Friday, August 24, 2007

اتكسر .. و مش هيتصلح...



بقالى كام يوم كده مش فى المود خالص..نفسى افضفض شويه
اصل فى حاجه اتكسرت من شهرين كده ومش عايزه تتصلح...
لا هما مش شهرين .. هما شهرين و يومين
كنت دايما بقول الوقت بينسى .. و الله ولا بينسى ولا حاجه
حاجه كل ما افتكرها اقعد اعيط كانها لسه حاصله امبارح
مع انه عدى شهرين و يومين
ممكن يبقى معاى قلم .. و يتكسر..مش هعرف اكتب بيه تانى
بس ممكن اجيب غيره
ممكن معاى ساعه و تتكسر .. عوضى على ربنا .. ممكن اشترى واحده جديده
بس عارفين بقى لما حاجه تتكسر جواك
هتقدر تجيب حاجه بدالها
معتقدش..اصلا لا .. استحاله
اهو فى حاجه اتكسرت جواى من شهرين و يومين
ممممممم .. مش عارفه ليه مش راضيه تتصلح ...هى شكلها اصلا هتفضل مكسوره كتير كده
اصلها حاجه معنويه مش ماديه
بس تصدقوا مش انا بس اللى جواى حاجه اتكسرت
لا مش انا بس للأسف
و لما ببص للى حوالى .. ياااااه يمكن بندحك .. يمكن مبسوطين
يمكن بنخرج ..ساعات بنهيس مع بعض
بتيجى لحظات كده وسط ما احنا مبسوطين و بندحك
نلاقى حد فينا نزلت منه دمعه غصب عنه
ابص الاقى كلنا حاطين قناع ..بنمثل اننا ناسيين
بس فاكرين كل حاجه .. و مفتقدين كل حاجه
و وش الابتسام .. يتحول لدموع من تانى
ايوه اصل دى حاجه اتكسرت
عارفين لما شخص كان بيمثل كل حاجه تقريبا لبنى ادم معين
و فجاه ميبقاش موجود
و نفضل كل يوم كده مستنيينه .. اهو انا دلوقتى مستنياه
انا على يقين انه مش راجع تانى...بس برضه بستناه
و الله مش بطلب كتير .. مقابل اى تمن اشوفه تانى
عايزه بس الصبح اروح اصحيه من النوم و اقوله خد اجازه النهارده
يقولى لا ..لازم انزل الشغل
و يقوم براحه و نسيب ماما نايمه
و احضر له الهدوم اللى هيخرج بيها و كبايه الشاى
و نقعد نرغى شويه كده و بعدين ينزل الشغل
ساعات بقى ببقى نازله الجامعه فى معاده .. كان لازززززم يوصلنى
و برضه نقعد نرغى و احنا فى العربيه ..ياااه
و الله الواحد لو كان عارف قيمه الايام دى مكانش هيعديها بالساهل كده
كذا مره كان يقولى تعالى نتعلم سواقه .. مرحتش غير مرتين بس
اتعلمت شويه حاجات بسيطه كده
و فجاه اول شهر 6 قررت انى الصيف ده هتعلم السواقه على ايده
يوم 22 نفس الشهر .. عرفت انى كنت جايه متاخر اووووى
الشهر ده كان مميز اووووى بطريقه غير طبيعيه
كانت ايام الامتحانات .. و علينا ضغط جامد اوى
و هو كان عنده شويه مشاكل فى الشغل
اتخانقنا فى يوم .. و بعديه جه هو صالحنى .. لما عرف انى اتظلمت
و الموضوع اتفهم غلط اساسا
.........:)
وحشنى لما كان بينزل بالجلبيه البيضه يشترى لنا الطلبات
و اقوله اوعى تنسى البيبسى .. يقولى من غير ما تقولى عارف و الله
و ييجى من غيره..اقوله فين .. يقولى نسيييييييييت
انا كمان طالعه زيه
بنسى اسمى ساعات كمان
كان عارف انى فاقده الامل فى السنه دى ...كنت بشد فى شعرى اساسا .. و مكنتش بعرف انام ساعتين على بعض
جه فى يوم بالليل ..كنت على غير العاده بذاكر
قالى بتعملى ايه .. قلت له دماغى اتلحست بالعبرى اللى بذاكره ده
وبعدين كفايه المواد اللى شايلاها الترم الاولانى ..الواحد لازم يحترم نفسه و يعدى صافى
و قمت معيطه..:D
الراجل حضنى و قالى و ايه يعنى لو شلتى الترم التانى كله
فى الاول و الاخر انتى بنتى اللى بحبها
اعملى اللى عليكى وربنا يكرمك
اهو انا دلوقتى محتاجه الحضن ده اوى
بس مش لاقياه
اصله اتكسر
و مش هيتصلح
............:)

61 comments:

ولــــــــــو said...

