Tuesday, June 19, 2007

...مكرونه بالمحشى

ياااه وحشتونى اووووووووى

بقالى فتره طويله مكتبتش حاجه جديده..يلا يومين و هيعدوا


المهم بقى كان فى حاجه حصلت من فتره كده مش قريبه و مش بعيده


ماما كانت تعبانه شويه..طبعا استحاله نقولها تعمل الغدا ولا بتاع


و انا كنت لسه راجعه من الجامعه بقى و عايزه انام و فاقده التركيز

بسال اخواتى..فين الغدا يا ولاد..دا على اساس انى انا بابا و جاى من الشغل..:D


قالولى انتى اللى هتطبخى


و قلت لهم ولا هطبخ ولا بتاع انا هروح اقعد على النت شويه و بعدين انام..:D


بسلم على بابا..و قعدت معاه شويه...قالى لما تفوقى كده قوليلى


عرفت اللى فيها طبعا..:D


و امرى لله و هطبخ





دخلت المطبخ و جبت الحله و حطيت فيها ميه و تقريبا ملح و سبت الميه عشان تغلى


و جبت المكرونه و مستنيه بقى الميه تغلى


مش عارفه كان فى ايه..

المهم زهقت و الميه لسه مغليتش..قمت حاطه المكرونه على الميه كده...

و طبعااا كل شويه متابعاها عشان اقلب المكرونه...






امممم بس كنت لسه عايزه اعمل الصلصه بتاعه المكرونه


بتتعمل ازاااى بتتعمل ازااااى


"وش بيفكر"


الله اعلم


و اخواتى كانوا ناموا


فتحت التلاجه لقيت طبق فيه صلصه


او هى كانت حاجه لونها احمر تدل على انها نوع من انواع الصلصه


...خيرا


جبتها و حطيتها فى صينيه و على النار و بقلبها


لحد ما لونها بقى غامق شويه..:S


كان طعمها غريب


او مش مالوف يعنى

جبت كل البهارات اللى فى المطبخ و حطيت عليها

شويه شويه ابتدت تدى طعم كويس يعنى الى حد ما


و كانت المكرونه خلصت فحطيت الاتنين على بعض
:D


ماما اللى كانت نايمه صحيت على الريحه و بتقولى... يا روز انتى بتعملى محشى..!!

رديت عليها الرد الطبيعى هو انا بعرف اعمل كبايه شاى لما تقوليلى محشى
:D


جيت بقى بعد كده حطيت الاكل و كان فى كفته سخنتها و كانت السفره يعنى شكلها جامد


انا من عادتى مبعرفش ااكل اى حاجه لو انا اللى طبختها..:D


اخواتى بقى..تسلم ايدك يا قمر..الاكل طعمه جميل..كل حد قال كلمتين حلوين كده


و بيبصوا لبعض و يدحكوا..و انا مكنتش فاهمه حاجه فى حاجه اصلا


قلت عادى الاكل طعمه مش حلو و مش عايزين يززعلونى


:D

بس ده خلصوه..يعنى عجبهم..طب اومال فى اييييييييييييه

و بدات ابحث عن سبب تعبيرات وجوههم

اصل كان فى حاجه فى الاكل فعلا يعنى اخواتى مبيعرفوش يخبوا حاج


نمت و صحيت تاانى يوم


اخواتى الاتنين بيتكلموا..عادى جدا مفيش حاجه فى حاجه


سمعتهم بيقولوا الحقيقه المره


اكلتهم مكرونه بطعم المحشى

الصلصه كانت خلطه محشى
..................

طبعا شكلى وحشششششش و اانا بطاطا كده ولا بعرف اطبخ ولا بتاع


و حتى معرفتش ان دى خلطه محشى" وش مكسوف مكسوف اوووى يعنى.:d "


قررت بقى ابدا اتعلم


و ادينى لحد دلوقتى اهو بتعلم اطبخ


بس ملحوظه بقى يا جماعه


جربوها كده و قولولى ايه رايكم


بجد كانت جامده


مكرونه بالمحشى

فقط مع كاتروز


:D



26 comments:

FloNa said...

يا نهاااااااارك ابيض يا كات

اي صلصة يا جدع وحطها على الاكل

طب دنا اللي بقولوا علي خايبة ومش بعرف حاجة ابسط حاجة بعرف اعمل معكرونة والله :)


يا بنتي مش ينفع كدة انا بقول تجيبي كتاب ابلة نظيرة عشان تنامي عليه حبتين :d


سيبك من حوارات الطبيخ دي مش جايبة تمنها :d

Anonymous said...

دمتى لينا مبدعة يا روز

Anonymous said...

وشوشني
لا جدعه والله كويس ان طلع طعمها حلو مش مهم حطيتي ايه تحطي اي حاجه

بس انتي المفروض تعمليهالنا مش احنا اللي نجربها
عشان يكون انت اللي عاملاها

catroz said...

