Monday, March 23, 2009

خلاص مبقتش عارف ..






حاجات كتيرة اوى و لازم تتقال


لو فضلت جوة تانى ممكن يجرالى حاجه فعلا

كان اول الاخبار الوحشه ان مروه شايله السنه

فاكرة يا مروة لما كنت بزعل منك الترم الاول عشان المحاضرات

طيب فاكرة لما خليتك تعيطى عشان مره محضرتيش الدرس

فاكرة بقى لما كنت بهددك انى هقول لماما

اصل انا كنت فعلا خايفه من ده

كنت خايفه اترمى فى حضنك و اعيط من ده .................



تانى خبر وحش ان ياسر اتوفى

ياسر ده ابن عمى

اتوفى عنده حوالى 26 سنه

فاكرة و انا صغيرة كان بيسرحلى شعرى

ولا لما كنا نيجى مصر و خارجين خروجه عائليه كان لازم ييجى معانا

فاكرة فى فرح جيمى لما عمل فيها زعلان و مجاش

و مروان هو بس اللى جه..

فاكرة برضوا ايه اللى بعدنا عن بعض

اصل خلاص زعلانين و كل حد عنده عزه نفس و مستنى التانى ييجى يصالحه

و عارف لو مجاش يصالحنى النهارده هيييجى بكرة

و تمر الايام و الايام تبقى اسابيع و الاسابيع تبقى شهور

و فجاه نلاقى عدى سنين

و نسينا نتصالح و نرجع زى الاول

و منفوقش الا لما نعرف ان الشخص ده خلاص مش موجود

هصالحه ازاى و اقوله ايه و ازاى

بعد ما مت عرفت انها كانت حاجه تافهه

مكانش المفروض ازعل منك

احنا اكبر من كدا

نفسى بس اقولك انت كنت غالى عندى اوى

فعلا .. خساره و لو ثوانى بعدناها عنك

مبنعرفش قيمه الحاجه الا لما بتروح مننا ..

بس لما بتروح مبترجعش تانى ..

ولحد دلوقتى ماما مش عارفه

مش عارفه اقولها ازاى

و لو عرفت ان انا و صفا عارفين بقالنا اسبوع كامل و محدش نطق

اخواتى التانيين و ماما ايه رد فعلهم

عاطف كمان والدته اتوفت ..

اتصلت بلوم .. و ياريتنى ما اتكلمت و عرفت

بس يلا .. اهو كده كده كنت هعرف

وماما لما كنت بقولها على عاطف

و بحكيلها الكلام اللى محمود حكاهولى

قعدت تقولى انتى مخبيه ايه عليا ... فى ايه تانى وحش حاصل و مش راضيه تتكلمى

هو انا بقى يبان عليا اوى كده !!

محمود بيقولى نعمل جواب و نكتب عليه من برا مصاااااااااااااايب

و يعدى على كلوا و احنا نطلع منها

اصل مروة لسه مقالتش لمامتها انها شايله السنه

ولا انا قلت لماما ان ياسر اتوفى

***

اللى فعلا يزعل اننا بنحاول نصلح من نفسنا ..

بنحاول نبقى احسن من كده

ايوة ساعات بننزل لتحت و ساعات بنطلع لفوق

بنعمل ساعات حاجات غلطو احنا عارفين انها غلط

بس بتكون كده حاجات جايه بالصدفه

لاكن متكونش..............

كفايه كلام فى الحته دى

***

ساعتها بندور على اى حاجه صغيره تافهه نتمسك بيها

يمكن بتبقى صغيرة فعلا .. بس قيمتها جواك كبيرة اوى

ممكن تبقى صغيره فى عين غيرك... وكبيييييييييييرة اوى فى عينك..

طيب تعرفوا اننا لو سمعنا كلام غيرنا هنفقد معناها جوانا

لما بطلت اسمعهم رجع تانى لمكانته عندى...


