Wednesday, September 26, 2007

...يا عم بلا وجع قلب


بصوا بقى

فى الدنيا اللى انتوا عايشين فيها دى

حطوا شويه حاجات فى دماغكوا كده

عشان متحلموش كتير اوى و تيجوا فجاه و تتصدموا بالواقع

محدش فيكو هيحقق اللى هو عاوزه .. محدش هينجح فى دراسته

ايه و هو انت فكرك هتبقى زى البنى ادم اللى جايب امتياز ولا واخد ترتيب على الدفعه

لا يا بابا فوووووووووووووق .. اصل هو عنده رجل زياده و انت لا

لا و كمان فى عنده فى ايده صباع زياده

ده بيفتح نفسه على المذاكره و ده اللى بيخليه يجيب امتياز

و انت مكانك عامل بتعيد و مش ناوى تذاكر اصلا

اصل انت يا عينى ناقصك رجل .. غلبان و الله ..صعبت على

طيب هو انت فاكر اصلا يعنى حتى لو اتخرجت هتلاقى الشغل اللى انت عاوزه

لا ولا هتلاقى ولا بتاع .. هتقعد تقشر بصل جنب ماما و بابا

اصل انت يا ابنى اقل من اللى بينزلوا دوروا على شغل

اصل دوول عندهم رجل يمشوا عليها و ينزلوا يدوروا على شغل

و انت حضرتك يا عينى ...و الله بتصعب على يا ابنى

رجلك دى معموله عشان تروح تتفسح و بس ..لكن شغل ..لا طبعا

يا عينى هتوجعك .. فهتقعد تقشر بصل يا جميل اسهل لك ..

فكرك الكابه اللى انت عايش فيها دى

هترجعك بالزمن سنتين لورا و هتغير حياتك

اااه ..فعلا لما افضل مكتئب و زهقان من الدنيا

هرجع سنتين لورا ولا تلاته و هقدر اغير مستقبلى اللى انا فيه دلوقتى

مش لما اتعب و اعمل اللى على هقدر اغيره

لا بتقول ايه بس يا عم انت ..خلينى زى مانا كده

يمكن فى يوم فجاه الاقى نفسى فى سنتين فاتوا

فاكر نفسك ممكن فى يوم البنت اللى انت بتحبها دى تتجوزها..

لا ...لا طبعا كمااان .. و تتجوزك بتاع ايه يعنى ...

افضل احلم يا بابا مع نفسك كده لحد ما فى يوم تلاقيها جات اتخطبت و طاارت منك

و انت ليه تحلم بيها اساسا .. و هى تحب واحد زيك بتاع ايه ..

اصلك زى ما قلنا قبل كده معندكش رجل ..

ايواااا ما هو اللى هيتقدم لها التانى ده عنده رجل زياده عنك

و هى يا عينى عشان انت فضلت واقف مكانك مستنتش بقى ...

و واقفت على الراجل اللى عنده رجل دا

اوماااااااااااااال .. ما هو احسن منك ..عنده رجل زياده..

و يلا اتصدم بالواقع بقى ..

عارف لو انت كنت نطقت و قلت لها بحبك اصلا من الاول ..

البنت كانت هتستناك ..مش زى ما انت فاكر يا حبيبى

اصلها هى كمان بتحبك ..

بس برضه انت معندكش لسان تتكلم بيه ...

لازم تفضل واقف بعيد تتفرج لحد ما تضيع منك

بعدين تيجى تقول دا انا كنت بحبها ..

ولا اقولك يا عم بلا وجع قلب..

خليك زى ما انت كده

بلا وجع قلب

40 comments:

LoNeLy said...

no comment ...

semsema28 said...

ههههههههههههههههههههههههههه
هههههههههههههههههههههههههههههههههه

يا خربيت عقلك ياروز

ايه اللي انتى عامله ده

ههههههههههههههههههههه

بلا وجع قلب فعلا

mohamed said...

