيال "
اكيد مراتواا مززززه
سورى يا مومو

***

"حلمت بيك امبارح .. و خايفه عليك"

انا لا فاكره حلمت بمين .. ولا خايفه على مين

***

يمكن انا اللى جايه ف توقيت غلط
لاء .. انا فعلا جايه ف توقيت غلط

***

دى حاجه مش بتاعتى .. بس هتبقى بتاعتى

3-4-2010

***

الجو حر حر حر
هو البتيخ هيطلع امتى
بيقولوا فى بتيخ ف كارفور
طيب لنفترض ان حصلت معجزة و جوزى اتنازل و قرر يطبخ هوا
هيتنازل برضوا و يقطع البتيخ ؟؟؟

***

انا هعمل حاجه جديده معملتهاش قبل كده.

***

الفراغ العاطفى بشكل اخر ..

***
بركات شم النسيم عشان اللى مبيصدقش
يارب تقومى بالسلامه ..

Saturday, March 27, 2010

ان تنسى





رحاب بسام بتقول ..

ان تنسى هو ان يصيح السؤال كيف ساتأقلم على الوجود........؟؟

بعد ان كان .. كيف ساتاقلم على الغياب.........؟؟ ...

Friday, March 12, 2010

بيحب غيرى..

من الحاجات الغريبه اوى انك تحب حد..... بيحب حد غيرك
و تبقى عارف ان الشخص التانى مبيحبوش
و فى نفس الوقت متقدرش تتكلم
اصل انت الصديق اللى بيساعد ف الاوقات دى .. مينفعش تزيد الطين طين
فيكون اسهل حل التزام الصمت

***

"اقف بجواره و عيناه تبحث عنها... و اظل بجواره اتامل كيف يبحث عنها "

***

"مش هتعرفنى عليها بقى"
الجمله اللى بتتقال و فى نفس الوقت ابقى من جوايا مش عايزه اعرفها اصلا
و لو عرفتها يكفينى اعرفها من بعيد
و لو عرفتها من قريب هيكفينى اعرفها بنفسى و امشى بحجه انى متاخره و لازم امشى حالا

***

حد لاحظ ان الولد لما بيكون بيفكر فى بين بيحط ايدوا ف جيبو
خصوصا لما بيكون بيفكر فيها و مش عايز حد يعرف انو بيفكر فيها

***
"عايز تعمل ايه فى حياتك؟؟"
"!! ... مش عارف"
" طب شايف نفسك ايه بعد 10 سنين"
"!!.. مش عارف"
" شغل كويس ... بيت كويس .. اسره و عندك عيلين "
"مممممم ايوة ممكن يعنى "
"طب نفسك تسافر ف مكان معين ...بعدين يعنى لما الظروف تسمح"
" مفكرتش قبل كدا .. طب و انتى عايزة تسافرى فين"
" فرنسا ..لان بابا كان عايز يروحها .. عايزة اعرف كان نفسو يشوف ايه هناك "
"ممممممم و عايزة تعملى ايه فى حياتك"
" على المدى القريب 3 حاجات .. اول واحده اروح بيتنا .. تانى حاجه مش هقولهالك .. "
" ليه مش هتقولى تانى حاجه"
"لو قلت هقطع علاقتى بيك"
"طب و تالت حاجه"
" انجح السنادى بتقدير "
"تانى حاجه ايه بقى "
" اقولك و نقطع علاقتنا ببعض ..؟؟"
" هههههههه ايوة ايوة قولى انا موافق"
"طب انا بتكلم جد مبهزرش"
"ماشى و انا كمان"
" ايه دا الباص جه .. يلا سلام"
"سلااام"

و هربت من تانى حاجه ..

Friday, February 19, 2010

عينااااك ليال صييييفيه..

