Sunday, July 20, 2008

يعنى خلاص مشيت ..





خلاص بلم هدومى و همشى

كنت بشوف بس اللى راح

حيطان ياما نمت فى حضنها

و هوا بارد جاى م الشباك .. طول عمرة كان بيدفي

شباك ياما استنيت المحك من وراه ..و الشمس منه تدخل تصحينا بنورها

صوت ايدك بتخبط على باب .. اتفتح كل مرة بلهفه

سرير و مخده شافوا دموع ياما

قميص ازرق كويته ..وبنطلون ومعاه شراب

فستان و روج و كحل

و بوسه على خدى

و مرايه شافت عيونى ياما .. بتقول بغير عليه

و قلم احمر و ورقتين عليهم اسمك .. و مرسوم قلب بيقول بحبك

ورقه فاضيه عليها دمعه

وصوت حليم بيقول اهواك ..و ام كلثوم ترد ب فات المعاد

حمول كتيرة اوى فى القلب

الف حكايه و روايه

زكريات و ورق و حب ولا يتحكى .. و الم ودموع ولا تتوصف

صوت ياما طمن قلبى .. و ايد بتسمح دمعه .. وحضن ياما دفى

لسه سرحانه و ايدى على خدى

شايفانى لاول مرة بشوف عيونك

ولاول مرة اهمس بحبك

ولاول مرة المس ايديك

و اعرف انك مش بنات افكارى

ولاول مرة يألمنى جرحك

ولاول مرة اصرخ باسمك

ولاول مرة بتغيب عنى

و اعرف ان الحلم مكملش

29 comments:

نعكشة said...

مش عارفة أقولك إية :(

انا حاسة اني هبقي حشرية ( مش حشرة) بس اللون الأسود يعني رائع
و الالم واضح
طيب حاولي تعملي بوستات سعيدة
واكتبي عن حاجات مُبهجة
يمكن تفرجي عن نفسك شوية

ربنا يعينك يا رب

و يفتح عليكي
و يهديكي
و يفرج كربك و ييسر دربك
و يهدي سرك

دمتي سالمة
سلامٌ عليكي

Lobna Ahmed Nour said...

الحلم لسة ماكملش ! محتمل

ساعات بيكون مش من المفترض انه يكتمل

سواء عرفنا الحكمة او جهلناها

لكن يكفينا اننا عشنا حلم جميل حتى

لو لم يكن ليه نهاية ترضينا

عيشي الحلم وعيشي اللحظة لان اللي فات عمره

ما بيرجع .. والحاضر في يوم هيكون ذكرى

علشان كدة حاولي طول الوقت

تصنعي اجمل الذكريات

safa7_karmooz said...

هى المام بتاعتك طردتك من بيتك ولا ايه..؟؟
هههههههههههههههههه

كلام جميل

بس اعتقد انك فى بداية الحلم...مش اخره

فكرى كويس بس

زى الهوا said...

جايز الحلم هيكمل فى يوم , غم غم ماتفرحينا شووووووووووية

Princesa ... WHiSPeR said...

انتى هتتجوزى وتعزلى !!!!!!

مالك يا روز فى ايه بس

بصى كل احلامك هتكمل وتبقى حقيقة فى حالة واحده بس
لو انتى عندك القدرة انك تحققيها

وكمان كل حاجه فى حياتك ممكن تبقى حلوه بس لو انتى عايزه تشوفيها حلوه

بصى قدامك بس وكل حاجه هتبقى تمام ان شاء الله

عمرو فكرى said...

معلشى :)

Unknown said...

ممكن يا روز يكون هو ده الخير
الله اعلم
بلاش تشائم
ربنا عمره ما بيجيب حاجه وحشه لاى انسان

Unique Gurl said...

ازيك يا رووز
عامله ايه
ليه يابنتي بس كل ده
ان شاء الله كله حيعدي و الايام الجاية تكون احلي :)

maioya said...

تعرفي ممكن لو كان اكتمل
مش كان يبقي في قلبك كل الاحاسيس
ممكن كان يبقي وراه
مخلفات ذكري انتي مش عاوزه
تفتكريها
صدقيني كده ممكن يكون احسن :))

Amgad said...

