Wednesday, November 12, 2008

La5btation..







مبقتش عارفه هو فى ايه ولا المفروض الواحد يعمل ايه

حاجات كتيرة اوى بقت داخله فى بعضها

حتى الاولويات اتغيرت بسبب اللى بيحصل

الاحلام اللى بنبقى راسمينها و نفسنا نحققها كمان اتغيرت

ساعات بتبقى احلام عبيطه و احلام تافهه ..بس ليها معنى كبير اوى للواحد من جوة

طيب و ليه مبقاش عندنا حاجه اسمها وسط

طبيعى اوى انك لو بتحب واحد و رحت قلتله انا هتجوزك وش كده

هيخاف و يتخض و يرتبك

ومش بعيد يجراله حاجه من الجمله اللى اتقالت

هى جمله .. بس نغمها على مسمعنا كبير اوى ..

هو ليه دايما متسرعين

طيب هو ينفع تقول الجمله دى لواحده ماشيه فى الشارع كده

البنت هتفتكرك بتعاكسها و مش بعيد تهزقك و تمشى

و يمكن انت بتكلمها بجد ..بس هتتفهم غلط بكل الطرق

كل حاجه لما ندخل ليها اسلوب

زى ما لكل انسان ليه عاداته و تقاليده

مينفعش انى اغيرها عشان حد ..حد لا يعنى لى شىء ..

فى حاجات فعلا مينفعش ييجى حد و يقولك غيرها

اصل انا تربيتى كده و اهلى علمونى كده من و انا صغير

زى ما تكون جاى تقولى غيرى اسمك مثلا

وهو انا هغير اسمى عشانك بتاع ايه

انت مين اساسا

فى نفس الوقت ممكن نغير حاجات جوانا عشان شخص بنحبه

و من غير ما حتى يطلب التغيير

لكن بحدود ..

لما اتنين يكونوا متجوزين مثلا ..

و هو يقول لمراته انا بحبك

و متردش عليه

تفتكروا هيقولها قوليلى انا كمان بحبك ..

حتى لو طلب منها تقولها ..هيبقى طعمها بارد اوى

بعيدا عن ان اصلا لما تقول لحد بحبك و يقولك و انا كمان بحسها بارده

متتردش عليها ب و انا كمان ..

لا لو بتحبه فعلا هتلاقى غصب عنك الكلمه اللى بتقولها ترد بيها عليه

اقوى شويه من كلمه"بحبك" مش كده ولا ايه

هو احنا قتلنا ليه الدفء اللى فى حياتنا

ليه الناس مبقتش تحب بعضها زى الاول

تتمنى الخير لبعضها

دا حتى الاخوات ..اللى من لحم و دم واحد

بنلاقيهم ساعات بيتمنوا حاجات سيئه لبعض

..اختى الكبيرة ..ساعات لما بقعد افكر انا بحبها قد ايه بلاقى عينى بتدمع

زى دلوقتى كده

مجرد ما بيخطر على بالى كميه الحب اللى جواى ليها و ابتدى احس بيه

عينى بتدمع غصب عنى

نوع من الحب فعلا الواحد مبيقدرش يحتفظ بيه جواة

بنتخانق و نزعل من بعض و تحصل مشاكل

بس مهما كان فعلا بحبها

مبعرفش اخليها تنام يوم زعلانه منى

و لما تبقى تعبانه و انا مش عارفه اعملها ايه بتمنى فعلا انى اكون انا اللى مريضه

مش هيا

يمكن بيبقى اهون على اكون انا اللى تعبانه بجد مش هى ..

تخيلوا انى بحس كده ناحيه اختى

والاقى بنت زميلتى تقولى انا بكرة اختى و بكرة بابا و بكرة ماما

فعلا مبقتش اعرف ارد عليها

انتى مش عارفه قيمه اللى معاكى

مش هتحسى بيه الا لما يضيع منك

مش هتحسى بقيمه اسرتك الا لما ينقص منها واحد

مش هتعرفى يعنى ايه ليا اخت كبيرة تخاف عليا

قاسيه ساعات ...بس يكفينى انها بتفهمنى من نظرة

اب... تترمى فى حضنه و تبكى

و كفايه لما تبقى ايده دافيه تمسح دمعه من على خدك

ام ...بتعمل المستحيل عشان ترضيكى

و كفايه اصلا دعواتها اللى من القلب ..

