Monday, June 23, 2008

Everything Missing Something..




ابتسامه خفيفه و بشرة بيضا و خدود حمرا من الشمس

لون شفايف وردى .. و عيون بتقول كلام لا يتوصف ولا يتحكى

ايد دافيه تمسع دمعه من على خدى

حضن يحتوينى ... و ابقى عارفه ان هو دا الامان

لهفه لقائى بيك بعد سفر دام يومين بس

مفتقده وجودك ..كلامك .. روحك نفسها فى البيت

مفتقده كلامنا زى الاول

نتخانق و ترجع تصالحنى

تستنانى برا الجامعه عشان توصلنى البيت و اتاخر عليك و تزعل

تبقى لسه راجع من برا تعبان و تعرف انى رايحه اى مكان تيجى توصلنى

اتمشى معاك فى الشارع و ايدى فى ايدك

مجرد رجوع الاحساس بدفا ايدك تانى

لما كنت ابوسك على خدك و شعر دقنك يضايقنى

فى فرح .. تكون لابس بدله و انا البس فستان

و نرقص مع بعض و نضحك بصوت عالى

ننزل نشترى خيار و طماطم مع بعض عشان ماما تعمل السلطه

مارينا .. و ننزل البحر مع بعض زى الاول

مسافرين بالليل و كلهم يناموا و نفضل نسمع انا و انت ام كلثوم و نغنى معاها

تكتب خاطرة وتوريهالى .. و اوريك بكتب ايه و تعدل فيه

ارجع من برا و اقول "السلام عليكم" و تعرف انى عامله مصيبه

ولاا بعد يوم طويييل .. ادخل البيت واترمى فى حضنك

ولا الصبح الساعه 9 و نص اصحيك عشان تنزل الشغل

اعملك كبايه الشاى .. و انسى و احط سكر و اشربها انا

ولا تنزل من غير ما تقولى صباح الخير وتتصل تقولى صباح الخير

لما كنا نتفرج على فيلم مرعب فى عز البرد و ابقى قاعده و ماسكه ايديك

صوت جرز الباب ويمر ببالى ان انت اللى جيت

موبيلى يرن و ابقى عارفه ان انت اللى بتتصل

ولا مسج رقيقه منك

كلمه "حبيبى" تطلع منك بعفويه و يكون ليها احساس ميتوصفش

تصورنى صورة على سهوة و اشوفها على موبيلك بالصدفه

ببقى عايزة اشاركك لحظات فى الحياه

لحظات حلوة .. نفسى اشوف بسمه على وجهك و تكون فخور بى

اخاف اتعلق بشخص اخر بنفس درجه تعلقى بيك

لانى عارفه لو حصل و غاب عنى تانى ... هموت

طاال الغياب اوى ..بسال هتيجى امتى

مجرد فكرة انك ذهبت بلا عودة .. عقلى لحد دلوقتى مش متقبلها

ادور فى تفاصيل اليوم على حاجه ترجعنى ليك بس ميبقاش ليها نفس الطعم

مكان اتمشيت فيه معاك ولا كلمه كنت بتقولهالى دايما

ولا حتى قميص لونه بنى اقربه من وجهى و استنشق

مفتقده حاجه كانت جواى موجوده دايما يوجودك

يمكن بطلت بكاء كل يوم

بس لسه لحد دلوقتى بصحى من النوم الساعه 3 بالليل و افضل مستنياك

افضل اقنع نفسى ان الايام يتنسى الواحد

بس معاك انت بالذات لا ..بتيجى الايام و تخلى الواحد يفكر فيك اكتر و اكتر

ابقى عارفه ان فى حاجه اتكسرت جواى بسببك

بس بتيجى ايام بحس انها بتتكسرمن اول و جديد تانى

و نفس الالم .. و مقدرش حتى اتفس

و عينى يبقى لونها احمر من كتر الدموع

و كل شىء بيتكرر تانى حتى ابسط التفاصيل

ببقى نفسى انساك اوى .. انسى شكلك .. طريقه مشيتك

صوت ضحكتك اللى فى ودانى

مش عارفه انسى .. نفسى فى يوم احس انك ذكرى

هقدر اتخلص ولو من جزء صغير من الالم اللى بحسه لما بفتكرك

بس انت مبتتنسيش

امسك ورقه و قلم تانى و اكتب ... و ميبقاش نص تفكيرى فيك