مش عارفه ابدا من امبارح ولا النهارده
كان يوم كدا من الايام اللى مبحبهاش تعدى عليا .. فبلاقينى كل ما اصحى ارجع تانى انام
كنت عماله اقول فى حاجه ناقصه اوى
دى تانى مرة عيد ميلادو ييجى و افتكر لما كنت ......
كان هيبقى حلو .. بس اهو م الحاجات اللى مينفعش تتغير
رحاب بتقول ((شوف حضرتك.. ما ينفعش تسحب الرخصه .. عاطف مات.. و دلوقتى مين هيجيبهالى؟ بجد ما ينفعش.. انا مش هاعمل كدا تانى بس من فضلك ما تسحبهاش))
الموقف دا عدا عليا كتير اوى
مش الرخصه طبعا .. بس على نفس المنوال
قررت اعمل فولدر جديد و اسميه 2010 و يبقى فيه كل الحاجات الجديده
هو انا كنت بقول ايه
ااه رحاب بتقول .. اصل انا مكنتش عارفه اعمل ايه قلت اما اقرالها حاجه اشوف هيا بتكتب ايه
مين رحاب دى اصلا
مش عارفه هى ليه بتتكلم باسلوب "منى"
"منى" ..!!
هو انا من امتى بقولها "منى"..!!
مش قضيتنا دلوقتى طيب ..
هو انا كنت بقول ايه
ااه ما ينفعش تسحب الرخصه اصل عاطف مات .. مين هيجيبهالى دلوقتى ..
هو ليه الموت بياثر او بيعمل علامه كبيره اوى كده ف حياتنا مع اننا بنبقى عارفين انوا جاى جاى
طيب هو ليه ناس كتيره اوى بتحاول تنسى حب بحب تانى مع اننا عارفين ان الحاجات دى مش ممكن تيجى حاجه و تنسيهالنا
الحب الاول دا مبيتنسيش .. حتى لو كان عبيط .. لاء لاء مش عبيط ممممممممممم تافه .. لاء مشش تافه ..
حتى لو مكانش صح
حتى لو مكانش جاى فى وقته
حتى لو مخدش حقوا
حتى لو كان ساعات بيبقى شغل عيال
هو ممكن اتنين كانوا بيحبوا بعض .. يرجعوا اصحاب ؟؟
ساعات بقول ممكن و ساعات بقول استحاله
انا لحد دلوقتى مش عارفه احنا رجعنا اصحاب ولا لاء
ولا بتبقى فتره معينه بنرجع تكلم لان ......................و بعدين بنرجع ننسى ف دوشه حياه كل واحد
كانت بتبقى ايام كده و انا ماشيه ف الشارع بلاقى ابتسامه عريضه على شفايفى ..
و اخاف حد ياخد بالوا يقول مين الهبله دى ابص للأرض و و افضل ماشيه و انا منشكحه اوى
.. و ممكن يكون السبب حاجه هبله...لاء مش هبله .. ممكن حاجه بسيطه
موقف قديم افتكرته .. كلمه اتقالتلى زمان و كان معناها ليا حلو اوى و سمعتها مرة تانيه و فكرتنى بالموقف
و كانت بتبقى ايام تانيه و انا ماشيه الاقى حاجه تفكرنى بحاجه زمان كانت بتبسطنى
بس دلوقتى بلاقى هم الدنيا كلها ف قلبى
طب على فكرة متخافش تكتب حاجه جواك ابدا
و متحاولش تكتب حاجه مش جواك عشان مش هيبقالها طعم
متحاولش تقلد اسلوب حد عشان دا مش اسلوبك
دور على اسلوبك و ابتدى بيه
ساعات بس و انت بتكتب بتبقى محتاج بدايه تبتدى بيها ..
زى عاطف اللى كان بيجيب الرخصه ل رحاب بس هوا مات
سمعت صوتوا النهارده
لما انسبطت انى سمعت صوتوا خفت من انى اكون واخده قرار غلط او انى واخده قرار مش فى وقتوا
او قرار ف حاجه مش مناسبه ليه
ودا من الكلام اللى مش حابه حد يقراه عشان ممكن يتفهم غلط
او مش يتفهم غلط ..لاء ..يخاف منى اكتر مما هو خايف اصلا
مش فاكره قريت ولا سمعت فى حته وصف معين للحب
و مش هعرف اشرح اللى وصللى من الوصف
بس هو دا الشكل اللى بدور عليه
بقى هوا دا مفهوم الحب عندى و اكتر وصف اقتنعت بيه
مش حبك لشخص ..لاء حب شخص ليك
اصل انت لو بتحب شخص معين فبتبقى عارفه من جواك و متاكد و خلاص خلصت
انما حب الطرف التانى ليك دى هى اللى دايما بيبقى فيها شك
و اقتنعت انه باسلوب واحد بس بيكون فعلا حب بيور"مش عارفه اجيب كلمه تانيه غير بيور" بس هو كل يوم بيبعد عن مفهوم الحب بالنسبالى
و بيقرب من مفهوم حاجه تانيه .. اللى هى بتبقى ممزوجه بالحب او بيخبوها تحت قناع الحب
ايه قناع الحب دى .. اللمه دى قريتها مليون مرة
عايزة كلمه جديده
ممممممم
مفيش
لاء اكيد فى
فكرى
فكرى
فكرى
ما هى اكيد متقاله مليون مرة عشان مفيش غيرها
لاء اكيد فى غيرها
مش موضوعنا على فكرة
طب كنت بقول ايه
هو انا رغايه ؟؟
***
مش عارفه ليه دلوقتى افتكرت اول بوبى قمنا باقتناءه - ايه قمنا باقتناءه دى كمان؟؟!- لما رجعنا من برا
ولما اختفى فى ظروف غامضه و فى ايام الشتاء المطيرة
مكنتش عارفه انى هزعل اوى كده عليه ..
عايزة واحد تانى
بس خايفه اتعلق بيه زى الاولانى... فبلاش
انا اربى سمك ... لاء لاء كفايه عليا ارنوب صغير
بس انا فعلا معنديش وقت اصلا اربى نفسى عشان اربى ارنوب صغير
مش لازم مش لازم