الناس فعلا بقت وحشه

مبقتش تعرف تقدر اللى فى ايديها

وناس نعاملها كويس نلاقى الرد على معاملتنا الكويسه دى بمعامله سيئه

ولما نعاملها اسوأ ما يمكن ..نلاقيهم بيعاملونا اسوأ ما يمكن

بس انا مبعرفش اعمل كده

ما هو انا يا هعاملك كويس يا هعاملك وحش

مش هينفع ابقى بتعامل وحش لانى عارفه ان المقابل كويس

و اخاف اعمل حاجه كويسه لترجع تانى تعاملنى بطريقه سيئه

غريبه بجد

و الاغرب .. ان فعلا فى ناس كتيرة كده

مبقتش عارفه دا مرض ...ولا فراغ عاطفى

بس اعتقد هو فراغ عاطفى

وييجى اتنين بيحبوا بعض

هى فاهماه و هو بيفهمها كويس

بتطمن فى وجوده و هو مبيشوفش غيرها مطمنه قلبه

هو مبسوط لانه لقى حب حقيقى و هى نفسها تكمل حياتها جوة قلبه

متشابهين فى حاجات كتيرة اوى

وبيحبوا بعض اوى

لا هو ينفع يكون غير ليها ولا هى ينفع تكون غير ليه

و دى وجهه نظرى عنهم ..ان لم تكن وجهه نظر كل الناس اللى يعرفوهم

تعرفوا ان ممكن ييجوا يقروا الكلام ده و يقولوا لا دى روز جايه توقع ما بينا ..

ولا روز بتقول علينا كلام وحش ..

مع العلم .. انى اول مرة اتكلم عليهم ..سواء مع حد او حتى مع نفسى ..

بس نقول ايه ..ربنا يهدينا جميعا ..

الناس بقت تتغير بسرعه اوى

تغير تعاملاتها بسرعه اوى

تزعل من حد و تتغير ناحيته

زمان كنت اعرف امسك اى حد زعلانه منه و اقوله انا زعلانه من كذا و كذا

و يفهمنى عمل كذا ليه و عمل كذا ليه

و يايطلع غلطان و يتاسف

يا طلعت انا اللى فهمته غلط و خلاص قلبى يصفى من ناحيته

بقالى فتره مبعرفش اعمل كده

ببقى متضايقه من حد و مبعرفش اتكلم

بلاقى تعاملى اتغير معاه و مببقاش عارفه ارجعه زى الاول

حتى مبقتش عارفه الوم حد عمل حاجه عاللى عمله ..

كتير اوى بلاقى نفسى "اكتفى بالصمت" و خلاص على كده

انا عارفه ان ده مش صح

بس حاسه انى مبقتش اعرف اكلم حد و اشرحله حاجه و افهمه زى الاول

ساعات الناس القريبه منى بتفهم انى زعلت ...

و مش عاوزة اتكلم و بييجوا يفهمونى ايه اللى حصل

طيبو لو شخض مش عارفنى كويس .. و فجاه قلبت عليه

هييجى يقول البنت دى غريبه

او بحالات

او اتجننت

ده لمجرد انى غيرت معاملتى و مش فهمته ايه السبب

و هو هيبقى شايف انى غيرتها بدون سبب

مش ذنبه حاجه

انا اللى المفروض ارجع زى الاول

بس مش عارفه ..

نشكى الزمان و العيب فينا ..

بقى دا اللى بيحصل .. مش كدا برضوا

بنت تروح تقول لشاب انها بتحبه

انا مش عارفه هى اصلا جابت الجراه منين انها تقول

ومش عارفه هى ازاى اصلا سمحت لنفسها

ولا ازاى الفكرة جات على بالها انها ممكن تعملها

مش عارفه اسميه دا هبل و لا عبط

ولا استهبال ..ولا غباء

بجد كان نفسى امسكها افعصها فى ايديا البنت دى

بس برضوا ."اكتفيت بالصمت" كالعاده

اصل هرد عليها اقولها ايه

انتى المفروض بنوته و البنت ليها حياء

ولا دى حته بتتدخل فى الكرامه بتاعه البنت ..

