Sunday, May 10, 2009

عمرى قل سنه ..








مرة تانيه من المرات اللى مش عارفه فيها ابتدى من فين ولا فييين

احنا بقينا 11-5-2009

عيد ميلادى ..

سنه نقصت من عمرى ..

السنين اللى هعيشها قلت منها سنه

فعلا بيبقى الاحساس صعب اوى لما تكون اقصى تخيلاتك انك هتوصل ل 25 سنه و تموت

عارف انت هتموت شباب .. هتموت صغير..

بلاش نقول عارف .. هنقول مجرد الفكرة مبتروحش من دماغك

او هى دى الفكرة اللى انت مؤمن بيها

اعرف ان اللى مؤمن بشىء معين اوى و مصدقه بيحصل

يمكن ..

مبقتش عارفه ..

اليوم ده عمرى ما بعرف ابصلوا انى كبرت سنه ..

عقلت .. استفدت من خبرات سنه زياده

لاء .. مجرد السنين اللى مكتوبلى اعيشها قلت سنه كمان

لو كانوا 7 اهم بقوا 6 بس..

وكل سنه بيجيلى الاحساس الغبى ده ..

ببقى عاوزة اليوم ده يعدى اسرع ما يمكن ..

كل سنه فى عيد ميلادى بعيط عيااااااااط

اقفل باب الاوده و النور و تحت البطانيه

ممكن انزل اتمشى ..

السنه اللى فاتت فاكرة اليوم ده اوى ..

نزلت اتمشى لوحدى .. مكنتش قادره اتنفس

بقى عندى 18 سنه و مكنتش قادره اتنفس

بابا زمان قالى ان سن ال 18 ده من احلى سنين حياه الانسان

احلى السنين ..!!

مشعارفه احلاهم ولا لاء..

بس متاكده انه مكانش اسواهم ..

مممممممممم

بقالى فتره بهرب م الكتابه .. عارفه ان اى حاجه هكتبها هتبقى نكد

مش عاوزة كده ..بس هو الكلام بيطلع كده..

مبقتش ارد على كومينتس

المتعه فى كل حاجه تلاشت

المتعه فى انى افتح البوست و الاقى كومينتس جديده

ولا ادخل والاقى حد من المدونين اللى بحبهم يبقى كاتب بوست طول بعرض

انزل الكليه ااشوف اصحابى ولا نخرج خروجه من بتوع ايام زمان

اكلم كوكى على المسنجر و نهيس تهييس امتحانات

اقولها انها واحشانى وان نفسى اخدها فى حضنى

اخدها فى حضنى فعلاو احس انى بمثل

ولا اكلموا و اقولوا هترجع من السفر امتى ..نفسى اشوفك بقى ..

ومش حاساها من جوايا طالعه باشتياق

لا ..دى كلمه متعوده بس اقوهالوا

اسمع كلمه بحبك من حد .. و ميتحركش اى شىء جواى

الكلمه دى زمان كانت بتاثر فيا اوى

حتى الضحكه مبقالهاش طعم

كتير بقيت احس ان مجرد انى ابتسم صعب عليا

حاجه مش حاسه بيها

فى نص ضحكه بصوت عالى اسكت

اصلى مش بضحك .. مش طالعه من قلبى

ميته ممكن ..

عايشه بس ميته ..

كنت لما بوصل للحاله دى ...

مجرد يوم حلو بقضيه مع ناس بحبهم بيرجعنى لنفسى تانى

دلوقتى ولا اى حاجه بعملها بترجعنى لنفسى ..

طيب و هى المشكله فين .. فى ولا فيهم ولا فيكم ..

هو ان بقيت مقصره مع الناس اوى كده ليه

مقصره لدرجه انى مبقتش عارفه اسال عليهم ازاى اصلا

ولا هما اللى مقصرين اصلا مش انا

ولا احنا الاتنين مقصرين ..

ولا يمكن مفيش حد فينا مقصر دى الحياه نفسها واخدانا

ولا كل واحد لاقى حاجه حلوة مشغول بيها ناسى اللى حواليه

مبعرفش اتاسف

اكتشفت مؤخرا انى مبعرفش اتاسف

مبعرفش اتاسف خصوصا لو الاسف المفروض يتوجه لواحد مش لواحده

الكلمه فعلا مبتطلعش منى ..

