Friday, March 28, 2008

28 -2 -2008

مش عارفه بقى بس اهى مواقف و بتحصلى و انا راكبه مواصلات و خلاص
طبعا ساعتين كل يوم مواصلات بس ..طبيعى جدا هشوف حاجات غريبه
يمكن متكونش غريبه ولا حاجه .بس انا اللى شايفاها غريبه wacko.gif

النهارده ركبت ميكروباس ..اللى بيروحوا من السابع للعباسيه دول
العباسيه ..!! ايوة العباسيه اصل انا بعيد عنكوا جامعه عين شمس
صحيح بمناسبه كلمه "عين شمس" من كام يوم كده كان الجو شويه حر و شويه برد
كنت متضايقه من الجو الغريب ده .. يعنى اللى عايز يجيله برد يخرج فى الجو ده ..
و اهو جالى برد .. و زمان محمد فرحان فى .. dry.gif
يوووة مش ده موضوعنا دلوقت..المهم..
لما كنت بقول لواحده صاحبتى الجو شويه حر و شويه برد .. هو ايه اللى احنا فيه ده
قامت ردت على و قالت لى" تصدقى ليهم حق يسموها عين شمس .."
مفهمتش هى قصدها ايه طبعا ..
مش عارفه ده غباء ولا لانها بتقول حاجه ملهاش علاقه بالموضوع اصلا .. huh.gif

و نسيت اسالها تقصد ايه ..لو حد فهم يقولى biggrin.gif

مش ده موضوعنا الاساسى على فكرة rolleyes.gif
المهم كان قاعد جنبى واحده حاجه كبيره كده و بتاكل لب ..
و انا بكرة ريحته بجد بجد بجد يعنى بطريقه بشعه.. ph34r.gif
خييير ..
و قاعد وراى واحد عمال يكلم السواق و صوته عااالى فى ودانى..
اهو الراجل ده عسكرى و بيفتخر بانه عسكرى .. huh.gif
بيقول للراجل..

" دول بيعاملونا زى الزباط بالظبط و بيحترمونا و كل حاجه قشطه"

هو على فكرة اللى بيقول زباط مش انا ..biggrin.gif .. بس قشطه دى من عندى .. cool.gif
مفهمتش هو الراجل يقصد ايه يعنى بانهم بيعاملوهم زيهم
بس اول حاجه جات فى بالى ..طيب يا عم طالما بيعاملوك حلو كده
امال روكا كارة الجيش ليييه .. biggrin.gif

هتقولوا مين روكا .. اهو كائن حى ياكل و يشرب .. و يارب ما يدخل و يشوف الكلام ده ..
اصله بقى مفترى اليومين دول..

بمناسبه كلمه دول .. دكتور احمد نافع تقريبا نص كلامه فى المحاضره فيه كلمه "دول"
الكلمه دى بيقولها فى اى جمله و فى اى ظرف و فى اى مكان و فى اى بتنجان mad.gif
لدرجه انى لما بقيت اسمعها بقيت افتكرة ..
ربنا يحفظه .. من القلائل المحترمين فى الجامعه .. rolleyes.gif

فعلا كمان بمناسبه انى دخلت سبع مواضيع فى بعضها دلوقتى ..
من الواضح انى عايزة انام ..
مع انى نايمه امبارح من 2 بالليل لحد 9 الصبح
يعنى نوم كويس بالنسبه لكائن مجهول الهويه .. اللى هو انا يعنى cool.gif

المهم الراجل العسكرى اللى مبسوط بنفسه
بيحكى للراجل اللى بيسوق بيقوله..

