Wednesday, August 25, 2010

و ضحكت بصوت عالى !!

غريب اوى .. اللى نحبوا ميحبناش و اللى يحبنا منحبوش !!!

***

مش عارفه اشمعنى النهارده افتكرت الموقف ده
مش عارفه ليه حتى الموقف دا اللى افتكرتوا ما بين مواقف كتيره اوى حصلتلى معاه

من حوالى 10 سنين
عشر سنين بحالهم...!!!
ايوة انا دلوقتى بقيت فى رابعه جامعه و ساعتها كنت لسه مخلصه خامسه ابتدائى
قبل ما احسبهم و الاقيها عشر سنين انا كنت فاكراهم اقل من كده
كنت فاكراهم اقل بكتير من كده
يمكن انا فاكره الموقف دا كانوا كان امبارح
دنا حتى فاكره هو كان لابس ايه
قميص نص كم لبنى فاتح و بنطلون رمادى
و البنطلون اللى كنت انا لابساه ساعتها انا لسه متكعبله فيه النهارده
سبحان الله
غريبه ان شكلوا جديد لسه
دول عشر سنين بحالهم

بعد امتحانات المعادله اللى ضيعت فيها الصيف مذاكره
و كانت اول مرة اعرف مين العقاد
و اما كانت صفا بتذاكرلى و تقولى درس القراءه النهارده عن العقاد
اقولها طيب
تقولى مين العقاد
اقولها معرفش
تبصلى تانى و تقولى مين العقاد
استغرب من نبرتها و نظراتها و ارد تانى معرفش
دلوقتى لو انا مكانها و بسال البنت اللى فى خامسه ابتدائى مين العقاد و قالتلى معرفش
اول حاجه هتيجى فى بالى البنت دى عبيطه ولا ايه
بلاش تفاصيل طيب
يوم ما كنت رايحه معاه اجيب النتيجه
من كتر الخوف مقدرتش انزل و خليتوا هو ينزل يجبهالى لوحدوا
رجع و على وشوا الابتسامه اياها ... و قالى انا اسف منجحتيش !!!
طيب و لما انا منجحتش وشك ليه بيقول حاجه غير كلامك
و لقتنى فى العربيه بصوت و بعيط
عندى عشر سنين هعمل ايه مثلا يعنى
و هو انا بعد دا كلوا منحجش ازااااى !!!!!!!!!!!
فاكره ساعتها لما نزلنى من العربيه
و اخدنى لاخر الشارع و قالى هقولك بس هنعملهالهم مفاجاه متبوزيهاش بقى
يعنى انا نجحت ؟؟!!
ايوة نجحتى ...
بتتكلم بجد !!!!!!!!
ايوة و الله نجحتى
ضحكت ضحكه بصوت عالى لحد دلوقتى مش ممكن انساها
انا فاكره ان الناس كانت بتتفرج علينا فى الشارع
و طبعا رجعنا العربيه وشى مليان دموع بس مش عارفه امسك نفسى و مضحكش
و ساعتها مبقتش مفاجاه ولا حاجه.....

***

طب و العيال اللى كانوا معايا فى الفصل عملوا ايه؟؟؟؟؟

محدش نجح غيرك

العيال اللى كنت بسال عليهم دول كانوا اول تعامل ليه مع "عيال" مصريين فى سنى
انا فاكره فى احدى المواد ان فى ولد طلع كتاب كامل يغش منوا وسط اللجنه
و كان دى شىء طبيعى جدا و محدش علق
ما عدا انا و ولد تانى كان اسموا ابراهيم كان حالاتى بالزبط بيعمل معادله
فتحنا فى الدحك وسط اللجنه و مبقيناش عارفين الناس دى مجانين ولا احنا اللى مجانين
الولد دا نفسوا كان بييجى الامتحان بهدوم ملهاش علاقه ببعضها
كان فى بنتين توأم
كان فى بنت دايما بتبصلى من فوق لتحت وانا برد عليها بابتسامه افتكر كان فيها نوع من الازبهلال

كانت الفكره اللى عندى المصريين دول عيال هبل

ولما كبرت طبعا الفكره اتاكدت عندى و يمكن انا كمان بقيت هبله زيهم

***
مومو كانت بتقولى انا مش مرتبطه بالفانوس اوى علشان كنت فى قطر و هناك مفيش حوار الفوانيس دا

انتى عارفه يا منى.. ايوة بقول منى .. عارفه ان حوار الفوانيس دا شكلوا كده فى مصر بس مش فى اى مكان تانى

اصل انا كمان مش مرتبطه بالفوانيس...

