Monday, December 08, 2008

عيد تانى من غيره ...





اولا كده ...

كل سنةةةةةةةةةةةةة و انتوا طيبيييييييييييين

و ياااارب يكون عيد سعييييييييييييد عليكم كلكم يااارب ..

****
مش عارفه هو فى ايه .. بس مش نافع بجد

هو لازم كل عيد يبقى عامل كده ولا ايه ..

مش مقتنعه ان فى حاجه اسمها عيد من غيرة ..

"يا روز انا و الله هعوضك عنه ..هكون لك كل حاجه ....."

الكلام وجعنى اوى .. و اول مرة توجعنى بالشكل ده كلمتين زى دول ..

عارفه كان قصدك تريحنى شويه بس وجعتنى اوى ...

معلش .. انا عارفه انك مكنتش تقصد ..:)

واقفه الصبح فى البلكونه مستنيه اسمع صوت بابا ..

انا عارفه انه مش راجع .. بس بتعدى لحظات غصب عنى لحد دلوقتى بستناه فيها ..

اتاخرت على البيت .. مستنياه يكلمنى يقولى انتى فين ..

ولا يصحينى الجمعه الصبح عشان افطر معاه

عدى كتير ... و لسه بستنى ..

ساعات ببقى نفسى انسى ... و ساعات ببقى خايفه اوى انسى التفاصيل البسيطه دى ..


23 comments:

Dr Gad said...
This comment has been removed by the author.
Dr Gad said...

مسحت الكومنت عشان ازود حاجة

مش عارف انا لسه مخلص البوست بتاعي و لسه بشوف البوست ده حسيت ان اخر سطرين هنا برد عليهم هناك

مش عارف اكومنت بايه غير بان ربنا يريح بالك وقلبك ياروز

mina said...

روز كل سنة و انت طيبة و ربنا معاكى بجد فى فراق والدك

No Fear said...

السلام عليكم
ربنا يرزقك الصبر
و يجعل مثواه الجنة
و يكون لقائكم في الجنة إن شاء الله
.
بس أنا أعتقد إنه هو نفسه عاوز يقولك أفرحي و عيدي و كملي حياتك بفرحة و سعادة
.
كل سنة و أنت طيبة

MONDAHESH said...

مش هينفع تنسي

س مش هينفع ماتعشيش حياتك بشكل طبيعي

ربنا يصبرك وكل سنة وانتي طيبة وبخير دايما



تحياتي

romansy said...

معلش يا روز
اكيد الغايب لازم فى يوم هيعود
واقولك كمان
ازاى يغيب
وهو ساكن فى قلبك
كل سنه وانتى طيبه
يارب يعدى عليكى الايام بخير
وسلام
كل عيد وانتى طيبه
وفى فرح وسعاده

Semsema28 said...

وانتى طيبه يا جميل

وربنا يرحمه ويغفر له

Anonymous said...

ربنا يريح قلبك ياروز

كل سنه وانتي طيبه

محمود محمد حسن said...

الحياة مش سهلة

الحياة عاملة زي رحلة في صحرا وانت ماشيها لوحدك،برد وعواصف ورملة ووحدة وخوف ، وانت رابط اللثام على وشك ومعاك الدابة بتاعتك وماشي،

لازم تعدي ، لازم تواجه وتعرف إن الرحلة مش سهلة خالص، ما ينفعش نقف في النص ونقف ونقول كفاية كده،

لازم نتشبث بالأمل في كل لحظة ،لازم نكون اقوى من كل اللي بيواجهنا ، لازم لما تنتهي العاصفة ، نقوم بسرعة ننفض نفسنا من الرملة اللي علينا ونكمل

لو افقدتنا الحياة حد بنحبه اوي مش لازم نقف، مش لازم حياتنا تنتهي بعده، لازم نلم شتات نفسنا ، لازم نكون اقوى ونعدي ،

لأن الحد اللي بنحبه ده لو شافنا واقفين مكانا متألمين من فراقه حيضايقه جدا اننا وقفنا مكانا بعديه ، ولو كان بيحس بينا دلوقتي ، حالاً حيفرحه جدا اننا قدرنا نعدي ازمة فراقه ، وبنكمل

نصيبنا كده ، لازم نكمل

تحياتي وكل سنة وانتي طيبة

Hannoda said...