"الحياه ملل ملل ملل .. ملل ملل ملل ..
اكل و شرب و نوم و خلاص على كده
يوم الجومعه بقى اللى هو الاجازة .. بروح البيت بتفرج على التلفزيون
اهو حاجه ترفيهيه الواحد يعملها بدل الملل اللى الواحد فيه "

هو برضوا اللى بيقول الجومعه .. مع تعطيش الجيم فى كل الكلام و فتح تاء تلفزيون biggrin.gif
ولكم ان تتخيلوا ..
مش عارفه بس حاسانى عماله بتريق على الراجل و هو معمليش حاجه ..
وربنا هيجيبلى حد تانى يتريق على ..biggrin.gif

المهم شويه و الراجل سكت معرفش نام ولا ايه.. 022.gif
المهم خلصنا منه
ببص على طنط اللى كانت بتاكل لب و سودانى و فاتحاها بتاع لب و سودانى
هو اسمه ايه صحيح الراجل ده ..؟؟ اللى بيبيع لب و سودانى .. unsure.gif
المهم .. لقيتها نامت .. huh.gif

و فجاه صحيت على صوت واحد بيزعق و بيتكلم فى الفون ..
"كده يا عصام .. بقى هو يعنى كده يا عصام .. mad.gif mad.gif "

بصراحه من صوته و نرفزته كنت هموت و اعرف عصام عمل ايه ..biggrin.gif

"بقى احنا متقفين على كده يا عصام .. mad.gif مش عارف اقولك ايه يعنى يا عصام .. mad.gif "

باين عصام ده كان عامل مصيبه .. 022.gif
و انا لسه هموت و اعرف هو اللى اسمه عصام ده عمل ايه.. 022.gif

" مش انا قلت لك يا عصام هرن عليك.. و انت ترجع ترن على يا عصام dry.gif "

تصدقوا طلع بيهزقه عشان فتح عليه .. huh.gif

بعديها كنا على كوبرى و شفت فلفله ..
"لى فيه شويه زكريات حلوة المطعم ده rolleyes.gif "..
و نزلنى اخر الكوبرى عشان انزل امشى من العباسيه لحد الجامعه ..
و اروح اسلم على صوحابى فى تل ابيب ..
و اطلع المحاضره اللى مدتها 3 ساعات بالطول و العرض .. bye2.gif
بخرج منها بحس انى كنت محبوسه فى سجن فدرالى .. ph34r.gif
و الدكتور بيدى statistics و انا مبحبش الماده ده اللى كلها بنقعد ننقل فى ارقام كبيرة
ونضرب و نجمع و نرسم حاجات غريبه .. wacko.gif
ماده ممله اخر حاجه .. dry.gif>_>
واهو بقالى اسبوعين مبحضرهاش .. 022.gif
و شكلى فى الاخر هخلى محمد يشرحهالى و ادخل امتحن و انجح ان شاء الله biggrin.gif

صاحيه من 9 الصبح .. و الساعه بقت واحده و نص
و المفروض اصحى 7 ونص الصبح
المفروض انام بس مش جايلى نوم ..
قاعده من الساعه 9 على المكتب و خلصت حاجات كتيرة كانت عايزة تخلص
و مرهقه اخر حاجه ..بس مش جايلى نوم ..sad.gif

هقوم اعمل اى حاجه و احاول انام ..بدل ما اروح بكرة تعبانه و هى مش ناقصه تعب اصلا
ده غير البرد اللى مش راضى يروح من عندى ده ..sad.gif

صحيح دلوقتى

يعنى الكلام ده كلوا حصل يوم 27 سنه 2008
2008
2008
2008
ايه ده هو احنا بقينا خلاص 2008
يعنى ايه
2008
سنه 2000 كانت قريبه اوى
و 2005 كمان كانت قريبه
عمرى ما فكرت ان ممكن 2008 تعدى على من غير بابا
هو نفسه مكانش يعرف انه مش هيشوف 2008
ولا هيشوف 2009
ولا هيشوف 2010
ولا حتى 2011
ولا هيشوفنى لما انجح السنادى باذن الله
ولا هيشوفنى يوم ما اتخرج
ولا لما اخد الماستر
ولا حتى و انا لابسه الفستان الابيض
ولا اى حاجه خلاص بقى ..
يلا اهو جالى سبب انى انام .. مبعرفش اعيط الا على المخده ..اللى زهقت منى..
و كل ما اروح البيت التانى بنسى اجيب المخده اللى بحبها
بكرة المخده اللى هنا .sad.gif
بس بحب بابا ..smile.gif

الحمدلله ..الحمدلله

تصبحى على خير يا روز ..
وانتى من اهله يا روز ..

