Wednesday, October 31, 2007

حضن دافى ...




كانت راسى جنب راسه و كنت بكلمه
اتنفس كويس..كده صح..ايوه خليك فايق
انت سامعنى صح..اه عارفه انك سامعنى ...كان مغمض عينيه
بس كنت حاسه بجسمه دافى و ايديه دافيه على الاقل
بدا يستشهد
و انا معاه
هو بيستشهد ليه
برددها معاه
كتييييير
شويه شويه...نفسه بقى اصعب
و رجعت تانى اكلمه
انت سامعنى صح
ايوه سامعنى
شويه شويه بيبقى بطىء
فى واحد تانى من حوالى سنه و شهرين من قبل وفاه بابا
مات فى بين ايدى بنفس الطريقه دى تقريبا
مش عارفه....بس فى نظره شفتها فى عينيه
شفتها المره اللى فاتت
لما التانى مات
هى نفسها بالظبط
هى لحظه طلوع الروح
هى دى النهايه ولا ايه
اللحظه دى فاكراها اووووووووى بكل تفاصيلها
عرفت ساعتها انه مات
مبحبش افتكر اللحظه دى خالص
..:(
بس كنت بكدب نفسى
لا ..متفكريش بالطريقه دى
اهو صاحى اهو و كويس
شويه و الدكتور هييجى و يطمنك عليه
جه الدكتور و خلانى ااقوم
بس فضلت جنب بابا برضه
كنت ماسكه ايديه
لسه كانت دافيه و لسه حاسه انه بيتنفس
مش عارفه بقى حاسه كده لانى عايزه كده ولا حاسه كده لان هو كان فعلا كده
جنبى الدكتور بكلمه
ايه
هو كويس
طيب رد على
فى ايه
و الدكتور مبيردش
قالى
متنفيش جنبى زى الاطفال
لا انا طفله بقى و هفضل ااسال لحد ما افهم فى ايه
ورجعت تانى اسال نفس الاساله دى
دكتور..هو بابا كويس صح
طيب هنعمل ايه دلوقتى
اتصرف
انت مش بترد على ليه
و اخواتى واقفين
و احمد كان جنبى بالظبط عايزنى برضه ااسكت
و كنت بسال تانى و تالت و هو مش بيرد على
فى مرايه كانت جنبى
عينى جات عليها
شفتنى فيها انا و بابا
لون بابا زيي
طيب الحمدلله
لسه عايش
امال انا مش حاسه بيه بيتنفس ليه
حد يفهمنى بقى يا جماعه
الراجل الدكتور بدا يلم حاجته تانى
انت بتعمل ايه
طيب فهمنى هو فى ايه
حسيت انى جوه فيلم عربى
لما الراجل بيموت الدكتور بيلم حاجته و بيقولهم البقاء لله
بس دا متكلمش
دا نده اخوى و طلعوا وقفوا بره باب الشقه
ساعتها كانت ااول مره اسيب بابا
رحت معاهم و بسالهم هو فى ايه
الدكتور مشى
و احمد بدا يعيط
اول مره اشوف دموع فى عيون احمد
احمد هو قالك ايه
طيب ازاى يعنى هو بيهرج الراجل ده ولا ايه
احمد خدنى فى حضنه و عايز يتكلم و مش عارف
و بيعيط
اول مره اشوف اخوى بيعيط
سبتهم و جريت تانى على بابا
مسكت ايديه
كانت بارده
لالا اهى مش بارده اكيد
و ابتديت تقريبا اكلم نفسى
ازاى ايديك بارده
انا بيتهىء لى صح
طيب رد على و قولى ان ايدى بتهيس
و انت دافى و انا اللى حاساها بارده
اصل دى ايدك بس انت جسمك اهو دافى و كويس
فضلت اكلمه تانى
قوم بقى يا بابا
قوم يلا عشان عندى مذاكره
انت عارف انا كده كده مش هذاكر يعنى بس معلش قوم يلا
طيب قوم انت عندك شغل كتير لازم يخلص
قوم طيب عمو جاى كمان شويه هيتخض لو شافك بالمنظر ده
قوى بقااا
طيب هو انت مش بتتنفس ليه
بص ايدك اهى بارده قوم و هعملك حاجه دافيه تشربها
ده كله و احمد بيقومنى بس مش عارف
و اخواتى كمان
و ماما واقفه مش فاهمه حاجه فى حاجه
و انا لسه بكلمه
و هو مش بيرد على ولا حاجه
حطيت راسى على كتفه و غمضت عينى
و ماسكه ايده
و لسه بكلمه
..:)
بصيت فى الساعه لقيتها
تقريبا واحده و نص
الكلام ده كله حصل من الساعه 9 تقريبا لحد واحده و نص بالليل
حسيت انهم نص ساعه بس اللى عدوا
و لما شالوه و حطوه على السرير
انا كنت جنبهم
بيغطوه
و بيغطوا وشه
بقولهم ليه
سيبوا وشه هو مكانش بيغطى وشه و هو نايم
و برضه محدش بيرد على
ساعتها بس فهمت
انه مات


35 comments:

كفايـة طيبـة said...