ابقى غرقانه فى الغلط ...واول مرة ااقول معلش متزعلش..

وتانى مرة اروح اقول على فكرة مش هتاسف

والتالته على فكرة براحتك مش فارقه عندى كتير

يقولى ريحينى بس و اتاسفى ..اقوله هتعمل ايه بالكلمه يعنى..

مش قايلاها..

قلبى بقى قاسى اوى على الناس اللى كنت زمان بتنفس هواهم

كنت بتكسف من نفسى زمان اوى لما اعلى صوتى على حد اكبر منى

دلوقتى بقى دا الطبيعى .. سواء الاكبر ده معيد ولا راجل بتاع امن ولا حتى حد من اصحابى

كنت زمان لما بلاقينى بزعق بسكت و امشى بعيد ..

دلوقتى بقيت اكملها للاخر ..

اقرب الناس بقت تقولى انتى بقيتى قاسيه على كلوا

مش مفرقه بين قريب ولا بعيد

مش عارفه ليه بقيت كده .. مش عارفه حتى هفضل كده ولا لاء

ساعات لما بتتجرح اوى بتبقى ماشى بمبدا "اجرح ااه لاكن اتجرح لاااء"..يمكن

زمان كنا بنبقى عارفين ان الحاجه دى غلط و نعملها

دلوقتى مبقيناش اصلا عارفين نفرق غلط من صح

حتى مش عارفه احنا مش عارفين ولا مبقيناش عاوزين

بقيت ساعات اخاف اكتب ..

بتتقالى الكلمه دى .. متظهريش مشاعرك قدام حد ..

خبيها جواكى ..او ممكن تيجى ب خلى اللى جواكى ده ليه ..

احتفظى بيه جواكى عشانى ..

وممكن يتقالى ..متكتبيش كده انتى بنت الناس تفهم غلط

تصدقوا ان الكلام ده بقى ياثر فيا ..

جيت سيره حد فى كلام مرة .. ييجى حد يوضحلى انه اتضايق و بيغير ..

غصب عنى بعد كده لما اكتب ولو نص كلمه عن حد الموقف يتكرر تانى فى تفكيرى

بمناسبه الحد ..

مبقيناش نسال على بعض .. مبقاش حد فينا بتنازل و يتصل يتطمن ع التانى

ولو حصل بيتصل مرتين و لو مردتش استحاله يتكرروا

ونفس ده انا بعمله ..

فين ايام زمان كنت بمسك موبيلى الاقى 40 ميسد

اصل انا مبعملش موبيلى سيلنت .. فلما مردش يبقى فى حاجه حصلت

كانت الناس فعلا بتقلق على الواحد

دلوقتى هما بالكتير اوى اتنين ميسد و انا عملت اللى عليا ..

واللى طالع فيا جديد دلوقتى بقيت اخاف اتصل بحد و ميردش ولا يتكنسل عليا

ممكن ابقى بتصل اتطمن ومن كنسله ابعت مسج اهزق على طول

مع ان الناس بتتصل بيا و بيتحرق دمها وانا ولااااا على بالى

كنا زمان بنتكعبل و نقع و نقوم تانى و نكمل و كلنا تفاؤل

كنت لما تيجى تعمل حاجه و متنفعش بالطريقه دى....

كنت تجرب تانى و تالت و عاشر لحد ما تعملها

دلوقتى من اول مرة بستسلم ...................

فى وسط ما الناس بتقول نقرب من ربنا و نلبس محترم...

و منهزرش مع زمايلنا بطريقه مش حلوة

منزعلش اهالينا مننا .. احنا مالناش غيرهم ..

