Saturday, July 07, 2007

....اشتقت لروحك


فى المقهى

اجلس انا واختى

نتبادل اطراف الحديث

نتذكر الماضى

بكل ما فيه من فرحه

بكل ما فيه من بهجه

بكل ما فيه من حزن

بكل ما فيه من الم

نعم

انا اعلم ما الذى تخافى ان تذكريه

نعم نجلس سويه نتكلم

و نخاف ان نفكر فيه

نبكى بداخلنا

لكن على وجوهنا ابتسامه

ابتسامه مليئه بالالم

نفكر فيه طوال الوقت

ونخاف ان نتكلم

نخاف ان نتذكره

لكننا دوما نتذكره

انه ما زال معنا

نعلم انه هنا .. لكن اين

نعتقد انه سيعود يوما

لكنه لا يعود

نعم .. لن يعود

اين .. و متى ذهب

كيف

انها مشيئه الرحمن

نعم .. مشيئه الرحمن

و لم تبقى لنا ذكرى منه

سوى تلك الصور

سوى هذه الدموع

سوى هذا الالم

الذى يكاد يحتل ارواحنا

انا و انت نبتسم

و نعلم ان بداخلنا يبكى

بيكى على هذا الطفل

هذا الطفل الذى ذهب

نتمنى ان يعود

نتمنى ان نلمسه

نتمنى ان نحتضنه

نتمنى و لو نشعر بدفئه

نعم .. نتمنى

و لكن كيف

فقد مات

مات ضحيه رجل مستهتر

نعم مات

هل يمكن ان يعود

هل يمكن..

لا .. لا يمكن

لن يعود .. فقد ذهب

غادرنا بلا عوده

انظر الى عينيك

اعلم انك تبكين بداخلك

اعلم انك تشعرى انه هن

ما زلت اسمع صوت ضحكاته

نعم .. انى اشعر به

نعم

انه دافىء

انه ملىء بالام

لملىء بالحياه

لقد كان يجلس هنا

كان يجلس و يداعبنى

نعم

كقط صغير

لكن لم يتبق منه شىء

سوى هذه الصور

و هذه التفاصيل الصغيره

نعم

اعلم انك تريدينه مثلى

تقولين احبك يا اخى

و اموت كل يوم من فراقك

و لكن

يا اختى .. ابتسمى

فاخانا الملىء بالحياه

عند ربى

نعم انه عند ربى

فابتسمى ولا تحزنى

ابتسمى ولا تتالمى

احبك يا اخى

بل و اعشقك



انا كتبتها من فتره كده

و دلوقتى و انا بكتبها تانى عارفه ان فى حاجات و كلمات عايزه تتظبط

بس حبيت اسيبها زى ما هى لسبب خاص كده

...:)

و معلش بقى بقالى فتره عماله اجيب لكوا حاجات كئيبه

استحملووونى اصلى باجى اطلع هنا بقى

"وش مكسوووف"

25 comments:

المتوحد said...

عزيزتى كاتروز
الاطفال لما بيروحوا عند ربنا بيبقوا ذخر لاهلهم، وسبب لرحمتهم، ارواحنا تشبه الامانة المستعارة، والحقيقة الكبيرة انها اكيد هترجع لصاحبها، انا متاكد انك فاهمة اللبقولوا، ،
ولا ابدا انت فى مدونتك تعملى اللى انت عايزاه،مش هو دا السبب اللى بيخلينا نكتب؟ ان احنا نفك عن نفسنا
وبعدين انت اللى قلتى الكلام دا قبل كدا
بقالى مدة بخش ومفيش جديد، اتاخرت ليه
ربنا يوفقك
وتحياتى لك

Anonymous said...

:) :)

..........

mariamagdolen new said...

الله يرحمة معلش كلنا هنموت والله الموت رحمة

Lost Love said...

حلوه اوى يا اوزا
هبقى اعرف ايه الموضوع اكييد يعنى
بس الكلام حلو اوى بجد

Fedaa AL Eslam said...

يااااااااااااااه عليكى يا كاتورز ايه يا بنتى ده بجد ما شاء الله عليكى

انتى اكتر من رائعه واحساسك بجد بيوصلنى جدا جدا

ربنا يباركلك

§a§a said...

جميله جدا

خطــاب said...

خواطر جميلة

بالتوفيق

المجاهدة said...

انتي معاكي حاجات كتيرة كويسة :)

معاكي الذكريات... و بطبعنا مع الوقت بننسى الحاجات الوحشة لما يكون حد بنحبه اوى...

ف انتي معاكي كل الذكريات الجميلة
و عارفة انه ان شاء الله في مكان احسن بكتير دلوقتي :)

محتاجة تصبري شوية... :)
و تفضلي محتفظة بالذكريات الحلوة و تعرفى انها كنز حقيقي :)

FloNa said...