فلوناااا..حبىىىى

أيون اى صلصه يا جدع ...المهم انهم اكلوا و عجبتهم يعنى ..مش عايزين اكتر من كده

انا برضه كنت بفكر اجيب كتاب ابله نظيره..احتماس ينفعنى ولا حاجه
:D
---------------
Anonymous

ميرسى على كلامك..فضولى يقتلنى ..المره الجايه اكتب اسمك
:D

----------------

وشوشنىىىىى...حمبى الاول و الاخير .." وش بيطلع قلوب"

أيون يا بنتى عجبتهم ...بفكر فعلا اعملها تاانى
looooool
و هبقى اعملهالك انتى مخصوص كومان..كده بس انتى تؤمرى يعنى
.." وش مكسوف"

safa7_karmooz said...

نهارك فوحلوقى ....

مش عارفه تعملى مكرونة؟؟؟

ههههههههههههههههههههههههههههههههههههه

لاء انتى شكلك عاوزة دروس طبخ...

فى كتاب هنزله قريب ...زاسمه

مهارات عمو السفاح

هوا طبعا علمت نفسى بنفسى

يعنى الستات اللى كنت بقتلهم...بشترط يعلمونى اكله....وبعدين كده ااقتلهم....فى الاخر اينعم كنت بقتل العيلة كلها....بس اهو لازم ااظبط نفسى برضه

لاء انتى عاوزالك بوست يشرح كيفية عمل المعكرونة

ربنا يكون فى عون اللى امه داعية عليه وهيتجوزك :P

المصير said...

البلوج دمه خفيف خالص و فعلا لو حد مضايق او مخنوق فعلا ,... لو دخلت مش هايخرج متضايف خالص .. ده بشكل عام .. وبشكل خاص موضوع المكرونه تلقائى جدا جدا ... و فعلا تسلم ايدك وربنا يكون فى عون اللى فى بالى

Anonymous said...

المكرونه حتى المكرونه يا روز

لا كدة مش هينفع خالص وانا اللى كنت


بقول هتعزم على صنيه مكرونه بشمل

Ana keda said...

هههههههههههههه

ضحكينى جامد اوى يالهوى مكرونة يلا معلش بس مش تشوفى الصلصة وبعدين تعملى بصلة كده عشان تسبك ولا ايه
وبعدين تحطيها على المكرونة بعد ما تسلق
ههههههه
دانتى عملتى عمل قومى انا فاكرة اول مرة عملت رز
هههه طلعتهنى وكان بيقرقش فى البق
مكنش ليه غير مكان واحد
الا وهو
وهو
الزبالة طبعا
ههههههههههه
يلا مستنية تقوليلى عملتى محشى بقى ها

المجاهدة said...

:d
ربنا يعزك
:d

مع انك حكيتي الموضوع ده قبل كده هناك بس و انا بقرى دلوقتي اتبسطت اوى :d

ربنا يكرمك يا روز

المكرونة دي من اول الحاجات الي الناس بتتعلم تطبخها :d

ابقى اتعلمي المحشى بقى :d

^-^ LoNeLy ^-^ said...

هههههههههههههههههههههههههههههههههه

الفااااااااتحة على ستات بيوت المستقبل

لا انا كده صرفت نظر سورى يعنى هههههههههههههههههههههههههه

مـحـمـد مـفـيـد said...

انا عمري ما دخلت هنا واول مره ادخل بس وجب علي تقديم العزاء في وفاه والدك

تغمده الله بالرحمه والمغفره وجعله من الطيبين الاطهار
والهمك الصبر والسلوان

Unknown said...

اختى الفاضله

ربنا معاكى و يعزيك انت و افراد العائله جميعاً


و يرحم الوالد برحمته الواسعه و يعطيه جزاء اعماله كل الخير

انا لله وانا اليه راجعون

Anonymous said...

السلام عليكم

ههههههههههههههه
مكرونة بالمحشي

طب انا بضحك على ايه
اضحكك على نفسي شوية

بردو لجأت قصدى دفعت مكرهه بفعل فاعل
على انى اطبخ
اصل ماما كانت بتعمل عملية
- الظاهر ان هى دى الفرصة لاظهار
المواهب لما ماهماهتنا يكونوا تعبانين-
المهم يا ستى

قلت انا عاوزة اطبخ يوم واحد بس
والباقي اقعد فيه مع نفسي
حررررررة
بلا طبيخ بلا وجع قلب

وعملتلهم صنف تحفة
آن
آن
آآآآآآن

عملت 12 كيلو بطاطس
-
صينية بطاطس-

طبعا على كذا مرة
بس اهو يوم ويفوت

مااقولكيش
البطاطس تحفة
من غير ملح ولا زيت

هى كان ناقصها حاجة
بسيطة جدا
..
..
كان ناقصها انها
تبقي بطاطس

نياهاهاها

ماتزعليش
دايما التجارب
الاولانية بتكون مصاحبة لشوية
فشل

بس ولا يهمممممممك
كله بييجى مع الوقت

سلاماتى يا قمر

MONDAHESH said...