البعيد عن العين بعيد عن القلب

ولا

البعيد عن القلب بعيد عن العين

اصل طول مانتى فى قلبى .. طول مانا بفكر فيكى هتفضلى معايا

ايوه مش مكفينى ابص على صورك بس

ولا اتكلم معاكى على النت ولا اسمع صوتك كل فييييييين و فين

نفسى ترجعى تانى بدل مانتى حاجه معنويه تبقى ماديه اكتر

بس حتى و لو كده انتى لسه مكانك فى قلبى .. و يمكن بيزيد

و يمكن كل ما بشتاقلك كل ما بحبك اكتر

بس بييجى وقت و بنبقى فعلا تعبنا من الفراق ..تعبنا م الغربه

***

مش عارفه دى كانت غيرة ولا اي بالظبط

انك قريبه من ماما .. و انا مش قريبه من ماما زيك

طيب و لو غيرة .. هو انا ليه محاولش اصلح

هو ليه دايما بنقول فى الحاجات دى كبر دماغك

اصل لما تروح .. ساعتها هنقول ياريتنى ما كبرت دماغى

***
تعرفى انك مش المفروض تتنازلى عن ده

مش المفروض تتنازلى عن حاجه نفسك فيها

مش المفروض تقبلى باقل من حاجه تستاهلك فعلا

مش المفروض تقولى اصل هو ده بس اللى موجود

طيب عارفه ان الحاجت دى بالذات لو دورتى عليها عمرك ما هتلاقيها

او هتبقى زى اللى فاتت و يمكن اسوا كمان

فوقى حبه

هتخسرى ايه كمان .........


***

تعرف انك لما بتكدب بيبان عليك اوى

تعرف انك برضوا بتبقى عارف انى عرفت و بتودى وشك الناحيه التانيه

طيب تعرف ان دى اول مرة افرح فيها ان حد كدب عليا فيها

تعرف ان الشطه بتخلى مناخيروا حمرا

طيب تعرف بقى انهم مش هيوافقوا ..:)

13 comments:

صمت المشاعر said...

مش عارفه اقول ايه بجد

بس انا اتاثرت اووي بكلامك بس اكيد

هي فتره وهتعدي وربنا يارب يصلح ا

لامور وتتحسن ويبعد عنك الهم والحزن

وردة said...

ايه الحزن ده كله
هوني علي نفسك
مش كده
ربنا اكيد حيكرمك ويصبرك
احتسبي عند ربنا وادعي
اكيد حيوفقك ويصبر
دعواتي ليكي
ربنا يصبرك
سلام

كفايـة طيبـة said...

el bakaa le Allah fy yasser
rabena y3eenek w yhawwen el ayyam

eyad said...

im so soory 4 what u facing
but trust me all thing will be ok
so plz take care of ur silf more than that

ur realy agood person
تقبلي مني خالص التعازي في ياسر

مع خالص تحياتي

eyad

طوبة ذهب وطوبة فضة said...

ربنا يرحم اللى مات ويهون على مروه معلش لا تاتى المصائب فرادا لكن كلها بتعدى برحمه ربنا قولى يارب هو القادر على كل شىء

Dr Dead said...

هقولك كلمه واحده بس

يااااااااااااااااااااااااه يا روز يااااااااااااااااااااااه

saragebaly said...

كلامك مؤثر وحزين اوي اوي

البقاء لله في كل من توفى

الله يرحم امة المسلمين جميعا

بس هوني على نفسك

تحياااتي

سارة

mona@asr elgnoon said...

مش عارفه اقول غير

لا حول ولا قوه الا بالله

اصحى يا مصر : اسلام ديو said...

الاحزان اكيد فى قلوبنا كتير
مهو لو الدنيا كلها فرحة اكيد هنزهق
دى فطرة الدنيا
فى الوحش وفى الحلو
فلازم نكون واقعيين وناخد الامر بكل صبر
اما من ناحية الصحاب فلازم تخليكى معاها
لأن الصحوبية دى مش بتتكرر

المدونة جميلة جداً وعجبتنى تسلم ايدك
يمكن دى اول مرة ادخلها بس بإذن الله مش اخر مرة
تحياتى

زهرة الأمل said...

البقاء لله

ربنا يهون عليكى

hager za3bal said...

بلاش تبتسمي وانتي هتموتي من الزعل.. يارب تبتسمي الابتسامه دي وانتي فرحانه بجد

البقاء لله في ياسر
وربنا يعين مروه
ويارب تكون اخر الاحزان يا روز

¤¦¤ثلوج¤¦¤ said...

روزا يا بتوته

ماتزعليش يا عمري

هو كده يجي علينا لحظه تلاقي كللللللللللل المصايب

نازله صواريخ علي دماغنا

وبعد كده تلاقي الدنيا بقت حلوه خالص

صدقيني بيحصل كده

وهتقولي ثلوج قالت

ربنا يفرج كربك يا حبي

:(

Blogger said...

eToro صفقات التداول المفتوحة في 227,585,248

اكتشف eToro شبكة التداول الاجتماعي الرائدة في العالم حيث يحقق ملايين المستخدمين أرباحًا عن طريق نسخ تصرفات التداول التي يقوم بها أفضل المتداولين.