ييجى حد يقولك هو انتى بتلبسى واسع ليه

هو انتى متدينه بزياده ليه يعنى و مواظبه على الصلاه

هو انتى ليه سايباهم يمشوا كلامهم عليكى ..متسمحيلهمش

ولما تقف مذبهل من الكلام اللى بيتقال

الرد يرجع اسوا ..يا بنتى انتى عايشه فى ايام زمان ليه خليكى فى دلوقتى

غريبه اوى لما يحصل موقف و تحس جواه ان الدنيا اتغيرت اوى

بسبب كلام بيتقال من حد ولا شخص عمل موقف

وفجاه راحت من عندى الرغبه فى الكلام

كفايه بقى ................

14 comments:

MaNoOoSh said...

حاولى تعرفى نفسك اكتر وتراجعى تصرفاتك
ولو مزعلة حد قريب منك اعتذري من غير احراج
صدقينى الدنيا متسواش اننا نزعل حد بيحبنا لاننا بقى نادر لما نلاقى حد بيحبنا
ربنا يوفقك يا قمر ويشيل عنك الهم

Sometimes said...

استعينى بالله
وبعدين ده كل سنه هيبقى فيها خير ليكى
مش كده يا روز
عارفه
النهارده وانا بكلم التلامذه كنت بشرحلهم العقيده وكده
لقيتنى نسيت الحاجات دى
ليه وصلنا نفسنا لكده؟؟
بس والله هنرجع تانى
ان شاء الله رب العالمين
ومتحسبيهاش بالسنه.. احسبى باليوم .. حاسبى نفسك كل يوم قبل ما تنامى.. شوفى انا اتعلمت ايه النهارده...
حاجات كتير اوى يا روز اتعلمتها الايام اللى فات الحمد لله ربنا يقدرنى وافضل اتعلم
انتى كمان سيبك من اللى يهبط عزيمتك
قولى انا الحمد لله صح وربنا معايا
"ان الله معنا لن يضيعنا"

استودعك الله
خلى بالك من نفسك

hager za3bal said...

روز
كل دا جواكي
عارفه انه حمل كبير

بس تعرفي
انتي اللي مكبراه اكتر واكتر

ليه عامله في نفسك كده؟؟؟!

بصي
انا مش فاهمه
يعني ايه هعيش لحد 25 سنه بس وانا مقتنعه بـ كده ؟؟
مين قال كده؟؟
مين اوحالك بكدا؟؟
وحتي لو في اي مرض او اي حاجه خلت اخصائيين يقولو كده لو ربنا مش كاتب كده مش هيكون.. صدقيني..
خلي املك في ربنا كبير..

وبعدين طول مانتي مقتنعه بكدا هيحصل،
انا قريت كتاب اسمو the secret الكتاب ده بيتكلم عننا
ان كل واحد فينا هو اللي باءيديه يغير حياته بس هو مش واخد باله
هو اللي باءيديه يجذب الافكار الحسنه او السيئه ليه وبتتحقق
يعني لو حطيتي في دماغك انك بعد سنه هتبقي اغني واحده في العالم هتكوني
ولو حطيتي في دماغك انك بعد سنه - بعد الشر عليكي - هيجيلك مرض كذا هيجي بس تكوني مقتنعه من جواكي ان اللي في دماغك ده هيتحقق..

فـ ليه ياروز تجذبي ليكي حاجه مش حلوه لمجرد انك شايفه الدنيا مالنضاره السودا ومقرره تفضلي كده؟!

اكسري اي حاجز حواليكي
حتي لو تعبانه
حتي لو موجوعه مالدنيا اوي
انسي الوجع
حتي لو مش لاقيه حد يفهمك
دوري عليه
ومتقوليش منا عشت ال 18 سنه اللي فاتت بدور
خليكي ايجابيه اكتر من كده
حتي لو انتي خلااااص مقتنعه ان قل من عمرك سنه ومش مستعده تشيلي الفكره دي من دماغك
يبقي تعيشي حياتك في طاعة الله ومتديش ودانك لناس افكارهم مهزوزه وهما اصلا مهزوزين ، وكمان متفكريش فيهم لان في حياتنا لازم نقابل الابيض والاسود والازرق كمان..
وتعيشي حياتك بقي
ارجعي لاصحابك
انتي اللي بايديكي ترجعي زي الاول او تفضلي في اللي انتي فيه يا روز
وبعدين حتي لو هما اتغيروا
لازم انتي ترجعي زي الاول تاني وهما هيرجعوا
لو انتي رجعتي زي الاول دا اكيد هينعكس عليهم وهيرجعوا زي الاول واحسن
وبعدين ياروز انتي مؤمنه وعارفه ان ان الله لا يغير ما بقوم حتي يغيروا ما بانفسهم ..