انا متابع المدونة بس ده اول كومنت ليا

للاسف يكون في الظروف دي

البقاء لله
ربنا يرحم والدك وكل اموات المسلمين

انا لله وانا اليه راجعون

catroz said...

السفاااح
ايه نهارك فحلقى دى..ايه يعنى ايه..يعنى ايه فحلقى ده عايزه افهم

و انا اقول انت اتعلمت الطبيخ منييين..طيب ابقى علمنى بقى انا كمان معاك
و انت كده مع زياده عدد الضحايا بيزيد عدد الوجبات اللى انت بتعرف تطبخها يعنى على ما اعتقد...و بعدين ابقى اعملى انت بوست و اكتب لى طريقه عمل المكرونه
ولا مبتعرفش تعملها ولا ايه يعنى انت
و بعدين اللى هيتجوزنى هتبقى انه داعله له مش داعيه عليه
"وش برىء "

catroz said...

الاسطوره

ميرسى بجد على كلامك و بجد انبسطت ان البلوج يساعد على اسعاد الاخرين
و بعدين اللى فى بالك ده اكيد مامته داعيه له يعنى انا واثقه من كده
"وش برىء اوووى"

---------

atwa

منورنا يا اتوا بجد و مين قالك انى مبعرفش اطبخ
خلاص اهو انا بتعلم و ان شاء معزوم على مكرونه بيشاميل

catroz said...

Ana keda
ازاى رز و بيقرمش يعنى..لا انت كده سبقتنى بمراااحل يعنى..ربنا يكرمك يارب و تكبر كده و تطبخ محشى و مكرونه و رز مبيقرمش و ابقى تعالى المبوج هنا كتير
هبقى انزل دروس طبخ لان من الواضح ان الحاله العامه هنا صعبه اوووى كده
و محدش بيعرف يطبخ..فانا هتبرع و اعلمكوا يعنى

------------

المجاهده..
فعلا حكيته قبل كده هناك ..و ده اللى خلانى اكتبه هنا تاانى...
و فعلا المكرونه من اول الحاجات اللى الناس بتتعلمها بس اذا كنت مبعرفش ااعمل قهوه ..هتقوليلى اعمل مكرونه يعنى
ازاى بس
"وش مكسووووف"

catroz said...

LoNeLy...

ازاى يعنى تقول انت صرفت نظر يا ضياء
انت تطول اصلا...
"وش بيطلع لسانه"
كنت هقولك منورنا فى البلوج
بس بصراحه مش عارفه اقولك ايه
النور قطع يا ضياء

catroz said...

محمد مفيد
انا لله و انا اليه راجعون
الله يرحمه و قدر الله و ما شاء فعل

------------

whyme

الحمدلله على كل شىء
يااارب اغفر له زنوبه و ثبته عند السؤال

catroz said...

mesh2dra

فعلا المواهب بتاعتنا مبتظرهش الا لما بيكونوا تعبانين
بس مش معقوله انتى بجد
ازاااى يعنى 12 كيلو بطاطس
ازاى بس مش فاهمه يا بنتى
كتير اوى
ده لو فى مطعم مش بيعملوا كده يعنى على فكره
لا و فى يوم واحد
و ورا بعض
و من غير لا ملح ولا زيت
متاكده يا بنتى ان دى كانت بطاطس
طيب و هما اكلوا
اكيد تؤ
ربنا معاكى يا بنتى
و ربنا يكون فى عونه اللى بالى بالك

----------

MONDAHESH

ولا يهمك

الحمدلله على كل شىء...

Anonymous said...

نفس اكلها بقالى كتير مكلتهاش

(وش جعان)

catroz said...

ااه يا عطوه...انت تعبان

الف بسااا عليك يا ابنى

انت تخف بس و تبقى احسن من الاول

و هعملك مكروووونه بالمحشى انا

Anonymous said...

فين دى ولا شفت حاجه

لانى اصلا مبشفكيش

ولا حد بيسال

يالا دنيا

catroz said...

انا موجوده اهو يا اتواا
و بسال و الله
بس معلش بقى
يومين كده لحسن الواحد تعبان نفسينا
اختفى احسننن
:D

عمرو فكرى said...

:roll:


هههههههههههههههههههههه

skymad said...

ايه يابنتى ده

:lol:

بقى بنتى مبتعرفش تطبخ دى عيبة فى حقى

تعالى يابنتى اعملك انا اثتاذة فى الطبيخ (مش اوى يعنى )

بث انفع ويجى منى امل برضه

عثل ياروزتى (وش بيطلع قلوب حمرااااااااا)