ايه اسلوب الوصف الرائع ده
وايه الاحساس بالاشياء ده
وايه الصداقة مع كل حاجه دي
وايه الروح الجميلة والعشرة اللي بينك وبين كل الحاجات دي
بجد اسلوبك رائع
وسعيد جدا لدخولي هنا وسعيد اكتر لزيارتك واتمني نتواصل دايما

Anonymous said...

:'(

Rushdy Kamel said...

جميل ان الانسان يتكلم
ويطلع اللي جواه بالطريقة البسيطة العميقة دي

تحياتي ليكي

Princesa ... WHiSPeR said...

اين انتي يا روز !!!!

No Fear said...

السلام عليكم
أكيد مش هي دي نهاية العالم
و القادم إن شاء الله أحسن

ياريت تغيري فعلا شكل المدونة

oRiGiNaL HeArT said...

ربنا يصبرك على الاحساس الصعب دة
بس الحلم اكيد هيكمل طالما لسة عايشين
:)

............
ليكى عندى تاج

momken said...

اه ما اصعب الفراق

كلامك جميل اوى بس مؤلم اوى
اعمل فيكى ايه

ياله الله ينور

تحياتى

perlina said...

ان شاء الله الحلم يكمل بس انتى لازم يكون عندك القدره انك تحققيه

تفائلى يا روز :):)

momken said...

فين الجديد يا استاذه

تحياتى

كفايـة طيبـة said...

حاسة البوست ده مختلف شوية

يمكن فيه نضج اكتر :)

مش قادرة احددايه تانى اوجه الاختلاف اكتر من كدة

بس هو مختلف :)

catroz said...

نعكشه...

اهو يا بنتى بظروفها و بنحاول نعدلها يوم بعد يوم..
عادى يعنى اهى الحياه مبتقفش يوم لينا و يوم علينا ..:D

منووووووووورة ...
و عليكم السلاام

----------

unique...

اجمل شىء على الاقل احنا مقتنعين بيها
ان اجمل ايام حياتنا لسه مجاتش
...:)

catroz said...

safa7_karmooz..

اه فكرت ..:)

-------------

زى الهوا ..

من عيووونى .. المرة الجايه ان شاء الله :P

catroz said...

la Princesa ... WHiSPeR ...

لا يا بنتى انا هنا اهو
اتجوز ايه بس بلا نيله

:D

المشكله اننا من اول مرة نتكعبل بنحس ان الحياه وقفت
هى مبتقفش على حد ولا على شىء
احنا بس اللى بنحب نكئب نفساوياتنا حبتين تلاته
:D

---------------
amr fekry ...

بيطلع فى الغسيل يا عمرو ..

catroz said...

lost love ...

مش تشاؤم
هو واقع ..:)

-------------

unique gurl...

عاتى عاتى
بكرة حلو ان شاء الله
منورة يا جمييل ..

catroz said...

maioya...

فعلا ممكن يكون احسن
هو احسن ..
بكرة فى احلى ..:)

-----------

amgad...

كل سطر كتبته كان بيدل على شىء معين..:)

انت اللى منورنا و يارب نشوفك دايما ..

catroz said...

وينكى ..

زعلانه ليه بس ..:(


--------------


big code...

اهو كلام كان لازم يخرج ..:)

تحياتى لك ايضا ..

catroz said...

la Princesa ... WHiSPeR ...

انا هناااااااا:D

------------

no fear...

طبعاااا مش نهايه العالم
ممكن تكون بدايه لشىء ما .......

شويه و يمكن ارجعها زى زمان
على حسب الظروف
منورنا بجد .. و متغيبش عننا تانى ..

catroz said...

oRiGiNaL HeArT ...

ادينا عايشييين و بنتنفس ..

التاج اللى عندك عملتوا قبل كدا :D

---------------

momken...

بيقولوا الوقت بينسى....
بس مش عارفه بقى


اسمك بيفكرنى دايما باغنيه منير
"اسكن بيوت الفرح .. ااااه ممكن .. اسكن بيوت الحزن ..لاااا يمكن ..."

catroz said...

perlina...

انا متفائله خيرا والحمدلله ..:)
بكرة احسن..

------------

momken...

لما النت يحترم نفسوا هيبقى فى جدييييييييد:D

catroz said...

كفايه طيبه ...

نضج .. لا مفتكرش
ممكن
مممممممممممم
ولا خلينى ااقولك بينى و بينى

وحشتيييييييييينى على فكرة
وحشتيييينى بصوت عاالى يا مومو ..:)