فظيع يا روز

بجد مش ممكن
فعلاً
do same thing

Big Code said...

مع اني ماحبش ايأس بالشكل ده بس انا موافق على حاجات كتير من اللي انتي قلتيها
بس انا من رأيي ان احنا نوجع قلبنا شوية يمكن يجيب فايدة احسن ما نقعد نقشر بصل من غير فايدة تانية غير الطبيخ
لو بطلنا نحلم نموت
ولو بطلنا نحاول نموت برضه
ولا ايه ؟؟؟

Dead Man said...

تحفة بجد ياروز
صدقيني حلوة جداااا
بس سؤال ايه علاقة صورة الشبشب بيه يعني الواحد بقي زهق وانتحر وقلع الشبشب قبل م ينط :)

هههههههههههههه

mozo said...

كلام جميل

catroz said...

LoNeLy ...

mmmm .. why no comment..

..........

semsema28....

بتدحكى على ايه يا بنتى بس
ايه اللى يدحكك
دا هم و الله
هههههههههههه
يلا اهو كله بيطلع فى الغسيل

catroz said...

mohamed...

فعلا المفروض نعمل حاجه ..ما هو الراجل ابو رجل مش احسن مننا

...........

Big Code...

لااااااااا دا مش ياس
انا معرفش حاجه اسمها الياس
انا كنت بقول الكلام دا عايزه حد يفوق شويه
بس يا ترى هيجيب فايده ولا تؤ
مش عارفه بقى
فعلا لو بطلنا نحلم نومت
عشان كده بنحلم .. و بنحقق احلامنا

M.Osama said...

حقوق الطبع محفوطة ليا ياروز مش كده .. :D

catroz said...

Dead Man ...

مش عارفه .. بس حسيت انها لازم تتحط هنا
يمكن انتحر
يمكن راح يتمشى و جاى
:D

..........

mozo...

منورنا اووووى ..

catroz said...

M.Osama...

بسببك اهو كتبت بوست و عجب النااااس
و طبعا حقوق الطبع و النشر كمان ليك :D

ahmed3lam said...

ياعم روح موت) اسهل من كل الي اتقال (
ده

shix said...

هاى
بجد انا حعيط من الكلام ده
ده على كده احنا وحشين اوى
ده على كده لو نويت انتحر مش حلاقى حاجه اموت بيها نفسى وحرجع اقول يا عم روح مش عارف تنتحر
هما اللى بينتحروا دول عندهم راس زياده ولا ايد زياده
بلا وجع قلب على رايك
انا رايى ان الشباب اللى بيفكر يذاكر وينجح ويرتب على الدفعه ويتخرج ويشتغل ويتجووز يغيروا تفكيرهم ويتجهوا للاتجاه الاسهل
يتجوزا ويقعدوا فى البيت
لا بلاش يتجوزوا يقعدوا فى البيت من غير جواز كما
بلا وجع قلب
معلش طولت
سلام

Ert3ashat said...

ههههههههههههههههههههههه


ايه ده يا بنتييي :)))))))))))))


جمييييييييييييييييلل

بلا وجع قلب فعلاااا

§a§a said...

ههههههههه
او ممكن يركب رجل زيادة

من عند بتاع الرجول

هههه

البوست جامد جدا

بس طبعا فى بعض الامور اللى انتى مش مريتى بيها ذى الشغل الا لما تمرى بيه

وتحسى قدر المعاناة واسألى مجرب

بتلات رجول

هههه

Selfmeaning said...

كده يا كات تسيبى الشبشب لوحده
مش كنتى تبعتيه ليا
هههههههههههههههههههههه
بوست جميل جدا فى جزء واقع و جزء مكتئب

MONDAHESH said...

الحمدلله

انا عندي رجل زيادة

بوست رائع

تحياتي

jinja said...

