Friday, January 16, 2009

روز بتحب كوكى ..








من كام يوم كده
كوكى كلمتنى على الموبيل الساعه 5 الفجر
كانت واحشانى اوى اوى يعنى بجد
البنت كانت متصله تقولى كلمتين و تقفل
بس انا قعدت ارغى فى حاجات مالهاش لازمه كتيرة اوى
مش عارفه ليه
المهم كان فى حاجه حاصله عندها و كانت عاوزة تكلمنى فيها
خلاص بعد امتحانك يا كوكى انا قاعده شويه و نتكلم
بس يوميها مفهمش ايه اللى حصل و اناانشغلت فى حاجه تانيه
و مرحتش اقولها كان فى ايه الا و احنا مروحين
يعنى انت بتحلم يا حلمى ..
ااه انت بتحلم يا حلمى .. جيتى متاخر اوى يا روز ..
بفتح من شويه البلوج بتاعتها لقيتها كاتبالى كلمتين
الكلمتين فعلا خلوا عينى تدمع
بس انا فعلا مستاهلهمش ..بسبب اليوم ده
معلش يا كوكى .. انا اسف فعلا
مهما قعدت اديكى فى اعذار عن الحاجه اللى شغلتنى و اللى انتى عارفاها
برضوا انا غلطانه ..
انا عارفه انك اكيييد زعلانه منى ومش طايقانى
بس حقك عليا بجد ..
مش تزعلى منى
مهما كان الزعل بيننا مش بيطول
كفايه اننا بنروح و بنيجى و بنعرف ناس و بنسيب ناس
و برضوا احنا مع بعض ..
انا بحبك اوى بجد .. بس كتير مبعرفش اعبر عن حبى ليكى ..
كفايه انى اقولك انتى بتاتستى
او انتى حته منى
دا مش معناه انى بتاتس يعنى زيك
يووووووة
هو انا بقول ايه
بعبيطه على رايك
ربنا يخليكى ليااا يااارب
و يخليلى مومو
و مروة الهبله برضوا ..
ربنا يخليكوا كلكم ليا
-----------------

مبعرفش اعبر عن حبى
مممممممم
فعلا مش بعرف
لدرجه ان كتير ناس بيحسونى بايعاهم
مع انى مبقصدش
انا فعلا مبقتش اعرف اعبر لحد عن انى بحبه
و لو حتى بكلمه احبك ولا وحشتينى
مش عارفه ليه
مش عارفه ايه اللى غيرنى
مانا زمان كانت الكلام سهل اوى على لسانى
مش عارفه ليه فجاه مبقاش فى كلام
و اكتفى بالصمت ..
بقالى كتير اوى مقلتش يا مومو وحشتينى
مع انى كل مرة بكلمها بقولها واحشانى اوى
اصلها فعلا واحشانى
بس الكلمه مش طالعه
المهم يعنى
وحشتينى خالص يا مومو ..

-----------------

هو انا بارده..!!
اصل اتقالى الكلمه دى من يومين
انتى بارده يا روز
و كان بسبب ان شخص ما ماشى معايا بيكلمنى
و انا مش ببص له
هو المفروض طول ما انا ماشيه مع حد افضل ابصله يعنى
طيب ما هو انا سامعاك
هفضل ابصلك ليه
المهم انا اول مرة تتقالى انتى بارده
هو انا بارده فعلا ولا هو كان بيتهىء له ..
مصيبه سوده لو طلعت بارده ..:S

------------------

برضوا مش هكتب حاجه عنك
مش محتاجه اكتب حاجه عنك
مش محتاجه افكر فيك
مش محتاجه بجد
عارفه انى هكتب
بس مش دلوقتى
لسه .. مش دلوقتى ..:)

18 comments:

Dr Gad said...