من سنه لحد دلوقتى ببقى عايزة اكتب حاجه بس الاقى الكلام يبقى ليك او عليك

مش عارفه يعنى ايه هيعدى سنه تانيه من غيرك

و مش من غيرك بس .. من حاجات تانيه كتير

السنه مبقتش تبتدى من شهر واحد

بقت عندى من 22-6

الحاجه الوحيده اللى حسيت بيها ان فى سنه عدت

كنا بنضحك و بنزعل و نتالم بس كنت بتبقى هنا تشاركنا دا كلوا

لما كنت بتقول الحياه قصيرة متخليهاش تضيع منك

ولا تضيعى شبابك و سامحه لحزن ما يستولى عليكى

كنت بتقولى الكلام دا ...فى اوقات معينه

وبتعيده و تزيده

لما كنت بتقولى الايام دى يا روز هتبقى ذكرى و تقعدى تفتكريها و تحزنى عليها

مكنتش ببقى فاهمه يعنى ايه

او مش عاوزة اتصور الوضع هيبقى ايه

دلوقتى فاهماها اوى

لما كنت بتحكيلى عن باباك و تقولى قد ايه انت مفتقده

مكنتش ببقى عارفه الاحساس دا عامل ازاى

ولا هيبقى طعمه و لونه ايه

مكنتش عارفه انه بيموت الواحد بالطريقه دى

ولا بيغير الواحد بالطريقه دى

مش مصدقه ان دى انا بعد سنه واحده بس فى بعدك

امال لما يبقوا 20 سنه .. هبقى عامله ازاى

لو كنت عارفه .. كانت ايامى بيك هيكون لها معنى تانى

كنت هملى بيك ايامى بجد

كان هيبقى للثوانى طعم و شكل تانى


everything missing something

27 comments:

~ Bato0ot ~ said...
This comment has been removed by the author.
Unique said...

بجد احلى رسالة حب قريتها
انتي خليتيني ابكي
انا عارفة ان الشوق عذاب بس بلاش تحاولي تتخلصي من الذكرى لانها مش هتتعوض تاني
ممكن اوي بعد سنين تشوفي حد ماشي في الشارع
وللحظة تفتكريه هو
ربنا يجمعكم عنده

ريهام العربي said...

يااااااااااااااااه يا روز

جيتي علي الجرح ودوستي بكل قوتك

كتبتي كل اللي جوايه كانك بتقريه قرايه

زي الاب مفيش والله

ربنا يصبرك يا قمرايه ويصبرنا جميعا

ويرزقنا مجاوره اللي بنحبهم ف الجنه ان شاء الله

oRiGiNaL HeArT said...

;( ;(
ربنا يصبرك على الاحساس دة
انا مش عارفة اقلك ايه لانى بصراحة محتاجة اللى يقولى اعمل ايه فى نفس الشعور دة
ربنا يصبرنا جميعا
وان شاء الله لما ترتبطى بانسان يحبك وتحبيه اكيد هيخفف عنك كتير الاحساس دة :D

momken said...

نكدتى عليا
اعمل فيكى ايه وكل شويه ااقول كفايه مش هكمل قرايه مش قادر

انا اكتئبت
بس الذكريات ملكى مقدرش اتخلص منها
دى جزىء من تاريخ حياتى سواء حلو او وحش
هو جزىء منى ولازم احافظ عليه

رسالتك جميله اوى وبارعه اوى
ورغم طولها ممتعه اوى

تحياتى

may said...

بجد مش عارفه
اقول ايه

may said...

ربنا يصبرك

catroz said...

unique ...

اسفه لانى خليتك تبكى
بس ساعات الشوق دا بيبقى فوق طاقه الواحد
و بيبقى عاوز يتخلص من الاحساس دا بأى طريقه


...................

ريهام العربى ..

فعلا زى الاب مفيش :(
ربنا يهونها علينا ..
:)

catroz said...

original heart ...

ربنا يصبرك انتى كمان يا قمر ..

موضوع الارتباط بقى
مفتكرش ..:)


.................

momken ..

مش بيبقى قصدى انكد عليكوا و الله ..:(

الزكريات كلمى و كل يوم من كتر التفكير فيها بشتاق لهااكتر

منور البلوج ..:)

catroz said...

may ...

ربنا يصبرنا كلنا ..

منورة البلوج ..

Amgad said...