هو كنت بقول ايه
ااه ..
يوم بيبقى غريب الملامح و ناقص منوا حاجات كتيرة اوى ..
بس يفضل معلم ف قلبك بكل تفاصيله و تعتبره احلى يوم عدى عليك ف حياتك اللى فاتت
يوم تانى يبقى كامل بكل معنى الكلمه و المفروض يكون هوا دا احلى يوم عدى عليك ف حياتك اللى فاتت
.. و اما ترجع تفكر فيه تلاقيه يوم عادى زى كل الايام
طيب مش مهم اللى فات
المهم اللى جاى
انا عارفه ان احلى يوم ف حياتى لسه معداش عليا
لسه هاييجى
دا ميمنعش ان فى ايام كتيره حلوة عدت عليا
بس احلاهم لسه ماجاش



ساعات السما بتتكلم
ساعات بتبقى ساكته و مفيش على وشها اى ملامح لأى شىء

***

هو احنا ليه بننجرح .. طيب افتكر عارفه الاجابه .. هو احنا ليه بقى ساعات بنجرح
طب هو الاصعب اننا نجرح ولا نظلم
ولا هما الاتنين زى بعض
طيب ممكن تظلم نفسك عشان خايف تجرح حد
طيب ممكن بعد كده منتسرعش ف قرارات
عشان منرجعش و نقول "مكانش قصدى اجرحك بس هو دا اللى حصل" و هيحصل كمان على فكرة
ممكن حد مش عاوز يتغير ...بتغير؟؟
ممكن حد عاوز يتغير .. ميتغيرش؟؟



على فكرة فى سيلانترو جنب ماك اللى فى عباس
بس الناس مبتاخدش بالها منوا



طيب هو الاصعب برضوا انك تحب حد مبيحبكش ..
ولا ان حد يحبك و انت مبتحبوش


و ماجده بتقول .. عينااااااااااااك ليال صيفييييه و روئ و قصائد وردييييه..و رسائل حب هاربه ... من كتب الشوق المنسيه

صيف ..وردى ..رسائل حب ..شوق

هو ينفع اقول حاجه بعد الكلام دة !!!

Saturday, February 13, 2010

13-2-2010




ساعات فى حاجات بتفقد معناها لما بنتكلم عنها

ساعات بيبقى حتى مافيش كلام يقدر يعبر عنها

و مجرد بنفتكرها بابتسامه و نفس عميق ..

---------------

happy Valentine Day ..

يارب كل اتنين حبايب يقضوا يوم حلو سوا ..

و يارب كل اتنين متخاصمين يتصالحوا ..

اهم حاجه .. مفيش بنت تجيب هديه لحبيبها دبدووووب :D

و مفيش ولد يجيب لبنت بوكيه ورد :P

و محدش يدى معاد للتانى و يتاخر عليه

:D


و اهم حاجه ف دل كلوا محدش يسالنى دى صورة ايه :D