ولا ايه بالظبط

مكنتش عارفه ارد فعلا ..

ربنا يهديناااا جميعااا

حد ييجى ينصع و يساعد

يلاقى اللى بينصحه يقولك ملكش دعوة بيا

انا حر فاللى بعمله

و هما اصحاب

دا انت حتى لو مش متقبل كلام صاحبك اسمعه لحد الاخر

بس لاء .. احنا لازم نقلب على الوش التانى

و نطلع شرير جوانا عشان الناس تعرف اننا مفترسين

و يخافوا مننا

و يمكن نكون اصلا اضعف بنى ادمين فى الكون

طيب من جوة و غلبان اوى بس خايف دا يظهر

اصل الناس لو عرفوا انك مش شرير وطيب..هيفترسوك

و نرجع نخبى دمعنا تحت ضحكتنا ..

نضحك بصوت عالى عشان محدش يسمع المنا

بس بيبقى باين اوى اننا بنتالم

باين اوى بننا بنحاول نخبى جرح جوانا

فاكرينه مستخبى ..لكن واضح زى الشمس

بنخبيه عشان بنخاف نسمع من حد كلمه

"انت انسان كئيب"

فعلا مبحبش اسمعها من حد

مش بتقبلها بصورة جيده

انا كئيب ..!! لالا انت اكيد بتتكلم عن حد تانى ..

اصل انا مش كئيب

انا مبسوط اهو

و الضحكه على وشى اهى ..:)


20 comments:

goooooood girl said...

your blog is feel good......

romansy said...

عزيزتى
ما كل هذه المشاعر المكبوته بداخلك
اراكى تفكرين بمنطق سليم حقا
قد نفعل بعض الاشياء وتكون صادقه من القلب ولكن قد يشعر بها الطرف الاخر بانها استهار بمشاعره
وقد اعلم ان تلك المشاعر
قد تتغير فى يوم ما
ولكن كونى انت نفسك مهما كان

كفايـة طيبـة said...

ana maba2etsh 3arfa acomment 3la eh walla eh belzaabt

dy talet marra a2ra el post mn awlo l akhro w msh 3arfa abtedy my comment mnen

3ayza arodd 3leeh kelma kelma
w as2al 3la kelma kelma
bs msh 3arfa

hagy tani :)

aktar 7aga 3agbani el finishing bta3 el post

اصل انا مش كئيب

انا مبسوط اهو

و الضحكه على وشى اهى :)

yarab teb2a 3la weshek w mn albek kaman ,,, msh 3la weshek bs

hagi tani bardo a3alla2 7arf 7arf

:)

Dr Gad said...

قريت البوست كله و هعلق بعدين

Sooberman said...

انا عاجز عن الكلام

بجد والله عاجز تماما

ممكن يبقي ليا تعقيب علي الكلام بعدين

لكن حاليا هكتفي بالصمت

و مش عارف اقولك أد ايه ان الكلام ده بيوصف احساسي الحالي

لكن اللي اعرف اقولهولك انها رائعة

سلام عشان عندي امتحان بكرة و بعده

ادعيلي

عصر الجنون said...

احنا السبب اولا

احنا اللى عملنا قوانين من دماغنا وبدل مانتحكم فيها

هى بقت تحكمنا

عجبى !!!!!!!!

Unknown said...

:/

catroz said...

goooooood girl ...

thx ..

catroz said...

romansy ..

انا نفسى
و عمرى ما هكون غير نفسى...
الناس بقت تفهمنا غلط اوى فعلا ..:(

catroz said...

كفاية طيبة ..

ana 7asa eny la3'batek walahy ya benty ..
7'sosan lama ba2olek asamy elpost da eeh w la2etek 2oltely "la5batation" ...:D

hastanaky tany w es2aly 3ala kelma kelma kaman ya momo ..

ummmmmmmm ..

msh 3arfa ..bs ana 7asa enha ba2et 3ala weshy bs ya momo ..:)

i miss u.. ("V")...

catroz said...

dead man ..