اولا كل سنة و انت طيبة


ثانيا
الحزن معروف عنه انه بيبدأ كبير و يتضائل
أما الذكرى بتبدأ كبيرة و تتعمق اكتر من العمر و الوقت
اعتقد خوفك من انك تنسي مش في محله
لإن الغاليين علينا مابيتنسوش أبدا
اطمني

وقفت كتير قدام السؤالين الاخيرين
وكمان فهمت قوي ليه آلمتك جملة "هاعوضك عنه"

يا رب يرحمه و يجمعك بيه في الجنة باذن
الله

ويارب تفضل كل تفاصيله جواكي تدفيكي و تطمنك

كل سنة وانت طيبة

maha said...

سلام عليكي يا نونو
و الله علي بالي اليومين دول اوي مش عارفة ليه ؟؟
لسه فاكراني ؟؟؟:)
كل سنة و انتي طيبة يا جميلة
معلش جاية متاخرة
ااقولك علي حاجة ...؟؟؟
ساعات اللي حوالينا و قريبين مننا بيكونوا عايزين يطمنوا علينا لانهم خايفين علينا اوي
يمكن كلامهم برغم نيتهم الطيبة بيوجعنا ..بس بيكون قصدهم خير ..لكن في نفس الوقت الكلام مش بيخفف عننا ....
بلاش تنسي بارادتك عشان متلاقيش نفسك فجاه ناسية كل حاجة و تتحولي لانسانه مش هي نونو اللي انتي عارفاها
متزعلي لو كلامي صعب شوية بس انا حاساكي اوي
الله يرحمه ..ادعيله كتير ..و كل ما تحسي انك مستنياه.. اتكلمي بصوت عالي كانه قدامك ..اكيد راح يسمعك ..عارفة ..اكيد هترتاحي لو اتاكدتي جواكي انه سامعك
جربي و قوليلي حسيتي بايه
سلام
مها

smraa alnil said...

ودي سنة الحياة

لا هتنسي بس هتتعايشي بمرور الوقت

ربنا يرحمه يارب ويدخله الجنه من اوسع ابوابها
امين
امين
امين

catroz said...

Dr Dead ...

يارب منور دايما ..
بس كانت حلوة اوى الصورة اللى فى البوست بتاعك ..

catroz said...

mina ...

و انت طييييب يا مينا ..
وربنا معاك فى الامتحانااات

catroz said...

No Fear ...

اللهم اميييين ..

مهما حاولنا نفرح ولا نرسم بسمه على وجوهنا
العيد مختلف من غيرة ..

كل سنه و انت طيب ..

catroz said...

MONDAHESH ..

كلامك صح .. بس بنحاول نتعايش

وانت طيب و بحير برضوا دايما ..

catroz said...

romansy...

مش دايما بيعود ..

كل سنه و انت طيب ..

catroz said...

Semsema28...

اللهم اميييين ..

وانتى طيبه يا سمسمه ..

catroz said...

hager za3bal ...

ربنا يريح قلوبنا كلنا ..

كل سنه و انتى طيبه يا جمييل ..

catroz said...

محمود محمد حسن ...

كلامك جميل اوى بجد ..
فهمت تقصد ايه
احنا ادينا اهو نحاول نكمل

كل سنه و انت طيب
و يارب منورنا دايما ..

catroz said...

Hannoda ...

و كل سنه و انتى طيبه يا قمر ..

فعلا الذكرى بتكون كبيرة و تتعمق اكتر ..
مش بيكون دايما خوف من النسيان ..
ساعات بنتمنى اننا ننسى ..

ربنا يجمعنى بيه فى الجنه يااارب ..

catroz said...

maha ..

مها انتى من الناس اللى صعب اوى انساها
خصوصا بسبب كلمه نونو دى ..:D
و مجاتش متاخرة ولا حاجه يا قمر
كل سنه و انتى طيبه و يارب على طول مبسوطه ..

بيحاولوا ايوة يخرجونا من المود اللى احنا فيه
بس ساعات بتبقى طريقه توجع اوى ..

انا فعلا بكلمه كتير ..
بلاش اقول كنت بقوله ايه كمان
عشان فى ناس ممكن تشك فى سلامه عقلى ..

catroz said...

smraa alnil ...

اللهم امييين ..