انتي محتاجة اكتر انك تعيشي لحظاتك دلوقتي

يا بنوتة انتي لحظات الشباب دي مش حتلاقيها بعد كدة :)


والله استغلي كل فرصة انك تخرجي وتتبسطي

الحياة مش بتنتهي بجد


ويابخته اللي ربنا بيبتليه بمصيبة وبيصبر عليها

ربنا يكرمك يارب

catroz said...

المتوحد
فعلا الاطفال بيكونوا ذخر لاهلهم
و دى الحاجه الوحيده اللى تبسط الواحد فى الموضوع كله
الحمدلله
ربنا كريم اوى و رحيم بينا

بس انا كان هدفى من المدونه الاول اخلى الناس تخرج من حاله الحزن او اليأس او الاحباط
و اقدر اخليهم متفائلين اكتر
لكن للأسف انا اللى بنكد عليكم تقريبا مش اكتر
...:(

انا فعلا بقالى فتره لا جديد
عندى افككار كتيره و مواضيع كتير
مش فايقه للأسف اظبط اى حاجه اليومين دول
ان شاء الله خيير
....:)

catroz said...

Anonymous...

صديقتى العزيزه

عايزه اعرف ليه مش عارفه تتكلمى

.........
mariamagdolen new

فعلا كلنا هنموت

و الله روحى اشتاااااقت للجنه

....:)

catroz said...

Lost Love...
انتى الاحلى يا حبى
بس تعرفى موضوع ايه
اعتبريها خواطر و بس
متفكريش كتير
و متحاوليش تسالينى
:D

...........


Fedaa AL Eslam ...

ربنا يكرمك يارب يا بنتى انتى
انتى كمان احساسك حلو اوووى فى الحاجات اللى بتكتبيها
ربنا يكرمك يارب
.....:)

catroz said...

§a§a..

منورنا يا مصطفى

....:)

.........

خطاب...

جزاك الله خيرا

catroz said...

المجاهدة ...

فعلا معاى حاجات كتيره اوى الحمدلله كويسه
و فعلا انا مش بفتكر الحاجات الوحشه الحمدلله
بفتكر الجميل بس
ده نعمه من عند ربنا
و فعلا هو فى مكان اروع من هنا بكتييير اكيييد
...:)
فعلا الزكريات الحلوه دى كنز حقيقى
........:)

catroz said...

FloNa ...

انا عايشه اهو
و عارفه ان اللحظات دى مش هلاقيها بعد كده
عشان كده بعيشها دلوقتى اهو
بحاول اخرج و اغير جو
بس اهو مش عارفه اغير المود لسه يا فلونا و الله
و عارفه ان الحياه منتهتش
بس يلا هى فتره و هتعدى على خير ان شاء الله
و فعلا
يابخته اللي ربنا بيبتليه بمصيبة وبيصبر عليها
متتصوريش بناخد حسنات قد ايه
:D
ربنا يكرمك يارب يا قمر
....:)

Samir said...

عمرنا ما بننسى حاجات زي دي. أنا كمان اخويا الصغير راح ضحية الاستهتار اللي ملأ بلدنا. راح مع باقي الأطفال يأخذوا التطعيمات بتاعة شلل الأطفال. الله يذكرك بالخير يا تيتة سوزان بقه. المهم الجرعة طلعت فاسدة. هو وعشر أطفال اتأثروا بها جامد. وفضلنا عشر سنين نتفرج على ماجد وهو وردة بتدبل. كل يوم بتقع منها ورقة. اللسان عجز عن الكلام. الرجلين ما عادتش بتمشي زي زمان. مش عايز افتكر علشان ماعيطش وانا في الشغل.

ماجد وغيره لهم رب

معرفش انت رجعتيني للذكرى دي ازاي
شكرا ليكي

mohamed said...

المعنى والشعور اللي في الكلامات اكبر من اني اعلق عليهم
لانه صلدقة جداً معبرة جداً انسانية جداً

The Alien said...

كلنا مليانين ذكرايات
وحتي الحزينة منها بيبقي جميل لإننا بنفتكره بشكل مختلف
وبجد احساسك وصل
أتمني تفضلي تكتبي وتطلعي

تحياتي

break said...

ربنا يرحمه

ويفك عنا وعنك
تحياتى

DR_NIGHTWING said...

اه كم يؤلمنا الفراق و تحس بأن قلبك لا شيء به سوى الفراغ . . السواد

ولكن عليك ان تسمح للاخرين من حولك بأن يملء هذا الفراغ

safa7_karmooz said...

مش هينفع نلووم نفسنا لوقت طويل

ومش هينفع نقعد زعلانين لوقت طويل

مش بقولك انسى ...ولا نفضى ...