اول كومنت ان شاء الله وافتخر

مبتعرفيش تعبري عن حبك ؟؟

اومال البوست ده ايه ؟؟
مش بتعبري فيه انك بتحبي كوكي للدرجه دي
وان زعلها يهمك و لمجرد ان حصل كلاش بسيط اديكي مضايقه بسببه

بصي يا بنتي هقولك كلمتين واهو انا قد جدك برضه :P

انا كنت ببقي سعيد بيكي انتي وكوكي علي المنتدي و علي البلوجات و علي الروح اللي بينكم وعارف انكم صحاب جامدين قوي جدا خالص وبجد ربنا يديم الصحوبيه دي

وكوكي مش محتاجة منك بوست تقولي فيه ده ولا حتي محتاجة انك تقوليلها بحبك

اللي بيحب انسان بيبقي عارف لوحده من غير حاجة وبيبقي عارف هو بيحبه ولا لا
مش لازم الكلام والفعل يدل علي كده

ساعات اكتر الاحساس بيبقي هو الدليل

:)

وبعدين بتسالي انتي فعلا بارده ولا لا؟؟
طيب ارد عليكي اقولك ايه طيب
مهو لو بارده مكونتيش تسالي السؤال ده في البوست ولا حتي بينك وبين نفسك
كنتي سمعتي الكلمه ولا حطتيها في دماغك وفكرتي فيها

ادم المصرى said...

الى بيحب حد لدرجه دى عمرهم ميدخلو بنهم وسيط او شيئ يكون مكروباظ بينهم انا معرفكمش لكن من البوست عرفتكو انتو الاثنين هيا انسانه حساسه جدا ورقيقه وانتى باين عليكى طيبه جدا ومخلصه مووووووووووت اتمنى دوام حبكم وصدقتكم واتمنى منكو زيارت مدونتى

عابرة السبيل said...

بصى يا بنتى وعن تجربة
مافيش حاجة اسمها ما بعرفش
حاولى مليون مرة وما تياسيش ابدااااا
لانك مش بس الوحيدة اللى هتخسر لما ما تعبريش عن اللى جواكى
حالوى كتير وهتقدرى فى الاخر تقولى كل حاجة بس ما تبقيش زى البرطمان بقى وتدلقى كل الكلام لا كلامك بحساب بس لازم توصلى للى قدامك مشاعرك وافكارك واكيد ساعتها هتحسى بفرق كبير فى حياتك
ربنا يقويكى

اه صحيح ....ممكن فى الاول تحسى انك مخنوقة والكلمة ماسكة فى رقبتك مش راضية تتنطق بس خليكى قوية واتكلمى واكيد هتتغيرى

فكرى فى غيرك اكتر من نفسك

Unknown said...

مش بقولك بعبيطه

:)

No Fear said...

السلام عليكم
بمناسبة الحب و التعبير عنه متقلقيش هو بيكون باين لوحده بس فعلا كل فترة بيحتاج تصريح
ده بالنسبة لكوكي و أخواتها
.
بالنسبة لموضوع باردة
مش بادرة أكيد
بس يفضل لو حد بيكلمك تكوني بتبصي له ده لو قاعدين
إنما لو ماشيين مش مشكلة
:)

simply me said...

على فكره كلامك صح
ممكن اوى اللى بيحب مايعرفش يعبر عن حبه بالكلام
بس اكيد بيبان من التصرفات

الحاجه اللى تغيظ بقى فعلا ان اقرب الناس ليكى هما اكتر ناس ممكن تزعليهم من غير ماتاخدى بالك حتى لانك بتكونى معاهم على طبيعتك اوى وحاسه انكم شخص واحد وفاهميين بعض جدا
وعشان كده اكيد هما بيسامحو على طول
ربنا مايجيبش زعل بينكم خالص يارب

blue-wave said...

ممممممممممممم
لأ ماهو واضح فعلا:))

Anonymous said...

روز
الكلام مش كل حاجه.. ساعات بنحتاج حاجات اكتر من الكلام..