:)

:)

انا مش عارفة اقول ايه

بس عايزة اقولك ادعيله اوى ياحبيبتى
هو محتاج دعوتك والله

وفى الاخر .. متفكريش كتير فى اللحظة دي

ربنا يجمعنا ببعض على خير يارب :)

Big Code said...

طبعا اصعب حاجة الفراق وكلنا بنخاف من اللحظة دي وبنتخيل الدنيا مش هاتنفع نعيشها زي الاول
حاولي تكملي حياتك وتفكري ازاي تحقق امله فيكي

مش عارف اقولك ايه غير ان ربنا يصبرك

ومتبقاش تطولي علينا تاني كدة
باااااااي

Big Code said...

طبعا اصعب حاجة الفراق وكلنا بنخاف من اللحظة دي وبنتخيل الدنيا مش هاتنفع نعيشها زي الاول
حاولي تكملي حياتك وتفكري ازاي تحقق امله فيكي

مش عارف اقولك ايه غير ان ربنا يصبرك

ومتبقاش تطولي علينا تاني كدة
باااااااي

safa7_karmooz said...

:)

عطاالله النديم said...

لقد دخل بيت الراحة الحقيقى .. فدعوه

ولــــــــــو said...

تجربه صعبه جدا على اقوى الناس واشدهم تماسكا مش هاقدر اقول غير انه ربنا يجازيكي كل الخير ويرحم باباكي كلامك اتأثرت بيه جدا وبادعي من كل قلبي ان مش يبقى فيه حد ربنا يكتب عليه انه يمر بالتجربه القاسيه دي

NeRmeeN said...

ربنا يصبرك يا حيبتى:(

حاولى تتماسكى ...مس عارفة اقولك ايه
:(

sa'7so'7te said...

الله يرحمه بجد

بس احمدى ربنا انك ممكن لسه توصليله سلامك لانك من ذريته و اى دعاء و اى عمل صالح و اى دقة جارية بتوصله و ساعتها بس هتحسى انك هتقدرى توصليله اد ايه انتى بتحبيه واد ايه هو واحشك

صدقينى ده احسن كتير من ان حد عزيز عليكى اوى برضه يموت بس مش عارفة يا ترى هو عارف انه واحشنى يا ترى بيوصله سلامى

بجد ربنا يساعدك تعدى الفترة دى
و تحياتى و تعازى ليك

الزهراء said...

:(



اكيد هوا ارتاح من الدنيا

وان شاء الله في الجنة

ادعيله كتيييير

ربنا يرحمه يارب

break said...

البقاء لله


لحظات مؤثرة جدا

:(

catroz said...

كفايه طيبه ..

...:)
انا مش بفكر فى اللحظه دى
بس ساعات كتيييييييير اوى بفتكرها غصب عنى

ربنا يجمعنا على خير ياااااااارب..

............

big code..

مهما كان الدنيا بتتغير
بس بنحاول نبقى زى الاول ..
مع انه صعب اووووووى نبقى زى الاول
الحمدلله ..:)

معلش بغيب عشان ظروف الدراسه و كده
منورنا بجد ..

catroz said...

safa7_karmooz..

معلش .. كمان بوست كئيب ..:(

...........

عطاالله النديم....

ياااااااارب ..:)

catroz said...

ولــــــــــو..

فعلا بتبقى صعبه فعلا على اى انسان
يارب محدش يمر بيها
منور بجد ..:)

.............

nermeen ...

الحمدلله على كل شىء ..:)

catroz said...

sa'7so'7te...

ياااااااااااارب ..
هو اكيد عارف ..:)

منورانى يا قمر
و كل سنه و انتى طيبه ..

...............

الزهراء ..

يااااااارب فى الجنه ..

وحشتينى يا قمر .. يارب تكونى بخير

..:)

catroz said...

break..

الحمدلله على كل شىء ..:)

Ana keda said...

ياااااااااه

فكرتينى بتفاصيل زيك كده قربت انساها بس انا بجد منسيتهاس خالص

برغم فات عليها 5 سنين رجعتينى ليها

بصى البعد عمر ما بيبعد الناس الى بتحبيها جوه قلوبنا اوى

حاساكى اوى وكلامى خلص بجد

احساس لسه حى said...

عزيزتى
فراق اللى حولينا مكتوب وناس هيفرقونا وناس احنا هنفارقهم
المهم لما يفرقونا يكونوا سايبين ذكرى حلوه فى دنيتنا ونحس انهم هيسعدوا فى اخرتهم واحنا كمان لما نفارقهم نحاول نسيب الذكرى الحلوه ليهم ونحاول نطمن على اخرتنا
اهم شئ اللى بقيله منه وواجب عليكى دعوتك
وكل ما تكون انسانه كويسه كل ما دعوتك هتنفعوه اللى يحب اللى ماتله يدعيله ويحاول يكون اهل لهذه الدعوه
تحياتى والله يرحمه

كمان بعد اذنك ادعوك لمدونتى علشان فى خلاف بينى وبين ايمى وعملت بوست عليه وقولت اجيب اللى بيعلقوا يشهدوا بينا ممكن
تحياتى سلام

Dead Man said...