نفسى الساعه 9 و نص متعديش على بكرة ..
و نفسى اسمع دلوقتى صوت حد بحبه .......................



28 -2 -2008

14 comments:

كفايـة طيبـة said...

الله

حلو اوى البوست ده بجد

بس هو فعلا كل مااقرا حتة الاقيه يتفرع لمليون موضوع :D :D

هو كل اللى عمله عصام انه فتح عليه ؟؟؟ اكيد عمل فيه حاجة تانية ...

بس اشمعنى 9 ونص ؟؟؟

قومى نامى يابنتى

تصبحي على خير ياروز :)

كفايـة طيبـة said...

على فكرة المكان اللى بيتباع فيه لب وسودانى اسمه "مقلة"

Rushdy Kamel said...

معنديش شك انك كنتي فعلا بتنامي وانتي بتكتبي
مواقف كتير بتحصل كل يوم وطول اليوم
انا بحط الراديو في ودني وبانسى الدنيا
واحيانا باشغل اذاعة الموسيقى ويبقى بيتهوفن شغال في ودني وبعرور شغال في الميكروباص

باحس ساعات كتير اني عاوز انفصل واعيش في هدوء

بوست لذيذ جدا

:)

Anonymous said...

Hello. This post is likeable, and your blog is very interesting, congratulations :-). I will add in my blogroll =). If possible gives a last there on my blog, it is about the MP3 e MP4, I hope you enjoy. The address is http://mp3-mp4-brasil.blogspot.com. A hug.

Dr Gad said...

انا ايه اللي خلاني اسيب المذاكره وانا عندي امتحان بعد بكره وادخل اتحول من البوست ده :angry:

اهو لخبطلي الكلمتين اللي ذاكرتهم يا روز :((

ههههههههههههه

لا بوست حلو بس ابقي ركزي شوية لحسن انا توهت معاكي :))

^-^ LoNeLy ^-^ said...

ببص على طنط اللى كانت بتاكل لب و سودانى و فاتحاها بتاع لب و سودانى
هو اسمه ايه صحيح الراجل ده ..؟؟ اللى بيبيع لب و سودانى .. unsure.gif
المهم .. لقيتها نامت ..


يا نهار ابيض مش عارفة المقلة اللى بتبيع التسالى و الحاجات ديه بنات اخر زمن والله :D

**

و بعدين ايه يا بنتى التشتت ده انتى رغيتى فى خماشر الف موضوع فى بوست واحد و ياريتك بتكملى واحد فيهم لا هههههههههههههه ميلودى تتحدى الملل :D:D:D

safa7_karmooz said...

التاريخ مكتوب صح ولا غلط؟؟؟

catroz said...

كفايه طيبه...

هو عصام شكلوا عمل مصيبه اصلا

و 9 و نص عشان كنت بصحى بابا ساعتها كل يوم

يوميها معرقتش انام يا مومو اصلا:D

و ايوة هى البتاعه اللى اسمها مقله دى huh

catroz said...

big code...

ساعات مبينفعش اعيش مع نفسى واسمع حاجه تانيه
بيبقى الصوت عالى بجد
سواء مشغل اغانى او قران ...
الشعب المصرى بقى ...هنقول ايه يعنى ..

يارب منورنا على طوول..:)

catroz said...

Dead Man ..


معلش يا ديد بقى حقك على ...
ربنا معااك فى امتحان بكرة بقى و ان شاء الله ييجى حلو كده
و معلش هى دى حالتى لما ببقى عايزة انام
مليون فكرة و فكرة بتيجى على بالى ...:D

catroz said...

LoNeLy ...

ايوة مش حكايه بقى ما هى مومو قالتلى اسمها خلاص

شباب اخر زمن صحيح :P

وبعين فيها ايه لما ارغى فى خمستاشر الف حاجه فى نفس الوقت
هى بلوجتى ولا بلوجتك يعنى
:P

catroz said...

safa7_karmooz ...

السؤال ده اتسالته عشرين مرة

ايووووون يا مشمش التاريخ صوح

من شهر تقريبا يعنى

:D

safa7_karmooz said...

طويب بالراحة متزعقيش كده

:p

catroz said...

كلمه كمان و هعورك..:p