السلام عليكم يا روزي انا اول مره اخش المدونه بتاعتك بس الواضح انها مش هاتبقي اخر مره بس بلاش يا بنتي التشائم ده كله اكيد ربنا سبحانه وتعالي هايغير لنا الحال يعني واستبشري خير لاما احنا كدا كلنا هاننتحر زي اللي ساب شبشبه ده بس انا عايز اقوله حرام عليه عشان ساب شبشبه يتعذب في الدنيا كدا

catroz said...

ahmed3lam ...

و يروح يموت ليه بس ..
ما يتعب شويه و يحقق اللى هو عاوزه ..

..................

shix...
و تعيط لييه بس
احنا مش وحشين ولا حاجه يا ابنى
احنا اللى مش بنعمل اللى علينا اساسا
عايزين كل حاجه تيجى لنا على طبق من ذهب
و احنا قاعدين فى بيوتنا
ولا بنتعب ولا بنعمل اى بتنجان
متقولش كدا بس
و مش تفكر ابدااا تنتحر ..
المفروض مسلم ..مش تفكر بالطريقه دى
اعمل اللى عليك و توكل على الله
و اعلم ان الله لن يضيعك ابداا
و خليييييييييييييييك متفااائل

catroz said...

Ert3ashat...

ارتعاشات . كويس يا ابنى انه عجبك
منورنااااااااااا :D

..............

§a§a..

ايوه يا مصطفى .. و ايه المانع يعنى لما يركب رجل زياده
هههههههههههههههه

امممم اكيييييد فى حاجات لسه معدتش على
و عارفه انه مجرب و عانيت كتير
مش محتاجه اسال
كفايه الحاله اللى كنت بشوفك فيها ..:(
ربنا يكرمك يااارب ..:):)

catroz said...

Selfmeaning .....

نهىىىى .. منورانى يا قمر

انا مسبتش الشبشب لوحده يا بنتى
دا هو انتحر و شاب الشبشب
انا رحت اصور بس
هههههههه

فى هنا جزء كئيييييييييييييب فعلا اوى
...:)

..............

MONDAHESH...
الحمدلله طبعااا
منورنا اكيييد
تحياتناااا

catroz said...

jinja...

و عليكم السلاااام
اولا منوره المدونه بجد و ان شاء الله مش اخر مره يعنى
ما هو دا اللى بقوله
اتعب .. الناس التانيه دى مش احسن منك
اعمل اللى علييييييييييك
و ربنا هيكرمك اوووووووووى
بس بنقول اهو
مييييييييين بيسمع بقىىىى
بس مش هننتحر بقى
لا هنعيش و نتعب و نستمتع بالحياه
منوراااااااااااااانى

Selfmeaning said...

خلاص تانى مرة تروحى تصورى تبقى تاخدى جميع الممتلكاتمش تسيبها كده

زى الهوا said...

ههههههههههههههههههههه , احب فيكى التفاؤؤؤؤؤل

mohamed said...

انتى داخله شمال كده ليه ما يمكن مش عايز يقولها بحبك عشان متتعلقش بيه اكتر لانه حاسس انه مش جاهز واهلها بيضغطوا عليها وهو مش عايز يحملها فوق طاقتها بكلمة بحبك

Lost Love said...

هههههههههههههههههه
ههههههههههههههههههههههههههه
هههههههههههههههههههههههههههههههههه

على فكره ...
بلاش بقى هبقى اقولك على الماسنجر احسن
بلاش نسيح قدام البشر

بس البلوج كده بقى وحش اوى على فكره :p
وابقى شوفى البوست الجديد بتاعى
يالا سى يووو

logarithms said...

والله علي رأيك بلا وجع قلب :D

catroz said...

Selfmeaning....

حااااااااضر المره الجايه هاخد معاى الممتلكات
مش هسيبها زى دا
loooool

.............

زى الهوا...

طبعا يا بنتىىىى ..
انا متفائله جداااااا و الحمدلله :D
منورااااانى

catroz said...

mohamed .....