بقولك عيشى حياتك...

اخرجى...ابتسمى...ودى فعلا اهم حاجه...

الاحساس بالرضا بيبقى شىء ممتع جدا...

وهما عالطول جوا قلوبنا قبل عقولنا...ومش ينفع ننساه..

بس لما نفتكرهم نفتكرهم باشتياق اننا نشوفهم فى الجنة ان شاء الله

فيه كلمة سمعتها من بنات كتير لما والدهم او اى حد يتوفاه الله انهم نفسهم يموتوا فى سن صغيرة ...ويعملوا ويسووا...

كل شىء مكتوب عند ربنا ...المهم الطلب اللى هما عاوزينه...شايفين انهم مجهزين نفسهم فعلا للقاء ربنا ؟؟؟
شايفين فعلا انهم لو ربنا توفاهم فى اى لحظة هيبقوا مستعدين...

معتقدش حد هيقول ااه لانه بكده هيضحك على نفسه

امبارح كان فيه شبح ابتسامة ...ياريت نشوفها المرة الجاية ابتسامة كامله ..

catroz said...

Samir.....

ربنا يعوضك خير يارب
انا اسفه بجد انى فكرتك بحاجه زى كده
و عمرنا هننسى
بس هنفتكر الحاجات الحلوه بس
بس انا مش مصدقه ازاى الجرعه تطلع فاسده
و 10 اطفال يموتوا
لا حول ولا قوه الا بالله
لا حول ولا قوه الا بالله
لا حول ولا قوه الا بالله
ماجد..اخوك الصغير
دلوقتى فى الجنه
احسن من الدنيا اللى احنا فيها مليون مره
ده قضاء و قدر ربنا
هتقابله فى الجنه ان شاء الله
و هتبقى مبسووط اوى
ربنا يكرمك يااااارب
و يصبرك و اهلك على الابتلاد ده
انت متتصورش لما حد بييجى له ابتلاء و بيصبر عليه
ربنا بيديله حسنات قد ايه
قول الحمدلله
بس افتكر دايما تقول الحمدلله
و الحمدلله على كل شىء
...:)
انت قوى اوى على فكره عشان قدرت تتكلم على حاجه زى كده تانى
و اسفه بجد اسفه اسقه انى رجعتك للذكرى دى
...:(
الحمدلله يا ربى ان اخوى هيروح الجنه

catroz said...

Mohamed….
ربنا يكرمك يارب
الكلام ده كتير على
بالعكس و الله انا حاسه انى فاقده الاحساس فيها اوى
و الكلمات مش حيه
كلامك جميل اوى
...:)
--------------


The alien….

فعلا محدش فينا خالى من الذكريات
و الحزين و السعيد منها بيبقى ليه نكهه معينه كده
تحياتى....
و مهما كان سعيد بنحبه اوووووى
اكيد هفضل اكتب و اعبر عن نفسى و اطلع حاجات كتيره
متزهقوش منى بس
:D
مهما كان حزين بنحبه

catroz said...

Break….

اللهم امين
ويصبر كل المسلمين
تحياتى

-----------------


Dr_nightwing…..

فعلا كم يؤلمنا الفراق
بس فى الاول بس بتحس ان قلبك مليان فراااغ
.........:)
جوانا طاقه حزينه
ممكن نحاول نخرجها فى حاجات تانيه كتيره اكيد
انا بحاول استفيد من الموضوع ده
بدل ما اقع
لا بحاول ارجع اقف على رجلى تانى و اساعد نفسى و اساعد اللى حوالى
و زى ما هساعدهم هيساعدونى اكيد
منور البلوج
مع الوقت بتحس بنوع من الامل

catroz said...

مش بنلوم نفسنا..:(
مش زعلانه..:(
مش هنفض ولا هنسى
هحاول اكمل حياتى
ما هو الدينا مش هتقف
بحاول احس بالرضا و مفكرش فى اللى فات
و كنا ممكن نعمل ايه
و ايه اللى المفروض مكناش نعمله
و مواااااااال طويل كده
و هما جوا ارواحنا و استحاله ننساهم
دول جزء مننا
و اتمنى بجد اقابلهم فى الجنه
ياااااااه
يااااااارب
..........:)
انا فعلا نفسى اموت و انا صغيره
بس بجد لما بفكر
بحس انى مش مستعده لحاجات كتيره اوى
ربنا يغفر لنا بجد
.........:)
فعلا كل شىء مكتوب
و كل شىء فى وقت محدد
ربنا يرحمنا برحمته
.........:)
امبارح اتقالت لى كتير كلمه شبه ابتسامه دى
تقريبا من كل اللى كانوا موجودين
ربنا يسهل
بحاول اافوق اهو
الواحد مش عارف يعمل ايه

...........:)