و انا هستناك برضوا تيجى تانى ..:)

catroz said...

rewesh ..

بجد
مش مصدقه ان اخيرا بقى ليك بلوج
لا و كمان بتيجى تعمل كومينتات عندى
اعتقد دا اول كومينت ليك عندى
او التالت
مش عارفه بقى ..:D

عموما هو الاول باسم "روش" مش كده برضوا ..

رائعه لانك قريتها بس و الله ..
كمان مبسوطه لانك حسيت انها بتعبر عن حاجه جواك
دى "اشاره" كويسه يا احمد
ربنا معاك فى الامتحان بتاع بكرة
و ان شاء الله بتاع امبارح تجيب فيه درجات كويسه
هدعيلك و الله كتير ..
ربنا يكرمك يارب و يهديك ..:)

catroz said...

mona@asr elgnoon ...

يمكن فعلا
بس ممكن نكسرها و نتغير للاحسن من تانى
منورانى يارب دايما .:)

catroz said...

esraa ..

و اسراء ايضا اكتفت بالصمت ..

Dr Gad said...

جيييييييييييييييييت

بصي مش هعلق علي اي حاجة من اللي اتكتبت في البوست

بس كل اللي هقوله ان كميه مشاعر ملخبطه زي م عنوان البوست بيقول

طيب ليه؟؟
مش موضوع بقي غضب علي اللي بيحصل و لا قرف ولا تمرد علي الوضع الحالي


لا عشان كبت

كبت ؟؟؟ مين قال انا مش مكبوته و بتكلم في البلوجايه بتاعتي عن حياتي و عن فرحي وحزني

اه كل ده حلو بس كبت برضه

طيب ازاي يا ديد قول

ههههههههههههههههههههههه

عشان اللي عنده كميه المشاعر دي و يخرجها في وقت واحد يبقي طول الوقت ساكت هو صحيح مش عاجبه الوضع اللي هو فيه ولا اللي شايفه حواليه و نفسه يغيره بس ساكت

يتكلم مع نفسه شويه و يقول بكره احسن و هتتعدل بس برضه ساكت

عارفه ساكت ليه

لانه مبيقولش ده للي المفروض يتقالهم ده

وبيقوله بينه وبين نفسه

ويفضل في دايره تساؤل دايما اداته

ليه ؟؟؟

وعشان مش عنده الاجابه دايما تعبان

لان الاجابه هيلاقيها في كلام الناس و نظراتهم و تفكيرهم

اوعي تنحي من التعليق زي م بتعملي لما تقري البوستات بتاعتي

هههههههههههههههههههههههه

البوست حلو قوي قوي قوي

وكويس انك خرجتي ده

بس بجد نصيحه مني متكتميش تاني حاجة

و اتكلمي حتي لو هيزعل منك حد مدام علي حق

وحطي تحت مدام علي حق دي مليون خط عشان مترجعيش تندمي


شكرا ليكي يا روز :D

WhItE HeArT said...

احم احم

اه حلو اوي مطولة ابن خلدون اللي حضرتك كتبتيها دي

ههههههههه


انا بهزر بس مقدرتش امنع نفسي اني اقولها لإني عندي امتحان وحضرتك عطلتيني هتقوليلي داخل ليه وعندك امتحان هقول لك ملقتش امل من المذاكر قلت اجي الاقي سعاد هنا


بصي بأه انتي وحشتي الكون كله جواكي انا معرفش ليه

انا شايف ان في مرحلة الواحد بيزهق فيها من الجرح او تقدري تقولي بيزهق من تسميته بلقب معين زي انته طيب اوي ايه العبط اللي انته فيه ده فبيحاول يتغير فبيغير نفسه للأسوأ وهو عارف انه كده بأه اوحش ولازم يرجع بس للأسف مش قادر كل حلها دي ان الواحد يقنع نفسه انه متغيرش ومفيش حاجة حصلت وهو هيرجع زي الاول ودي عن تجربة شخصية