ولو حاسه انك غلطانه ياروز
تعالي علي نفسك واعتذري
صدقيني انا كنت زيك كده مبعرفش
بس كسرت الموضوع ده اتغلبت عليه
وفعلا لما بكون مقتنعه انني غلطانه وبعتزر بحس انني ارتحت اوي .. احساس براحه غريبه كدا نفسي تحسي بيها ..

روز
اخرجي وبلاش تقوقعي نفسك في البيت
حتي لو احنا في فترة امتحانات
روحي ذاكري بره في اي كافيه
جربي كده حتي لو مع نفسك
اتمشي لوحدك
اعتقد انك هتعيدي حسابات كتير
وهتتغير حاجات كتير
لما هتبقي ماشيه وتلاقي جروب اصحاب اكيد اصحابك وخروجاتكوا هيوحشوكي

ومتخافيش من مشاعرك اللي انتي بتطلعيها دي
مشاعرنا مش عيب ياروز
بس المهم نطلعها قدام ناس تقدرها مش تستخف بيها

لو في حب في حياتك يل روز حاولي تصلحيه اكتر
ويبقي هو السند ليكي
اعتقد وهو جمبك في حاجات كتير اوي في الموود ده هتتغير
لان حياتنا احلي كتير بالحب

ومتخافيش من ضعفك دا يا روز
بعد منتهي الضعف بيقوي الانسان وبيبقي في منتهي القوه

ومتستسلميش وتنسي المذاكره
دانتي اللي قلتيها قبل كده
study well or go to hell
ولا مش فاكره؟

وخدي بالك من نفسك

ربنا يوفقك

hager za3bal said...

نسيت اقولك بقي انك لازم ترجعي تردي علي البوستات من تاني
صدقيني دي اكتر حاجه بتخرج الواحد مالموود

ولازم تزوريني وتزوري ناس كتير وتشوفي افكارهم كتاباتهم وكمان همومهم.. والله هيشيل من عليكي كتير

ولازم تكتبي
حتي لو كتاباتك هتكون نكد
احنا يا ستي هنستحملك
صدقيني
لو كتبتي وخرجتي كل اللي جواكي عالورق دا هيفرق معاكي كتييييييييير
كتير اوي ياروز

romansy said...

اولا
كل سنه وانتى طيبه
عيد ميلاد سعيد
ثانيا طول عمرنا هنخلينا نتعلم لغايه اخر العمر

بس خدى بالك وفكرى قبل ما تاخدى اى قرار

Ana keda said...

اول حاجة انتى وحشانى بجد اوى وكتير باجى هنا ومش بلاقى حاجة مكتوبة بس بجد فرحت بالى انتى كاتباه

كزا حاجة هقولهالك ويمكن هقولها لنفسى اول حاجة عيد ميلادك كل سنة وانتى طيبة انتى بس عشان الفترة الى فاتت كزا موقف حصل كعاكى عشان كده ماثرين فيكى ومش معنى ان سنة نقصت انك توقفى وتجمدى اللحظة عليها عيشيها بقى خلينا نعيشها بقى لوحدنا او مع ناس نعيشها وخلاص

اللخبطة دى انا ببقى فيها كتير لان فى حجات كتير بعملها زيك كده بس عارفة برغم ده كله انتى عارفة انتى ايه برضه كل دى حجات كده تراب وهيروح ان شاء الله

مش مهم اى حاجة المهم انتى فوقى كده وقولى انتى كويسة 5 مرات

ههههههههههههه

بس والله ما تزعلى

jousian said...

اثرتي فيا اوي يا روزة ..