كاتروز اسعدني جدا مرورك
وايه كمية المدونات دي اتابعك علي انهي مدونة
بليز وضحيلي اي مدونة بتكتبي فيها
عشان مصر تتقدم بينا
هههههههههههه
خالص تحياتي وتقبلي مروري

Ana keda said...

no comment

i feel you sooooooo much

no word can express any thing

msh 3arfa a2ol 7ga bgd

shayma said...

ايه البوست الى يقطع القلب ده

بجد بوست راااااائع
كلام من جوه اوى

ربنا يصبرك يارب

catroz said...

amgad ..

ايوة هقولك عشان اللغبطه دى

دى اللى انا بكتب فيها ..

بس بتاعه words
دى انا و سفاح كرموز ..:)

منورنا بجد ..

...................

ana keda ..

nothing in da world can heal this pain ...

catroz said...

shayma ..

معلش بقى
ربنا يصبرنا جميعا ..

مي ... چــِنـيـن ... عيلة و عايزة أفهم said...

روزا ... انا جيت هنا اكتر من مرة ... و كل مرة افتح صفحة التعليق و في الاخر ماقدرش اكتب حاجة و اخرج زي ما دخلت

بجد مش عارفة أعلق

ربنا يرحمه و يجمعك بيه في الجنة يا رب

catroz said...

چــِنـيـن ...

اللهم امين

عاده لما بكتب حاجه برجع اقراها بعديها بكام يوم تانى ..
مش عارفه برضوا ليه البوست دا بالذات مش عارفه اقراه ..:(

perlina said...

يااااه يا روز :(:( ... بجد مش عارفه اقول ايه
ربنا يرحمه و يجمعك بيه ف الجنه

catroz said...

perlina ...

اللهم امييين ..

نعكشة said...

ربنا يصبرك و يعينك و يهون عليكي

انتي رقيقة قوي

حاولي تشغلي حياتك بحاجات تانية
اكيد مش هتضيع التفكير
بس لما تنشغلي هتقللي كمية الوقت المستخدمة للتفكير

اشتغلي حاجات
انزلي اعملي خير
اتبني قضية او فكرة او حاجة بتحبيا و اشتغلي فيها

ربنا يعينك يا رب

دمتي سالمة

سلامون عليكي

catroz said...

نعكشه ..

و الله بحاول اشغل وقتى بحاجات تانيه كتير اوى
بس عارفه لما يبقى فيه منه حاجه فى كل مكان تروحيه ولا اى ذكرى تفتكريها
بيبقى صعب اوى :)

يارب منورانى دايما يا قمر

و عليكم السلاام ..:)

فزلوكة said...

بجد مش عارفة أقولك إيه

كلماتك أبكتنى ... بجد

كتتيير مبنحسش بقيمة إللى معانا غير لما نفتقدهم

إنتى رقيقة أوووى

Lost Love said...

روز يا حبيبتى
انا عارفه ان الموضوع صعب عليكى
بس هو ده حال الدنيا
بجد احساس حلو اوى ان يبقى عندك ذكريات جميله كده لباباكى
لازم تحمدى ربنا عليها وتتمنى انه يجمعكوا بعدين
صدقينى بجد فى ناس معندهاش ذكريات اصلا عن ابوها حتى لو كانوا لسه عايشين
افتكريه بالرحمه والدعاء وافرحى انه كان انسان كويس واب حنين :)

زى الهوا said...

خلاص بقى ياروز لازم تتأقلمى بقىىىىىى , معلشى وديما خليكى حاطة فى دماغك ان حالك احسن من غيرك , اومال اللى مثلا بيفقد اهله كلهم فى حادثة ولا حاجة دا يعمل ايه , حاولى تتماشى مع الواقع انا عارفة انه صعب بس مش كل شوية تفكرى نفسك كدة و قرف يقرفك ياروز

catroz said...

فزلوكه ..

انتى الارق ..
فعلا هو الانسان طبعوا كده
مش بنحس بقيمه اللى معانا الا لما يضيع مننا ..

منورانى ..:)

...............

lost love ..

فاهماكى تقصدى ايه
بس عاوزة اقولك ان مهما كان
مهما كان قاسى ولا زكرياتك معاه مش حلوة
بعدين هتفتقديه بجد
متساليش ازاى
بس يمكن لانه حته مننا ..:)

حمدلله على السلامه ياكوكى
ويارب مش تغيبى عننا تانى

catroz said...

زى الهوا ..

عارفه و الله يا بنتى
حالنا احسن من ناس كتيرة اوى
ربنا يرحمهم كلهم
ويصبرنا جميعا

:(

ann said...

~.....................................................