روز ......بجد ربنا يصبرك حاجة صعبة فعلا انك تفقد حد عزيز عليك بالمنظر ده بس ده قضاء ربنا وكل اللي بايدينا اننا ندعيله بالرحمه والمغفره

وياريت تبطلي تفتكري اللي حصل كتير عشان تقدري تكملي ...

The Manager said...

ربنا يرحمه
ويصبركم جميعا

مقدرش اقول غير كدة والدعاء طبعا

amro said...

كاتروز
مسا الخير اولا
البوست حزين ومليان بالمشاعر
مش عيز اقولك ان الموت حق ووسبيل الجميع هو هذا المسير القاصد الى الله، دائما العزاء هو فى التجاوز والشعور باننا بنعمل حاجات بتسعد اللى رحلوا
مش عارف ليه حاسس انك توقفت كتير فى المرحلة دى، انا عارف انها تجربة صعبة جدا لانو مات فى حضنك، بس انت اقوى من كل الاحزان، ذى مقلوتيلى مرة رددى معايا انا قوية، واكبر من كل الاحزان
ربنا يرحموا هو محتاج الى الدعا
اذا مات ابن ادم انقطع عملو من الدنيا الا ان يدعولو له ابنائه الصالحين
تحياتى

UNIQUE said...

انا مقدرة احساسك و ان كتير بتكون الذكريات صور بتزورنا دايما و مش ممكن نمحيها . و صدقيني ما حدش ممكن يقدر موقفك غير اللي لاقدر الله مر بيه ورغم كده انا مبسوطة انك قادرة تعبري عن اللي جواكي .. مش لازم نحبس مشاعرنا

تحياتي لك واسال الله الرحمةوالمغفرة

لموتاكي و تموتانا واموات المسلمين اجمعين

على فكرة انا البلوج بتاعي حزين جدا وممكن تشرفيني بزيارتك

اسفة للاطالة

وينكى said...

ممكن أستغل المساحه دى واعمل اعلان صغير
16 نوفمبريا جماعه..مستنياكو يوم الجمعه الجايه الساعه 8 م..قاعة الحمكمة بساقية الصاوى
هانتقابل ونحضر حفلة لفرقة أيامنا الحلوه..واحده من اكبر التجمعات البلوجرية المهمه
تعالوا وقولوا للحبايب

mohamed said...

محدش هيحس بالأحساس دا غير اللي حس بدفء الأب ورعايته وحنانه

رحمه الله

حسام خليل said...

نسأل له الله العفو والمغفرة.
ربنا يجمعنا بيه في الجنة.


قدرتك على التصوير جميلة يا روز.

تحياتي،،
حسام

catroz said...

Ana keda...

الحاجات دى عمرها ما بتتنسى خالص اصلا ..
..:)

..................

احساس لسه حى ...

طبعا مكتوب و على طول بنفتكرهم بالخير و بندعى لهم

يارب بس الناس يبقوا يفتكرونا احنا كمان بالخير ..:)

catroz said...

Dead Man...

الحمدلله بقى
مش بفكر كتير .. بفكتر غصب عنى :s

منورنا بجد يا ديد ..:)

................

The Manager...
اميييييييييين يااارب...:)

catroz said...

amro..

مساء النور يا عمرو ..

انا قويه و اكبر من كل الاحزان
بكررها اهو لعل و عسى تنفع بقى ..:)

تحياتى ليك ..

..................

unique...
كل نفس ذائقه الموت ..:)
...
اول مره اشوفك هنا
بس منورانى بجد و هشوف البلوج بتاعك اكييد

catroz said...

وينكى ...

البلوج ده مش بتاع اعلانات "وش مطلع لسانه"

.................

mohamed...
حسيت بيه كتير اوى .. معرفتش قيمته بجد الا دلوقتى
اللهم امييييييييييييييين

catroz said...

حسام خليل ..

ياااارب نتجمع فى الجنه بقى

منورنى يا حسام ...:)

Mina said...

روز .. خلتيني ادمع!

ودى حاجة مش بتحصل بالساهل

Van Gogh said...

البقاء لله


وانا لله وإنا اليه راجعون

catroz said...

Mina....

مش اقصد معلش..
المهم منورنا بجد
..:)

..........

Van Gogh..

الحمدلله ..

Emre Belözoğlu said...

بسم الله الرحمن الرحيم .. كل من عليها فان ويبقى وجه ربك ذو الجلال والاكرام .. صدق الله العظيم ..



ربنا يتولاه بمغفرته ورحمته بإذنه سبحانه ..

amro said...

انت فين
يرب تكونى بخير
تحياتى لك

catroz said...

Emre Belözoğlu..

اللهم اميييييييين ..

..........

amro...

انا بخيير الحمدلله ..
دعواتكم بس..