Tuesday, July 19, 2011

عقلى حبيبى


دا انا حتى مش عاوز انسى

***

هى عارفه انا كنت بتكلم على مين
و انا عارفه هى كانت بتتكلم على مين
و احنا الاتنين عملنا مش عارفين
و عجبى

***
ممكن متبقاش معاها زى ما كنت معايا ؟؟؟
اكيد انت عارف ليه
:)

***
اول مرة احس ان الواحد المفروض ساعات يفقد "الأمل" و يستسلم
اصل طول ما انت عندك امل ف الحاجه دى هتفضل وراها
حتى لو مش ليك
انت لمجرد عندك امل مش عارف تديها ضهرك و تمشى و مترجعش تانى
انت مجرد عمال تعصر ف قلبك و عقلك و حياتك
و كلمه ترفعك السما .. و كلمه تغرقك و كلمه تكسر كمان حته جواك فوق اللى اتكسر قبل كده
لمجرد ان عندك شويه امل
هو ايه الامل ده اصلا
دا حتى مش حاجه اكيده .. يعنى ممكن .... و ممكن ولا حاجه

***
هو ليه عقل الواحد بيفتكر و ينسى ب مزاجه
ليه حاجات يبقى الواحد نفسوا ينساها .. يفضل غصب عنوا فاكرها بكل تفاصيلها الممله

و حاجات حلوة تبقى نفسك فاكرها على طول تلاقيها بتتلاشى من جواك

***

عقلى حبيبى .. ياريت تفتكر الحلو و تنسى الوحش
بعد اذنك يعنى لاننا شكلنا مطولين مع بعض
و انت مش هينفع تفضل ماشى معايا خلف خلاف كده

***
ب المرة كمان .. قلبى حبيبى ... اتلم بقى و ارجع زى ما كنت

***
فعلا كل واحد بيشوف الانسان اللى قداموا زى ما هو عاوز
اصل انا معنديش انفصام ف الشخصيه يعنى عشان حد يبقى مقتنع انى عيله و هبله و التانى شايفنى كبيره و عاقله

***
ايوة صحيح
هو انا كده يعنى المفروض كبرت ولا لسه شويه ؟؟
طيب هو انا كبرت لحد فين
ولا انا بقيت واقعه بين الحته بتاعه اخر ايام الهبل و بدايات اللى مش هبل
هى دى يعنى المفروض تبقى مرحله انتقاليه بين الهبل و اللى مش هبل مثلا ؟؟
"ملقتش كلمه غير هبل"

***
قرفانه من البشر معرفش ليه
ممكن ابدلهم بحاجه تانيه غير البونيادمين
نبدلهم ب قطط مثلا
بلاش قطط مبحبهاش
نبدلهم ب شويه دباديب ممكن
هيبقوا احلى

***
عارف ... مبقتش احب اسمع حاجه و افتكرك او افكر فيك
بس غصب عنى
مش كارهه ده
بس برضوا مش حاباه
و انت برضوا عارف ليه

***
كنت عارفه ان الناس بتعمل كده
بس بشكل ما كنت شايفه ان الناس اللى انا معرفهمش هما اللى بيعملوا ف بعض كده
لاكن اللى اعرفهم لا ... كلهم ملائكه

***

هو المفروض اسيب حقى و اقول ربنا هياخدلى حقى
ولا دى هيبقى اسموا تواكل على الله مش توكل
امتى لما اسيب حقى يبقى صح و امتى غلط

***
بحب فيكى انك بتكتبى البوست بالساعه
بالمرة بقى اوصف الجو عشان لما ارجع اقرى تانى

***

لابسه البتاع البمبى ... منمتش من يومين غير 6 ساعات متنطوره
الجو حر .. على شويه رطوبه
البيت كلوا نايم .. و المفروض هنزل مشوار كمان ساعتين و انا منمتش
بيقولوا النتيجه طلعت ... بس مش عاوزة حتى افتح السايت اشوفها
ممممم .. بسمع "برونو مارس" و مش قادره استوعب ازاى صوتوا بيخطفنى كده
بنزل اتمشى كل يوم ساعه ...
بنام على الكيبورد و احساس قوى بيقولى انى هقفل الويندو من غير ماعمل بوست
:D
فلانه كل متشوفنى بتسالنى على فلان و انا ابقى عاوزة اولع فيها بمعنى الكله

جمال خلاص سافر صحيح
بس هييجى كمان 4 شهور ان شاء الله

محمد بقى بيقوللى هيسافر ...
معرفش ليه مش مصدقاه
اول مرة ابقى نفسى يكون بيكدب على :D

***
مش هفقد الامل ... لانى اصلا لا عاوزة انسى ولا افقد الامل
المعادله بسيطه جدا

***
اربع سنين و لسه بتوحشنى
امتى هجيلك بقى :)


***

ك العاده ... لو حد قرى و حس انوا ضيع وقتوا
انا مش اسفه انا مش ضربتك على ايدك عشان تقرا البوست :P


تصبحوا على حاجات حلوة ....


2 comments:

Baskouta said...

حبيت البوست ده اوي
وحسيته اوي

~ISLAM~ said...

انا فخور بيكى ههههههههههه

مالك محتاسه ليه فى الكلام كده

هبله مش هبله دى حاجه تخصك محدش ليه خاجه عندك

اتجننى زى مانتى عايزه جربى نفسك فى كل الاشكال والالوان وشوفى ايه انسبلك

متوجعيش دماغك بالناس
دول مبيعجبهمش العجب ولا الصيام فى نوفمبر

اشطه سلام