مش عارفه ليه مواضيعك مع انها بتكون فضفضه عاديه بس بتأثر فيا اوي يا روز
ساعات بحس انك بتقولي كلام نفسي انا اقوله بس كل واحد بيعبر بطريقته..

بجد مش عارفه اقولك ايه..
انا كمان هكتفي بالصمت..:)

--------------------

ليكي تاج عندي يا روز
ياريت تقبليه

Hannoda said...

كنت بعملها كتير

الم الكل حولي و اكلمهم
وافرح و اضحك و ادمع و ابكي
واعاتب شوية و اتأسف شوية

و في الآخر ألاقيني بجري على التليفون و أقوم كاتبة ماسجات كلها حب و تسامح لكل اللي كانوا قاعدين معاي و فقلبي أفرحم بيها و افرح بفرحة على وشوهم افترضتها و صدقتها و رسمتها

ده اللي شايفاكي عملتيه و انت بتكتبي البوست ده

وعشان ما احسش اني بخنق البراءة و العفوية زي مابحس لما بكلم أختي اللي قدك
فحاكتفي بالابتسام
والدعاء
يااارب يحفظ قلبك الجميل

أما هو بقى

واضح انك مش محتاجة خالص انك تفكر فيه ولا تكتبي عنه
واااضح جدا

ساعات لما بتملانا المعاني مابيكونش فيه حتى داعي نتكلم عنها لإنها بتتكلم لوحدها

catroz said...

Dr dead ..

بجد ربنا يديم صداقتى بيها يااااارب كده لحد لما نكبر و تجيب عيال صغنتتين و ابقى اخدهم يبيتوا عندى و يقولولى طنط روز كمان ..
يااااه .. هتبقى حلوة اوى ..

تصدق ان الكلمه دى لحد دلوقتى عماله بفكر فيها يا ديد ..
انا بارده
بقت تخلينى اخد بالى من تصرفاتى فى حاجات كتيرة اوى
اصل ممكن اكون بارده بوجهه نظر شخص ما و بوجهه نظر شخص اخر لاء ..

بحب دايما اشوف الكومينت بتاعك
بيبقى مكمل للبوست ..:)

catroz said...

ادم المصرى ..

ايوة هى انسانه حساسه اوى و رقيقه و قلبها ابيض كمان ..:)

catroz said...

3abratalsabeel...

كلامك جامد اوى ..:)

catroz said...

~ Koki ~ ..

انتى بتاتس..

..:)

catroz said...

No fear ..

و عليكم السلام

حتى لو مش بعرف اتكلم
لازم كل فتره اقول بحبكم عشان مينسوش ..

احنا فعلا كنا ماشيين
و مع ذالك اتقالت لى الكلمه ..:

catroz said...

Bondoka ..

دايما بنيجى على اقرب الناس لينا
عشان بنفتكر انهم دايما عارفيننا كويس
و هيصالحونا بسرعه ..

catroz said...

blue wave ..

ايه اللى واضح بالظبط ..؟

catroz said...

hagar za3bal ..

الحب مش كلام .. دايما بيبقى افعال
بس ساعات بنحتاج جنبها كلمه بحبك عشان يمكن اللى قدامى مش حاسس انا بعمل ايه ..

و حاااضر هاخد التاج اللى عندك ..

catroz said...

Hannoda ..

انا برضوا بعمل موضوع الرسايل دى مع اخواتى و كتير اوى
كل ما ازعلهم تقريبا:D


عارفه لما تكون فى حاجات كتيرة لدرجه انك صعب اوى تكتبيها
هو الموضوع وقف معاى على كده
حاجات كتيرة اوى لدرجه ان ىمش عارفه حتى لو كتبت هبتدى فين ولا فين ولا هقول ايه ولا ايه
مش محتاجه اكتب
لا هو انا محتاجه اكتب
بس لازم اخلى نفسى مش محتاجه اكتب عنه
...