انا اسف جدا
انا مش هاقدر اواسيكي عشان انا مش مريت باللي انت فيه
بس اللي متأكد منه انه مش انكسر
دي اراده ربنا وطبيعه الدنيا ناس بتمشي وناس بتيجي
لكن دايما حبايبنا بيكونوا معانا مهما راح الجسم وبعد بتبقى الروح معانا
والله مش كلام وخلاص انا عندي اقتناع كامل بده
ربنا يصبرك وربنا بيبتلي الناس اللي بيحبهم عشان يجازيهم بعد كده
انا بطبعي مش بتأثر كتير لكن انا بصراحه اكتشفت اني باتأثر جامد لما الكلام اللي باقراه يكون طالع من القلب
خالص تحياتي وسعيد جدا بمعرفتك
انا ف الطبيعي باقول اني اول كومنت
بس ده النهارده مش يهمني
يهمني انك تعرفي اني مبسوط جدا اني علرفت البلوج بتاعك
سلام

NeRmeeN said...

صباح الفل يا جميلة

ايه المود ده بس...ربنا يصبرك وان شاء الله يجعل الالم اللى انتى حاسة بيه ده فى ميزان حساناتك ان شاء الله..انتى بس كترى من ذكر الله ..واعرفى انها دنيا و هتخلص بسرعة اوى
شدى حيلك انتى بس ...بالله عليكى (حلفتك بالله اهو ) انك ماتتسيبيش نفسك للاحزان دى وحاولى تخرجى نفسك بسرعة ....بذكر الله و التقرب ليه ..وكمان حاولى تقعدى مع ناس او صحابك اللى بتحبيهم وتقضوا مع بعض وقت ظريف ..لااااازم تخرجى نفسك من المود ده

وربنا يصبرك

تحياتى.. اختك نرمين

catroz said...

ولــــــــــو...
لا مش تتاسف
يلا الحمدلله
بس انا عارفه انه اتكسر
بقالى شهرين بحاول اصلحه مش راضى يتصلح
لازم ناس تمشى و ناس تيجى
بس فى ناس بتمشى فى وقت مش مناسب ابدا
بنبقى محتاجينهم بجد
و فجاه بيمشوا ..:(
حاسه انه موجود لسه .. بس يا ترى هو موجود فعلا
ولا لا ..
ما هو اصل الشعور ده ممكن يكون موجود عندى لانى على طول متعوده انه يبقى هنا

الكلام طالع من جوه اوووى ..
نفسى يخرج منى وميرجعش تانى
بس هو جوه فعلا
انا كمان مبسوطه لانى عرفت البلوج بتاعك
ويارب دايما منورنا
سلاماات ..:)

catroz said...

NeRmeeN...

اولا منورانى بجد يا نرمين
معلش هو المود ده بييجى للواحد كل فتره كده
ما هو الواحد مش هيفضل مبسوط طول حياته يعنى
و الله بحاول اكثر من الدعاء على قد ما اقدر يا نرمين
ربنا يرحمه و يغفر له و يسكنه فسيح جناته
ويجعل قبره روضه من رياض الجنه
ياااااااارب
اكيييييييد هخرج من المود ده .. متقلقيش
دا انا حتى كده كويسه .. دا فى اوقات بتعدى على الواحد كتيره اسوا من كده

منورانى بجد يا نرمين
.....:)

الدرويش المرووش said...

أسلوبك فظيع الجمال و مؤثر جدا

البقاء لله و ربنا يتولاه برحمته و يصبرك و يجزل ليكى الأجر

و فى كل حال إحنا كلنا ضيوف فى الدنيا دى

بس كلنا بننسى

logarithms said...