افتكر جبتوا مرة واحده او مرتين فى حياتى عشان صادفت اننا كنا فى مصر فى رمضان

حتى الفانوس دا لما ست الهانم اوسى جات للدونيا .. ادتهولها

عشان مره فى رمضان لفوا لف على فانوس عدل ملاقوش ..

فكان دا من نصيبها

هى زى بنتى برضوا مش خساره فيها


***

عارفين يا ولاد انجى على ؟؟

المذيعه؟؟
ايوة ايوه اللى بتلبس مش لابس دى

ايوة هى..
عارفين بقى خالو سعيد؟؟

الطيار ؟؟

ايوة هو ده..

مالوا بقى

انجى تبقى بنتوا

انجى على بنت خالو سعيد ؟؟ الراجل الامور ده ؟؟

ايوة ايوة هى بنتوا

طب انتى تعرفى انهم وقفوها عشان بتلبس مش لابس!!!

***
هو ينفع اتنين كانوا بيحبوا بعض .. يرجعوا صحاب تانى؟؟؟

عارفين ان دايما اللى بيقول ااه ممكن نرجع اصحاب تانى ...هو دا اللى مبيحبش التانى

***

الشخص اللى يبان انك قريب منوا ... انت فى الاصل بعيد عنوا
و العكس
تعرف انى مخدتش بالى من ده الا لما بقينا بعاد عن بعض

خدت بالى كمان انك ساعات كتير بتتكلم مبيكنش قصدك تتطمن
لاء
دا مجرد فضول عندك عاوز تعرف حاجه معينه
و متجيش تسال الكلام دا عليا ولا مش عليا عشان انت اكيد عارف انى هقولك ملكش دعوه بزوق

***
بمناسبه الزوق
هو ازاى تدى حد استماره سته لحد بزوق

انا عن نفسى .. بقطع بدون اى مبررات
او بمشى بمبدا
"بتبعدينى عن حياتك بالمللللللللللللللللل"

***

هو غلط انى مبحبش حد يقرب من حاجاتى ؟؟

6 comments:

Dr Gad said...

وحشتني بوستاتك يا روز والمدونه بتاعتك

نايس بوست وحاسس فيه بحاجة غريبه كده يعني ابتسامه علي تساؤلات

romansy said...

بهديكم بوكيه من الورورد على أنغام أحلى عود ودايما العيد عليكم يعود كل سنة وانتم دايما بخير

عيد سعيد على كل الناس الطيبين

ريهام العربي said...

هههههههههه بوست جميل وانت عارفه ان انا زي حلاتك وفركتيني بالعشر سنين اللي فاتو بس انا معملتش معادله لاني منزلتش مصر مع الاسف وفعلا

الفوانيس تقريبا في مصر بس لان معندناش منها


وعلي فكره انا معاكي ان الاحباب عمرهم ما يبقو اصحاب مستحيييييييييييييل


وفي حاجه كمان
انا كمان مبحبش حد يقرب من حاجتي !!!



تعرفي بيعجبني تفكيرك والبوست ده عجبني قوي ابقي ادخلي ايميل وحشني الكلام معاكي بجد

وانا عارفه اني مقصره بس حبيت اني اخد بريك من النت وابني حياه علي ارض الواقع وانشغلت بده ومعرفتش اخبارك ايه

ابقي طمنيني عليكي يا عسل

يوميات مضيف فى الطيران said...

مدونه جميلة ....هذه اول زيارة
ولا اعلم لماذا لا تكتبين بانتظام؟؟؟
كلامك كتير مهضوم ....زى ما بيقول الشوام وسردك منطقى ولذيذ
تقبلى تحياتى

No Fear said...

السلام عليكم
أنا قريت الجملة الأولي و مقدرتش أكمل
.
المهم ناوية ترجعي تتدوني أمتي؟؟؟

وجع البنفسج said...

هو غلط انى مبحبش حد يقرب من حاجاتى ؟؟
لا يا روز مش غلط .. انا عن نفسي مابحبش حد يقرب من اشيائي نهائيا حتى لو كانت اشياء تافهة مثل قلم او حتى محاية !! مش عارفة ليش بس خلص انا هيك ، ولحتى الان العابي وانا صغيرة عندي ومابرضاش اخلي بنتي الصغيرة تلعب فيهم ،، تصوري ،، اصلهم غاليين عليا قوي !! تقولي راح ارجع طفلة ثاني !! عموما يسعدني مروري بمدونتك ..