والمشكلة فعلا ان كلام كتير اوي منك لو اقتبسته يمكن اقتبس البوست كله بينطبق عليا انا كمان للاسف

فمش عارفة احزن عليا ولا عليكي ولا علي الناس التانية اللي بيعانوا مننا بسبب دا .. ومش عارفة اي حاجة في اي حاجة الحمد لله

واللذيذ ان اللامبالاة دي بتوصللك انك تخليكي حتي مش عايزة تعرفي

خير خير ..

بصي سيبيها لربنا .. ربنا كريم اوي وهيكرمنا جميعا

هابقي ادعيلك ..

esraa said...

ممممممممممممأتمني ان دي تكون حاله انتي بتعدي بيها وتخلص
اهم حاجه انك اتكلمتي وقلتي اللي جواكي
اعتقد ان ده بيساعد كتييييييييير
ربنا يعينك يارب

¤¦¤ثلوج¤¦¤ said...

اولا كل سنه وانتي يا روزي يا حببتي

ثانيا انا مش عارفه اقول لك ايه

بس انا عمري ماحسيت انك قاسيه خالص العكس انا طول الوقت

بحس انك عسوله و طيبه جدا

ثالثا انتي لازم تلجأي لله وتشوفي ايه المعصيه الي بتعمليها

والي مخليه حياتك جهيم لا يطاق

لان مش طبيعي بنوته في سنك و تبقي بكل الحزن ده

و كمان مش طبيعي ان حد بيعيط في عيد ميلاده

ده الواحد بيستناه من السنه للسنه

بجد راجعي نفسك بينك و بين نفسك

وشوفي..

كمان نقطه اما تعملي حاجه صح زي اللبس الواسع او خلافه

متخليش حد يأثر عليكي بكلامه خصوصا لو وحش

عشان انتي بتعكلي حاجه صح

متخليش شياطين الانس تخليكي ترجعي في الصح ده

خلاص؟؟؟؟

ايه الرغي ده؟؟؟

يالا اشوفك بخير

دمتي بخير يا حبي

مهند ممدوح said...

العنوان عجبني أوي على فكرة
:D

كل سنة وانتي سعيدة بنعمة الوجود

No Fear said...

السلام عليكم
أنا بصراحة مقدرتيش أكل البوست من النكد اللي فيه
حرام عليكي كده
أنت لسه صغننة قوي علي الكلام ده
لما أنت في السن ده و بتقولي كده هتعملي أية لما تكبري
خلي ثقتك و إيمانك بالله أكبر من أي خوف عندك
.
غريب إن أنا اللي بأقول كده
:)
.
و كل سنة و أنتت طيبة
و إن شاء الله هتحتفلي بعيد ميلادك السنة الجاية مع ناس كتير بيحبوكي و هتكوني بتتضحكي ضحكة كبيرة من قلبك

WhItE HeArT said...

انا مش هقول لك منشيتات ولا حتى اي حاجة

بس عايز اقولك لو فعلا هما 5 سنين هنعيشهم يبأه ننبسط فيهم ونسيب بصمة فيهم

الخوف مش من الموت

الخوفمن انك تكون نكرة لحد ماتموت

اما التغيرات اللي ممكن تلاحظيها في نفسك فده طبيعي انك تتغيري وطبيعي احنا كلنا زيك على فكره بنتغير وانا بحاول كل مالاقي نفسي اتغيرت اعيد حساباتي واشوف انا اتغيرت للاحسن وله للأسوء واقف مع نفسي واحيانا ضدها

بوست حلوة عجبني اوي بصراحه علشان كده قريته كله مع اني عندي امتحان بكره وبصراحه فكرني بمطولة ابن خلدون

WhItE HeArT said...

اه بالمناسبة انا بأه عيد ميلادي 11/6

يعني اكبر منك بشهر

Blogger said...

eToro صفقات التداول المفتوحة في 227,585,248

eToro هي السوق الرائدة للجيل التالي من المتداولين والمستثمرين. بإمكانك تحقيق أرباح مباشرة من خلال التداول عبر الإنترنت وقيادة خمسة ملايين متداول اجتماعي حول العالم، والحصول على الأموال باعتبارك تمثل جيلاً جديداً من مدراء الصناديق عندما ينسخ الآخرون استثماراتك.