أبكتني كلماتك
رزقك الله الصبر وأهلك

klmat said...

كلامك طالع من القلب
علشان كده دخل قلبى على طول
مش عارفه اقولك ايه
غير ان ربنا معاكى
ويجغل مثواه فىالجنه
ويكون فى مكان افضل منا
اسلوبك جميل واحساسك
مرهف
دعواتى القلبيه لك
بكل الخير

Mohamed Elshal (shix) said...

بجد اتاثرت جدا من اسلوبك الجميل
وربنا يرزقك الصبر
بس اهم حاجه انتى متنسهوش سواء بالدعاء لان ده اهم من الحزن
الحزن لا بيرجع حاجه راحت
وانتى مؤمنه بالله فاصبرى واكثرى التقرب من الله والدعاء له
ربنا يرحمه ويدخله فسيح جناته
امين

catroz said...

الدرويش المرووش ...

اللهم اميييين..
ربنا يرحمه و يغفر له
فعلا كلنا ضيوف هنا
المهم الاخره
بس مش كلنا بننسى للأسف ..:)

catroz said...

logarithms ...

اسفه بجد مكنتش اقصد
...:(
اللهم امين
و ربنا يرحمه و يسكنه فسيح جناته

catroz said...

klmat ...
اللهم اميييين
يارب يكون دلوقتى فى الجنه
و مكان احسن مننا
يارب
ربنا يكرمك يارب
.....:)

catroz said...

shix ...
اكيد منقدرش ننساه من الدعاء
الحزف فعلا لا بيرجع حاجه ولا بتاع
بيتعب الواحد و بس
ربنا يرحمه و يدخله فسيح جناته
و يجعل فبره روضه من رياض الجنه
اللهم اميييييين

.......:)

keda-sponsor said...

أنا فعلا عيطت و أنا بقرا البوست ده
تعيشي وتفتكري
و ربنا يلهمك الصبر و السلوان
حاولي تحققي إللي هو كان عاوزه منك .... ده أساسا أملهم في الحياه

سلااااااام

break said...

ربنا يصبرك
بجد مش عارفة اقولك ايه
كلامك خارج من قلبك اوى
لانى حسيت بكل كلمة
رغم انى معشتش التجربة بالظبط
بس ربنا يرحمه ان شاء الله
و اكيد دعاكى ليه احسن حاجة تفرحه بيكى دلوقتى

catroz said...

keda-sponser ...

انا اسفه بجد
مش قصدى ان حد يعيط و الله ..:(
و الله بحاول احقق اللى هو عاوزه
يارب اقدر بس
يارب
اكيد هقدر ان شاء الله
منورنا بجد
سلاااااااام

catroz said...

break...

ربنا يكرمك يا قمر
صعبه اوى التجربه
ياريت متعيشيهاش
كلنا بندعليه ربنا يرحمه
و يغفر له
يارب

منورانى يا قمر
....:)

ThE InViSibLe said...

بجد مش عارف أقولك ايه بجد
غير ربنا يصبرك
بجد أنا عارف أنها حاجة صعبة عشان أنا مريت بيها للأسف

ربنا يرحمه ويدخله فسيح جناتخ
آميين آميين آميين

بس الحمد لله الحياة ماشية
مش هقولك تنسي عشان مفيش حاجة أسمها كدة بس هقولك بدل الزعل أحسن حاجة تعمليها انك تدعيله بالرحمة

بس بجد أسلوب كتابتك رائع يا رووز
بس بلاش الموود دة بقى
^_^

catroz said...

ThE LeGeNd..

يارب يا محمد محدش يمر بالتجربه دى ابدا
هى صعبه اوووووى بجد
و بتولد شعور بيقتل
....:(
اللهم اممممين
ربنا يرحمه و يجعل قبره روضه من رياض الجنه

فعلا الحياه اهى ماشيه
و محدش بينسى
بحاول اهو اخرج من المود ده تانى
هيتعبنى اكتر انا عارفه
...:)

منورنى بجد يا محمد ...:):)

بنت القمر said...
This comment has been removed by the author.
احساس لسه حى said...