تصدق كلامك ممكن يطلع صح فعلا ..:(
بس برضه من حقها على الاقل تبقى عارفه
لا ..بس برضه ... اللى عاوز حاجه بجد
هيقدر يحصل عليها .. محتاج يتعب حبتين بس ..
عشان اللى بيحبها ..:)

catroz said...

Lost Love....

هههههههههههههه
هههههههه
هتسيحى ليييييييييييه بس
و على اييييييييييييييه
هههههههههه
شكلى فهمت
بس على فكره
كده البلوج فى عينى انا
احلى و احلى واحلى بكتيييييييييييييييير
"وش بيطلع قلوب حمرا"
شفت البوست الجديد بتاعك
حلو اووووووووووى
سى يووو يا حبى ..

catroz said...

logarithms...
ايوه .. بلا وجع قلب
و نتعب ليه يعنى
:D

عطاالله النديم said...

kad takon a7yana shay2a ma wa anta la taredoh .. wa kad la takon shay2a anta tatmna an takonh..
hey be7'tsar 3abas al akdar wa ta7kmaha ..
wa laken yabka an takon eradat al ensan mawgoda .. fatalma ana mawgod ezn astate3 an akon ma ored
kol 3am wa antom be7'yer

ولــــــــــو said...

للاسف السلبيه والانهزاميه بقت السمه السائده لوصف حال المصريين
حاجه تحزن
بس
ولو
هانتغير لو عايزين
بس نعوز
يااما
نقف نتفرج على الناس بتعدي من جنبنا
واحنا واقفين
بلا وجع قلب

catroz said...

عطاالله النديم....

انا اكون .. اذن استطيع ان اكومن ما اريد
دا اللى عايزه اوصل له
الناس التانيه مش احسن مننا فى حاجه
عشان هما يحققوا احلامهم و احنا تؤ
بالعكس
شويه تعب و هنحقق كل اللى احنا عاوزينه ان شاء الله
منوووووورنى....:)

catroz said...

ولــــــــــو ....

الظروف اللى بقينا قيها
خلت الانهزاميه و الاستسلام اسهل حل
مع ان دا اسوأ حل
دا انت بتضيع حياتك ... و مستقبلك ..
لييييه .. عشان استسلمت ..:(

طيب و ليه منتعبش شويه ..

منورااااااانى :):)

كفايـة طيبـة said...

هو مش يأس على اد ماهو توبيخ

حسيت وانا بقرأ البوست ان بابا بيزعقلى

مش عارفة ليه

بس لهجتك جميلة ياروز وتخلى الواحد يفوق شوية

على فكرة ده اول تعليق ليا فى بلوجتك ياقمر... وان شاء الله مش هيكون الاخير

safa7_karmooz said...

انا كل اللى عاجبنى فى البوست صورة الشبشب :D

riri said...

الصورة جامدة جدااااااااااا كانت عجبانى اوى فى المنتدى بس تقريبا كانت كوتشى .. ايه الحكاية معاكى فى الاحذية ...هههههههههههه... أنا بحسبها والله شبشبك ... بلا وجع قلب فعلا ... بوست جامد جداااااااااااااااااااا

catroz said...

كفايه طيبه ..
حبيبه قلبى منورااانى بجد
و عارفه انه مش اول كومينت ;)
و مش الاخير ان شاء الله :D

ممممم .. هو فعلا كان توبيخ لشخص معين
و كوويس انه فيه لهجه بابا ..
بس ياريت الواحد يفووووق بقى بجد ..:)

catroz said...

safa7_karmooz ...
الشبشب بتاع الراجل اللى انتحر :D

.............

riri...

ميرسى يا قمر ..دا من زوقك بس :D
فى المنتدى فعلا كان كوتشى ..
مش عارفه ايه بقى الحكايه معاى
بس الصور بتشد بجد
ههههههههههه
ااه بلا وجع قلب
منوراااانى