الواحد ممكن يشوف اللي بيخدعه وهو طيب اصل طيب مش معناها ساذج ا انا شفتك وانته بتخدعني بس انا شخصيتي مش سامحالي اني ارد عليك خداعك انا مخلوق كده فخلاص ربنا يسامحه وابدأ اتجنبه

اما الانسان اللي بيفرض شروره او تعامله القاسي على الناس او مبيسمعش النصيحه فااقدر اقول لك انه لسه بيكتشف نفسه او بيخطط شخصيته بس متأخر اوي علشان كده هوه في حالة تضارب اصلا فمش ناقص حد يلخبط كيانه فبالتالي تلاقيه قفش مرة واحده كده مع ان ممكن يكون جواه كويس

وده الواحد لازم يصبر معاه لو هوه صاحبه لإن الصاحب هوه اللي بيشيل صاحبة في وقت الازمة

على فكره احنا بلد طيبة قوي وجميلة اوي ظروف الحياة هيه اللي كسرت في ناس كتير مننا حاجات كتير جميله


اما بأه على البنت اللي راحت قالت للولد انا بحبك فيمكن يكون الحب طفح جواها ومبقتش قادره عليه وعايزة تحدد مصيرها منه بس مكنش المفروض تعمل كده ايا مايكون بس هيه الظاهر ملقتش حد يفهمها انها مش المفروض تعمل كده

متقسيش على نفسك ولا على غيرك وانا اتعودت اني اختلق لأصحابي العذر في كل حاجة بيعملوها الا لو زاد عن حده طيبه اه لكن مش سذاجه


بحييكي على الفضفضة وعلى العطله كمان

وتحياتي

Anonymous said...

حاسه ان جواكي حاجات كتير اوي..
مشاعر كتير.. وجراح كتير.. وانتي كتماها جواجي وساكته..
وماشيه بتضحكي بصوت عالي وتعلي صوتك اكتر واكتر واكتر عشان بصوت ضحكتك تداري انين جراحك والامك..

يارب اكون غلط
وتكوني سعيده..
وربنا معاكي

catroz said...

Dead Man ..

يا ويلكم يا ويلكم ...نورت البيت ..

هو ممكن يكون كبت فعلا
ممكن تكون طاقه كبيرة اوى الواحد مش عارف يحتويها جواة
و لما بتخرج ..بتخرج بالشكل ده ..
مرة واحده بدون اى مقدمات..
فى فعلا اسئله كتيرة اوى مش لاقيين لها اجابات
كتيرة اوى اوى
بس تقريبا الواحد زهق من كتر ما هو مش عارف يعمل ايه
بطلنا نسأل عشان نلاقى اجابات ..:)

و لو على اللى بيزعلوا..
هما كتروا اوى
و مبقتش اصالح ..:S

شكرا ليك انت بجد
و شكرا لانك اديتنى ولو ثوانى من وقتك..:)

catroz said...

WhItE HeArT..

زمانك امتحنت ..
يارب تكون حليت حلو ..:D

فعلا الواحد بقى يعك كتير اوى اليومين دول
مش عارفه هنروح على فين بعد كده بجد..

يعنى ممكن اشوف حد بيخدعنى و افضل ساكته
مفتكرش ..اكيد هاخد موقف ..
مفيش حاجه بقى تقول اصل انا اخلاقى متسمحليش انى ارد عليه
اكيد يعنى هعمل حاجه .. هاخد اى موقف ..

ومصر فعلا بلد حلوة اوى ..
و ظروف الحياه هى اللى تعبت الناس بجد ..

انا مقصرة مع اصحابى اوى .. فمش هعلق على النقطه دى ..:D

البنوته اتسرعت حبتين تلاته
بس اهو ..محدش بيتعلم ببلاش ..:)

و التمس لاخيك سبعييييييين عذرا ..

ميرسى بجد على الكومينت الطوييل ده
ويارب اشوفت تانى هنا عندى
معلش على العطله بقى ..

catroz said...

hager za3bal ..

كلامك بقى كتير اوى يتقالى
انا كمان بقيت خايفه يطلع صح بجد ..