عزيزتى
ازاى تقولى انكسر
دايمن اللى بينكسر مش بنفتكره
احنا لازم نعرف ان حياتنا بتتنفس بوجود الاخرين بس منحددش مين هما الاخرين دول لازم مع كل وقت وكل زمن وكل حياه ليها ناسها ناس بتروح ويجى غيرهم ربنا بيعوضنا بغيرهم
المهم اللى يروحوا يا حاجه من اتنين
يايسيبوا ذكرى حلوة نفتكرهم بالخير
يا ذكرى وحشه نفرح ببعدهم
ولازم على اد الذكرى اللى نفتكرها نفتكرهم ونحاول نديهم
سلام

catroz said...

احساس لسه حى...

لا .. هو انكسر ...لانه معادش موجود
ازاى اقدر انساه..دايما هنفضل فاكررينه
ده الاكيد
فى ناس معينه حياتنا بتتنفس بيهم
بيقلوا مع الوقت
بنحاول نجد ناس بديله ليهم مش بنلاقى ناس زيهم
هو راح و سايب ذكرى حلوه اوووى
و فاكراه اوى
ربنا يرحمه و يسكنه فسيح جناته
.....:)

زى الهوا said...

بس هوه ما اتكسرش ياكاتروز ماهو عايش جواكى اهه وكل كلمة وكل حركة اديكى فكراها , احمدى ربنا يابنتى فى ناس باباهتهم مايتين من صغرهم ماشفوهمش حتى بالجلبية البيضة , ولا يعرفوا يميزوا ملامحهم , حاجات كتير اوى بنعيش على ذكراها , اعتبرى دى حاجة منهم طالما مافيش بايدك حاجة , وحاولى تشيلى الحزن من قلبك وماتخليلوش مكان , وانا من ناحيتى هادعيلك ربنا يفك كربك

catroz said...

زى الهوا..

مش عارفه ... بس بحس ان الحاجه دى اتكسرت جواى انا
امممم
فاكره كل كلمه و كل حركه و كل همسه
و كل ضحكه و الجلبيه البيضه و الشبشب البنى
ياااااااااااااه بجد
الحمدلله الحمدلله الحمدلله بجد
فعلا دى حاجه منه موجوده لسه بجد
ربنا يرحمه
يااارب يا بنتى
ربنا يكرمك يا قمر يارب

منورااااانى يا جميل ..:)

Ehab said...

اول مره اجي هنا بس مش عارف اقولك ايه احساسك طبيعي عشان بتكلمي على ذكرى قويه عندك
كل اللي اقدر اقوله ليكي ان الحمد لله ان الأيام اللي قضتيها معاه كانت جميله وسابلك ذكرى جميله وحب في قلبك يكفيكي سنين وانك اكيد هتفضلي دايما فاكراه وبتدعيله وصدقيني انتي اسعد حظا من ناس كتير اهلهم عايشين معاهم ولكن ابنائهم بيتمنوا موتهم بسبب قسوتهم او سوء العلاقه بينهم صدقيني احمدي ربنا انه اكرمك ببعض السنوات الجميله في حضن ابيكي الرائع واحمدي الله على ابتلائه واعلمي ان اجرك عند الله اذا احتسبتيه عند الله سيكون عظيم وسينتفع ابيك به ايضا
بجد اجمل حاجه انك تفتكريه بالخير وتدعيله واوعي تبكي تاني لأنه انشاء الله في الجنه ينتظرك بعد عمر طويل ليكي
تحياتي وسعدت بمعرفتك
سلاااااااااااااااام

AMRO .O. ABDELHALIM said...

هاااى كاتروز
احيانا بتبقى الكلمات ملهاش معنى، لما تكون مشاعرنا اكبر من كل الكلمات، مش عارف اقولك ايه ، انا حاسس بكل كلمة، والدى توفى وانا عندى خمس سنين مش فاكرو اوى بس فى فترة من عمرى كنت حاسس انى محتاجو اوى، الحب الكبير اللى بتحمليه لبابا لازم يتحول لطاقة ايجابية من الدعا المتواصل ليه ومن انك تعملى دايما عشان تكونى ناجحة وسعيدة ذى مهو وكل اللى بيحبوكى يتمنولك دا
ارجوك مش توقفى فى اى مححطة الحياة جميلة بس حكمة ربنا ان يختبرنا بالحزن والالم والفراق
تحياتى ليك

§a§a said...

