Thursday, November 06, 2008

حلم زى الاولانى





شفت الفرحه فعينيا

لما ايده لمست ايديا

عيون تعشق من غير كسوف

و خدود احمرت من كتر الكسوف

و الدنيا قالتلى اديكى من تانى

ابتديتى حلم زى الاولانى

لا فرحه هتكمل

ولا حزن هيخلص

وابتديت ابعد عن حلم عشت سنين اتمناه

و اقول يا تكمل... يا تسيبنى من غير مهواه

الاقيه بيقرب بيرسملى بكرة وياه

و يقولى انا ليكى ..ولا بعدى دى تبقى حياه

واحلام ترفعنى لفوق

و هموم تشد لتحت

وقلبى يرجع يبكى من فرحه

لا هى هتكمل ولا انا سبتها تعيش


22 comments:

Anonymous said...

ايه الفن ده
هو انتم بتعرفوا تكتبوا الكلام ده ازاى !!!

عصر الجنون said...

اولا : الطريقه منمقه اوى ماشاء الله عليكى
ثانيا:مافيش حاجه تستاهل والله يا بنتى :S

blue-wave said...

الله الله
دا انا بقالى منافسين وجامدين كمان اهو
بجد ما شاء الله

romansy said...

انا شايف تغير كبير قوى فى الكتابه هو اظاهر كده انتى عايشه حاله نفسك تكتبى عنها وفعلا طلع كلام جميل وبسيط

soulmate said...

كلامك جميل جدا ويا رب تكون حاله بس ليه مش تكمل لو فى امل امسكى فيه وكملى وربنا معاكى

Unknown said...

مين عارف

مش يمكن تكمل المره دي؟

حاول تفتكرنى said...

بسيط وجميل

تحياتي

Mona Shereif said...

والله جميلة
بس ان شاء الله ميكونش زى الاولانى ويكون احسن
وان شاء الله الفرحة تكمل

عايزه اسألك سؤال ومكسوفه اوى
catroz
معناها ايه؟

معلش بقى

WhItE HeArT said...

جميله ومعناها رائع

فكره جديده بطريقة جديده

تحياتي

Dr Gad said...

:huh:

catroz said...

riri ..

و الله ده من بعض ما عندكم يا ريرى ..:D

catroz said...

mona@asr elgnoon...

مبسوطه بجد انها عجبتك ..
بس تعرفى
الغريب ان طلع فى فعلا حاجات تستاهل
فى حاجات فعلا تستاهل فى الدنيا دى
للأسف ..

...:)

catroz said...

blue wave ..

منافسين ايه بس يا فندم ..
احنا منجيش حاجه جنب حضرتك ..

منورنى يارب دايما ..

catroz said...

romansy ..

الاسلوب اتغير ازاى ..!!
هو انا عموما مش بكتب حاجه الا لما اكون حاساها ..
مش لازم اكون انا جوة التجربه دى
بس حاجه احس انها بتمس حاجه جوايا
و دى فعلا بتمس حاجه جوايا اوى ..

catroz said...

مشمشه ..

فى امل دايما ..
ربنا يسهلها بقى ..:)

catroz said...

esraa ..

فعلا
و ليه متكملش المرادى ..
!!

catroz said...

حاول تفتكرنى..

اسمك بيشدنى دايما اوى

منورنى ..:)

catroz said...

Sometimes ..

يارب :D..

بصى يا بنتى ..

roz ..دى اخر 3 حروف فى اسمى ..
او اسم الدلع

اما cat ..فدى جايه من قطه

كات يعنى ..اصلى بحبهم ..
كمان لقب عيلتنا " القط" فهتلاقيها جايه فى كل حته :D

و بعدين يا بنتى مش تتكسفى
اسالى اى حاجه انتى عاوزاها ..

catroz said...

white heart ..

مبسوطه انك حبيتيها ..

تحياتى لكى ايضا ..:)

catroz said...

dead man ..

منور يا ديد ..:D

Anonymous said...

واحلام ترفعنى لفوق

و هموم تشد لتحت

وقلبى يرجع يبكى من فرحه

لا هى هتكمل ولا انا سبتها تعيش
--------------------------------

عجبني الكلام دا اوي
بس ليه كدا؟؟؟
ليه بتحكمي ع الحلم دا انه زي الاولاني؟؟
ليه مفترضه سوء النيه؟؟
عاندي.. اضحكي للدنيا.. بصي علي نص الكوبايه المليان
وربنا معاكي

دمتي مبدعه

تحياتي

catroz said...

hager za3bal ...

مكنتش شايفه غير النص الفاضى
بحاول اهو اشوف النص المليان ..