طبعا احساس فقدان شىء دا حاجه صعبه وطبعا انا شم اعرف اقولك ايه بصراحه الا ان دى ارادة ربنا ليه فى هذا الامر حكمه

ربنا يقويكى يارب وان شاء الله خيرا

mohamed said...

:)

ادعليله

ربنا يرحمة ويجمعك في الجنة ان شاء الله
كلامك عنه جميل اوي
الحمد لله ان العلاقة بينكم كانت جميله كدا


ربنا يجبر كسرك

Fedaa AL Eslam said...

يعنى بجد والله يا كاتورز الواحد مش عارف يقولك ايه

انا بحس انك احساسك عالى جدا فى كل الى بتكتبيه خاصة انى فعلا حاسه بكل حرف انتى كتبيتيه وعايشه فى ان وماما واخواتى


بجد ربنا يصبركوا ويصبرنا ويقدرلكوا الخير

احساس لسه حى said...

عزيزتى
اللى بينكسر بيتغير معالمه جوانا اما هو بس بعد عننا وهو لسه زى ما هو متغيرش فيه اى شئ
على العموم يمكن احساسنا مختلف بكلمة انكسر
كمان مردتيش فى البوست عندى تبتدى تالت بدايه ولا تصبر
مستنى ردك
سلام

Diyaa' said...
This comment has been removed by the author.
Diyaa' said...

ممكن اللي هكتبه يكون نظري
بس يمكن ميكونش نظري لأني مريت بالكسر ده أكتر من مرة
اه مش مريت باليتم وبافتقاد الحضن ده وبالاحساس بإني ضيعت وقتي ووالدي عايش والكلام اللي عبرتي عنه ببساطة وتلقائية ومن غير احتراف ولا أي حاجة
مش هكدب وأقول عيطت بس الرعشة فضلت في جسمي كتير أوي..رغم إني من هواة التأثر بسرعة والجو فجر ومناسب للعياط ..بس لعدم جدواه في المواقف دي ولأن أسلوبك أقوي من إنه يخليني أكتفي بالعياط
فأنا عايز أقول إن اللي زي الانسان الجميل ده عمره ما يتكسر طول ما نسله موجود في الدنيا وذريته الصالحة مش ناسيين واجبهم ناحيته وناحية اللي خلقهم وخلقه
أعتقد إنه اللي خلف زيك مماتش وإنتي فترة بس تستمدي فيها قوتك من إيمانك بالله ومن أحضان كتير مش هتعوضك عن ما سميتيه بالشئ اللي انكسر ..لكن هتديلك القوة اللي تخليكي تكملي
وتفكرك بإن اللي خلف ما ماتش
ربنا يرحمه ويغفرله ويخلده في جنته مع كل اللي بيحبهم وبيحبوه
ومش بس والدك الجميل ..لأ كل الناس الجميلة..اللي ينطبق عليهم مقولة إنهم مشيوا من الدنيا بس لسه حسهم فيها
بعملهم الصالح وبحنانهم وبانسانيتهم

وعلي فكرة
معتقدش إنه كان بينسي البيبسي ..متهيألي كان خايف عليكي من إدمانه
أنت هتقوليلي عن الأب ...بإذن الله هتجتمعي بيه تاني واللي انكسر يتصلح
شدي حيلك بقي واثبتيله إنك بنته حبيبته
سلام عليكم

catroz said...

الشنكوتى الكبير...

منورنا اولا بجد

فعلا كانت ما اروع الايام ..
مع انى معرفتش قيمتها الا دلوقتى
سابلى زكريااات جميله و حب و رحمه فى قلبى
يكفينى سنييين ااه .. بس انا عايزاه هو
مش الزكريات ..:)
الحمدلله .. حتى مهما اهاليهم كانوا بيعاملوهم بقسوه
غصب عنهم هيشتاقوا ليهم
دول الاهل
الحمد لله بجد ..فعلا فى حاجات رائعه كانت بتحصل
هحاول مبكيش تانى .. هحاول
و ان شاء الله يكون فى الجنه دلوقتى
هانت و الله و نروح له
ربنا يرحمنا جميعا بس

انا كمان سعدت بمعرفتك
تحياتى..:)

catroz said...

المتوحد..

ازيك و ايه اخبارك..
يارب تكون بخير ..

فعلا ساعات الكلمات بتبقى ضعيفه اوى مقارنه بالواقع
ربنا يرحم والدينا يارب
مهما كان فى اى وقت هتبقى محتاجه
كلنا بنحتاجهم .. بنحتاج حبهم
حنانهم
حضن دافى منهم

بحاول احوله لطاقه فعلا
و يبقى فى ميزان حسناته
ربنا يقدرنى على فعل الخير
اكيد بحاول اكون زى ما هو يتمنى
يارب اقدر بس ..يارب
مش هتوقف فى اى محطه
و هكمل ان شاء الله
الحياه فعلا جميله ..بس نفهمها صح

ربنا يصبرنا جميعا يارب
منورنا اوى
...:)

catroz said...

§a§a...

فعلا صعبه اوى
خصوصا لما يكون شىء ثمين بجد
فعلا اراده ربنا و نتقبلها
و اكيد ليه حكمه
و مهما كان ده الخير لينا

الحمدلله على كل شىء

منورنا يا مصطفى ..:)

catroz said...

mohamed ...

اكيد كلنا كمان بندعيله
مش انا بس
..:)

يارب و اشوفه فى الجنه
نتجمع كلنا فى الجنه يارب مع من نحب
:)

فعلا العلاقه كانت جميله و الحمدلله

اول مره اسمع الدعوه دى من حد
ربنا يجبر بكسرك
بس جميله اوى
ربنا يكرمك يااارب

منورنا بجد..:)

catroz said...

Fedaa AL Eslam ...

عايزه اقولك بس ان كلامى معاكى النهارده الصبح فرق معاى اوى
عايشين انا و انتى نفس الحاله
حسيتك قدرتى تدخلى جواى
ربنا يكرمك يارب
و يصبرك و يصبر اهلك
و زى ما قلتى
ربنا يقدرنا على الدنيا ده و تخلص
و نشوفهم بقى
و متنسيش تبقى تعرفينى بباباكى
فى الجنه ان شاء الله
...:)

catroz said...

احساس لسه حى..

على فكره اسم احساس لسه حى حلووو اوى
بجد حلو اوى

مش عارفه
لكن هو فعلا متغيرش فيه اى شىء
انا بس لما ببقى عايزاه مش بلاقيه
لما ببقى محتاجه حضنه
بلاقى حضن تانى
بس مش حضنه
محدش هيقدر يعوضنى عنه
..:)

يمكن فعلا احساسنا مختلف بكلمه انكسر
لكن الحقيقه واحده
مش كده ولا ايه
..:)

انا كنت عندك امبارح يا قمر
و قلت لك لا
منبتديش بدايه تالته
ادى وقت لنفسك شويه
وقت تستعيدى فيه نفسك ..:)
سلااامات يا قمر
....:)

catroz said...

Diyaa' ...

مدام مريت بالكسر ده اكتر من مره
يبقى مش نظرى اكيد
ده واقع انت عايش فيه

امممممم
كلامك جميل اوى
اكد مش ناسيينه و مش سيين واجبنا
ربنا يقدرنا بس

هو عايش جوانا ..بس برضه محتاجينه اوى
بحاول احولها لقوه
وربنا يصبرنا كلنا

ربنا يرحمه و يدخله فسيح جناته
مع كل اللى بنحبهم
ياااارب
و كل الناس الجميله زى ما قلت
فعلا ناس كتييييييييير اوى لسه حسهم فى الدنيا
بالعمل الصالح و بحنانهم و حبهم و انسانيتهم

تفتكر كان خايف على من البيبسى
ممكن فعلا .. حتى لو كان بينسى
نفسى الموقف ده يتكرر تانى و لو مره
...:)

يارب اتجمع بيه تانى
ياااااااااارب
اكيد هثبت له
عشان يبقى مبسوط بى
نورتنا بجد

و عليكم السلاام ..:)

No Fear said...

السلام عليكم
فعلا مش عارف أقولك أية و لا أية
بس حاولي تخرجي كل اللي جواكي ده علشان متتعبيش
و الله عارف كلامي ده مالوش لازمة بس بجد مش عارف أقولك أية

catroz said...

no fear..

و عليكم السلام
بحاول اكيد اخرج اللى جواى
او احوله لطاقه فى حاجه مفيده

و ازاى تقول بس ان كلامك ملوش لازمه
..:(

بجد كفايه بس انت نورتنى هنا
...:)
ويارب دايما منورنا ..:)

سجدة said...

لا حول ولا قوة إلا بالله
بصى اللى انكسر دا فعلا صعب يتصلح
لكن ممكن يترمم بالدعاء والصبر
اصبرى واحتسبى وادعو له كثيرا وابكى كثير كلما تذكرتيه
كفاكى فخرا انك عيشتى معاه ايام جميلة
فالتمسى الذكرى الجميلة

Rushdy Kamel said...

انتي عارفة مش بتبقى المشكلة ان احنا زعلانين على حالته هو
احنا بنبقى زعلانين علشان مش هانشوفه تاني
ربنا يصبرك وصدقيني كلنا معرضين لكدة في اي وقت وثقي ان فيه ناس كتير بتحبك
واستغلي اوقاتك في انك تعيشي مع اللي بيحبوكي وبتحبيهم

كلامك اثر في جدا

catroz said...

سجدة...

اكييد صعب يتصلح..
تعتقدى فعلا ممكن يترمم
هو اكيد بندعى و كل حاجه
اكيد كمان لازم نصبر على الابتلاء
و ندعو الله كثيرا ..:)

طبعا مفتخره جدااااا انى عشات معاه اجمل الايام
.....:)

منورانى بجد.:)

catroz said...

Big Code...

فعلا مش بنبقى زعلانين على حالته
يعنى دا احنا بنقول يا بخته
يارب نبقى زيه
هو فى احسن من كده
..:)

يارب
فعلا كل الناس معرضه لكده

اممم.اكيد بحاول اشتغل وقتى مع الناس اللى بحبهم

كلامك جميل بجد

منورنا ..:)

علاء عارفين said...

انا مش هقدر اقول غير ربنا يثبتك و يديكي الصبر

catroz said...

DR_NIGHTWING...

اللهم امين

ربنا يكرمك يارب

منورنا ..:)

MONDAHESH said...

الحمدلله
من اهم النعم اللي ربنا انعم بيها علينا

نعمة النسيان

مش قصدي انك هتنسي هتنسي

لكن الواحد مع مرور الوقت بينشغل بالدنيا وبنفتكرلهم الايام الجميلة وندعيلهم بالرحمة

catroz said...

MONDAHESH .....

الحمدلله على كل شىء
فعلا من النعم نعمه النسيان
مش عارفه هنسى ولا تؤ
بس يوم من الايام امور الحياه ممكن تشغغلنى فعلا
ممكن
الله اعلم

ربنا يرحمه و يسكنه فسيح جناته يارب

......:)
منورنا بجد

momken said...

لما بنفقد معنى المشاعر
ونتوه فى وسط الطريق
ونلاقى الاحساس مسافر
وواخد الا حلام معاه

وقتها يبقى انكسر جوانا شىء

البوست بتاعه راوعه
انتى حركتى مكان الكسر الى اتلهيت عنه وكنت فاكره خف
بس هو ماخفش هو لسه مكسور

انتى رائعه
تحياتى

catroz said...

momken...

لما بنفقد معنى المشاعر
ونتوه فى وسط الطريق
ونلاقى الاحساس مسافر
وواخد الا حلام معاه
وقتها يبقى انكسر جوانا شىء

...:(:(

كلامك صعب اوووى
طبعا انكسر جوانا شىء
و صعب اووووووووووى انه يتصلح تانى ..:(

اسفه بجد لو كنت فكرتك بالكسر تانى
اكيد مقصدش..:(
كسر زى دى..ممكن ميخفش
بيفضل موجود طول ما احنا عايشين
..:(

تحياتى ليك انت بجد...:)

sahr said...

دي اول زيارة لمدونتك وكمنتش حابه ان اول بوست اقراه ليكي يبقى كده
بصي انا حاسة بيكي وربنا يكون في عونك ويقويكي ويصبرك بس دي سنة الحياة ونصيبنا كده ولازم نبقى احنا اقوى من كده
ممكن يكون هو سابك ومش هيرجع تاني بس الحاجة اللي تواسيكي وانتي المفروض تكوني متأكده منها ان روحه هتفضل معاكي محوطاكي وحامياكي
ربنا يصبرك

catroz said...

sahr...

اولا اهلا بيكى هنا
معلش ان شاء الله يكون فى زياره تانيه و بوست كويس
ممكن تكونى حاسه لانك مريتى بتجربه زى دى
فعلا سنه الحياه و محدش بيعترض
الحمدلله على كل شىء
نصيبنا ..فعلا و بنحاول نبقى اقوى
بس اى صدمه فى اولها بيكون صعب اووووى :(
يارب تكون روحه موجوده بجد
ربنا يرحمه

منورانى بجد يا قمر
كلامك جميل اوى..:)

~ Bato0ot ~ said...

en lelah w en elyhe raj3on
bgd ana 7asa b e7sasek da bas as3ab ba2a ama ykon mawgod bas 3omro ma y7donek... da as3ab ...
bas matestslmish lel a7zan de .. la2n o akeed msh hyb2a mabsoot ama tkony 7azeena keda.. sa7?

catroz said...

~ Bato0ot ~ ...

فعلا احساس صعب اوووووى لما مش تحسى بحنانه
و هو عايش
مش عارفه..ممكن يكون اصعب
اممم...حاولى انتى تقربى منه

انا مش مستسلمه ..
و اكيد هعمل اى حاجه تخليه مبسوط

منورانى بجد ..:):)

Selfmeaning said...

يا كات البقاء لله و ربنا يثبته

للاسف محدش فينا بيحس بأهمية الشخص

اللى قدامه الا اذا صحى فجأة و مش

لقيه موجود ساعتها نلوم نفسنا

على كل دقيقة فاتت و هو معانا

و مش حاسيين بيه

او مشغولين فى حياتنا

catroz said...

Selfmeaning..

اللهم اميييييييييين
فعلا كلمك صح اوى
الواحد مبيحسش بقيمه اللى بيحبه
الا لما يبعد عنه
و هنلوم نفسنا
طول عمرنا
الحمدلل

Momo said...

لا الوقت بينسي ماتقلقيش

بس بينسي الحزن

لكن مش بينسي البني ادم نفسه

والدك هيفضل جواكى دايما بس الحزن عليه هيزول مع الوقت ان شاء الله

وده اللى احنا عايزينه ...

علشان نفضل ندعيله علطول واحنا مبسوطين

ادعيله انتى بس علشان تبقي فعلا حد صالح من اولاده و تكونى سبب فى انه يبقي مرتاح ان شاء الله
ان شاء الله يبقي فى الجنة دلوقتى :)

Anonymous said...

حبيبة قلبى ... كلامك جامد أوى وحاسة بكل كلمة ... ربنا يعينك ويصبر قلبك

catroz said...

قلب يحمل الكثير ...

الوقت بينسى .. بس بعد ايه
بعد ما الواحد بيتكسر من جوا
مش عارفه هنسى الحزن ولا لا
بس الى متاكده منه انى مش هنسى البنىادم دا
ده انا حته منه
:)

هحاول .. و اكيييييييييييد بندعيله بالرحمه و المغفره
وياااااااارب يكون دلوقتى فى الجنه

catroz said...

riri...
حبيبى ربنا يصبرنا كلنا
انتى اكيد حاسه بكل حاجه
عشان مريتى بالتجربه دى
ربنا يصبرنا و يدخلهم الجنه
ياااااااااارب

Lobna Ahmed Nour said...

انا معاكي قلبا وقالبا لاني مريت بتجربتك مرتين مش مرة واحدة

فقدت ناس اعز علي من نفسي

بس عندي نصيحة ليكي و لكل انسان ان احنا دايما نحتفظ دايما باللحظات الجميلة في حياتنا مع احبابنا

و نشيلها في قلوبنا علشان نعيش الذكرى دايما و نكمل بالامل حياتنا

ونعبر عن مشاعرنا للي بنحبهم قبل ما يجي يوم نتحرم منهم ويكون فيه كلام كتير كنا نتمنى في لحظة نقولهلهم

اللهم اغفر لنا اجمعين الاحياء منا والميتين و ادخلنا في رحمتك يارب العالمين